Luka

13 Fø saa na, føga ngʉe ná nja ndrŭ d’rangʉeri Yesu dho, Pilato chengʉe Galilea nǎ nja ndrŭ ná ndrŭ ró ju tso ke gbangʉe ndima dhó bbʉdha na. 2 Føro Yesu ngʉngʉe kpadhó logoti: “Ni ká riddi Galilea nǎ che cheni ná fø ndrŭ njie chenga gʉ bbo pli Galilea nǎ nja ndrŭ djolu nari dho i kpa bani fø lo na ri? 3 Ri nga kʉ fø ri! Ro, ma ripo ni dho, ni maddi leni nzá ró, ni si cheni krʉ fø ndrŭ bbai. 4 Inga ni ká riddi Siloamu nǎ chi le chi ná bbo ngbeni ná nga glʉeni ro, ri chee ná 18 kʉ ná fø ndrŭ njie chenga gʉ Yerusalemu nǎ nja ndrŭ djolu pli ri? 5 Ri nga kʉ fø ri! Ro, ma ripo ni dho, ni maddi leni nzá ró, ni si cheni krʉ fø ndrŭ bbai.”

6 Føri goti ke bbʉngʉe i loroji: “Ddikpa ke zʉngʉe figi dhi tsú ndidhó divai dhi nza gʉ, ndirigoti ke singʉe ri djó ká kʉ ri kpa ro ddi ma nari ne, ro ke nzá singʉe ri ro ddikpa maddi ri. 7 Føri goti ke pongʉeri divai ronga ngʉ adi thɨ ná ke dho: “I ri kʉ cho gbo kana b’lo ma si tsu-kpa ne figi dhi i tsú djo ri, ro ma nzá dhé d’e ri ro ba ri, ró akrr ri krr! Ri ká nga tso cho pá addudho? 8 Føri goti ke ngʉngʉe logoti, ‘Nzɨ Bboke, abba ri njí cho ki ddikpa kpali, ma bbɨ dz’ ri kotɨ ndirigoti ma li mboleo ri kotɨ. 9 Føro gosi ná saa djo ri si ndi kpa o ngbà ró føri kʉ bblo, ro ri ó ndi kpa nzá ró, ni si ri krrkrr.

10 Ddikpa cha Sabato dyina, Yesu ngʉ longaddi ddikpa sinagogi nǎ. 11 Føro anja! Føga ngʉe ná ddikpa isɨle nǎ ngʉe ná gó ngʉ adi rili le ró klø sini si, ná føri njingʉe le cho 18 b’lo, ri kungʉe le nanga kú ndirigoti le nanga ro nzɨ ngʉ adi dani chi ri. 12 Fø le Yesu nja ro, ke pongʉeri: “Isɨle, ni gøgø ni ró tsu nǎ ro.” 13 Yesu lingʉe ndi thó le djo, føro thei le nanga dangʉeni chi ndirigoti le ngangʉe Mungu madha tso. 14 Sinagogi nǎ bbonga nanga kangʉeni ka Yesu gø ndrŭ Sabato dyina nari dho, føro ke pongʉeri birobiro kʉ ná ndrŭ dho: “Njí dho le bba ná ddo kʉ aza; anisi fø ddo na ndiro le gø ni d’e, ro nga Sabato dyina ri.” 15 Ro, Bboke pongʉeri ke dho: “Aro kudjo dyʉ* kʉ ná kpa! Sabato dyina ká ni adi nidhó tsí-kpa inga kana pʉ lubba nǎ ro ndi rá dda jø d’e nzɨ? 16 Nde, i isɨle kʉ Abrahamu nǎ gø ndirigoti le Shetani chi cho 18 kana b’lo, ná fø le ká ringaeni le kló Sabato dyina nzá? 17 Fø lo Yesu pongʉe ná saa na, ke tso ró ngʉ tøni ná ndrŭ krʉ djo do pangʉe, ro birobiro kʉ ná ndrŭ nanga jingʉeni bbo ke ngʉ nji ná ké ka ndi ke le nanga ná fø lo krʉ dho.

