Ya kwanza Petro ndi ná barua
3 Føri bbai isɨ ndrŭ, anidjøni djø nibbá kpetsi kpa dho, ndiro njati rie nzɨ nja kʉ ná kpa ngarr lo dho ri ró, kpa ngʉ udha kana nidhó nyi chulu nzá le d’ralo ndima dho ro d’e, 2 ndima nja nidhó bblo kʉ ná nyi ma, nidhó bbo kʉ ná heshima ma na nari djotsina. 3 Nzɨ ni neri ni d’ani ni ndí ró dhé, føri i kʉ le djoká le che nari ma, or na le thɨ ná ritsi ni thó inga bblo pli kʉ ná rù ni thó nari ma na. 4 Føri rɨngana ringani ni d’ani ni thí nǎ atsi ro, dhonalo føri na mana e bbo Mungu nyǒ njí ndirigoti føri kʉ nzá ro ka ndi sani sa ná d’a; ndiro ni d’ani føri bbai d’e, ringani ni di ni djødjø ndirigoti ni é ngoi nji ná ndrŭ. 5 Dhonalo føri i kʉ anziro, ngbà lingʉe ndima dhó ngab’odha Mungu djó ná takatifu kʉ ná isɨ ndrŭ ngʉ adi ndima ronga thɨ ná chu, nì ndima ndima djødjø ndima bbá kpa dho ro. 6 Fø ndrŭ ro kʉ Sara mai, le ngʉ adi ngarr ndibbá ke Abrahamu dho ndirigoti le ngʉ adi ke nzǐ “madzá bboke.” Bbʉbbʉ dhé, nì kʉ ledzá sinzø njati nì di bblolo nji nzá nì bbari ddikpa lo do ma njí nì ro ddi ro ró.
7 Føri bbai, dzabai anidi kpa na nì ni kpa famu* ro. Anibbʉ heshima kpa dho sʉsʉ kʉ ná no bbai, føri i kʉ isɨ ndrŭ, ndiro nzɨ nidhó sala tso choni ró, dhonalo ni maddi si nzá tso ka ndi koe le djo ná zølo dhi shinga ba kpa ma na.
8 Lo tso d’yadha dho, aniliri nì é ddi nì tso gbani nidhó ngaddidha nǎ ro,* anidi nì li nja ndrŭ rɨngana, anijini le-djoi bbai, anidho zølo ndirigoti nì é nyenyenga na. 9 Nzɨ nì ngʉ chelo goti chelo na inga dhú goti dhú na. Føri rɨngana aningʉ logoti ledha na, dhonalo føri dho i nì nzingʉeni, ndiro nì ba ledha d’e.
10 Dhonalo ngbà jiri ndi njí maisha hwè ndirigoti ndi ddo bicha ná ke dho ringani ndi b’o ndi dà ronga chelo ró ndirigoti ndi tso ronga nzɨ ndi sha kali ró. 11 Ke njiri ndi bbá chelo tso ndirigoti ndi njí bblolo; ke né ngoi ndirigoti ke rá anzi fø ndi rinji nari na. 12 Dhonalo Yova* adi ndi nyǒ li chølo dhi ndrŭ djo ndirigoti ke bɨ na ke adi ddo nǎ kpa ddóni ná sala rr rr. Ro, Yova* adi ndi chuti lé chelo nji ná ndrŭ dho.
13 Nde, ni ró ká ie ka ndi ve chelo nji, njati ni di bblolo nji klø na ró? 14 Ro, ni kʉ hwè na, rie nza ma ni nzani chølo djotsina ró. Nzɨ ni di do na kpa do nji dho ná ritsi dho* ndirigoti nzɨ ni bbari ni djǒ nanga ngbʉni. 15 Aniliri Kristo tsetse ni thí lú nidhi Bboke bbai, krʉ ddo ró anidi tayari ni tú lonanga nidhó ngab’odha djo ngadhu ni tso ná ndrŭ dho. Ro, aninji føri nyenyenga na ndirigoti bbò heshima na.
16 Ni kʉ Kristo unakpa nari djotsina, aninji kpakpanga nidhó nyi é bblo nja ni é bblo kʉ ná zamiri na Mungu nyǒ njí d’e. Ndiro rie che kʉ ná lo inga kali dhi lo na ma ndrŭ ni bbø ró, kpa djo do pá, nidhó bblo nyi djotsina d’e. 17 Njati Mungu bbari nì nzani bblolo nì nji nari djotsina ró, føri kʉ bblo, chelo nì nji nari djotsina nì nzaéni nari djolu. 18 Nì mai Kristo ngʉe chølo dhi ke ro, ke dhengʉe ddikpa ina theinga dho nga kʉ chø ná ndrŭ dhi chenga djotsina, ndiro ndi ddá chutso ni dho Mungu dhi ngana d’e. Ke le hwingʉe ndi ndí ró, ro ke ngʉngʉe