18 Ro, ke pongʉeri: “Mungu dhó Pidhinga ká di addu bbai ndirigoti ma ká ka ma ddi ri addu na? 19 Ri kʉ ddiddi haradali dhi tsu-kpa ddikpa ke dzì nari ke ra zʉ ndidhó í na, ri dhi nari goti ri ngʉ tsú ndirigoti rakpa ró rè chi ndima dhó dza ri ró lerr kalu nari bbai.”

20 Godhé ke pongʉeri ki: “Mungu dhó Pidhinga ká ma ka ma ddi addu na? 21 Ri kʉ ddiddi ddikpa isɨle dzì thì* nari le te gbo ina le ddi bbobbo* ná farine na, kpø fø dzi lú ra pɨpɨ ná nga djo nari bbai.”

22 Yerusalemu na ndi ngʉ ra ro, Yesu ngʉ da njonjo kʉ ná vile ma, vilaje ma na lú, longa ndi ddi ro. 23 Føro ddikpa ke dhungʉeri Yesu tso: “Bboke, gø si gø ná ndrŭ ká kʉ sese dhé?” Føro ke pongʉeri kpa dho: 24 “Aninji kpakpanga bbo ndiro ni tsu gbagba nanga kʉ ná dzaitso lu d’e, dhonalo ma ripo ni dho, bí kʉ ná ndrŭ si rine ndima tsu ri lu, ro kpa dho nzɨ ri ro si ka ri. 25 Dzaba si dani ndirigoti ke si dzaitso ta ró, ni si ma bbaidjo dzaitso ni d’ó ro ndirigoti ni di ripo ɨ: ‘Bboke, apʉ dzaitso ko dho.’ Ro, ke si ripo ni ni ɨ: ‘Ma nzá chu ni ká si ngbaga ro ma nari ri.’ 26 Føro ni si ripo, ‘Ko nyongʉe nga ndirigoti ko jøngʉe jødha dhi ritsi ni ma na ndirigoti ni ngʉ adi longaddi ko bbá bbobbo chu lu.’ 27 Ro, ke si ripo ni dho: ‘Ma nzá chu ngbaga ro ma ni si nari ri. Anituni ma nyǒ djó ro, ni nga kʉ chø ná lo nji ná ndrŭ!’ 28 Følu i ni ve di dzzdzz ndirigoti ni kudjo kǎ, Abrahamu ma, Isaka ma, Yakobo ma, ndirigoti nja bbanabi krʉ ma na ni si nja Mungu dhó Pidhinga nǎ ná saa na, ro ni le si bu bbaidjo. 29 Føri kina ndrŭ si nyani, dyí si ná nga ma, dyí tsu ná nga ma, arønga ma, agʉnga ma na laidjó ro ndirigoti ndrŭ si di mesa tso ro Mungu dhó Pidhinga nǎ. 30 Ndirigoti anja! ya mwisho kʉ ná ndrŭ si ngʉ ya kwanza ndirigoti ya kwanza kʉ ná ndrŭ si ngʉ ya mwisho.”

31 Fø saa na thei Bbafarisayo singʉe ndirigoti kpa pongʉeri Yesu ni: “Arara iga ro dhonalo Herodi rine ndi hwi ni hwi ró.” 32 Ke ngʉngʉe logoti kpa dho ɨ: ‘Anira ripo fø nzerr ni ɨ: ‘Ma gó di ndirigoti ma dhe gø njʉ ma, bbʉ ma, ndirigoti ddo gbo djó ma si ritso d’yad’ya.’ 33 Ringani ma rá madzá njí na anzi njʉ, bbʉ ndirigoti bbʉnga goti dhonalo ri ro nzá ka* nabi dhe Yerusalemu ró ro d’i ngana ri. 34 Yerusalemu, Yerusalemu, bbanabi adi che ná bba ndirigoti cho le cho ndi dhi ngana ná ndrŭ adi bú dju na ná bba, ma ká jingʉeri thɨ ina ma njú nidzá nzø tso ø adi ndi kalʉ tso njú ndi hú tsena nari bbai! Ro, ni nzá ungʉe føri ro ri. 35 Aninjari! Nidhi dza le bbabba ni djó. Ro, ma ripo ni dho ni nzɨ ma ki ro nja kpø ni ripo ɨ ná nga djo ri: ‘Yova* ró dho na si nari kʉ le ronga leni ná ke!’”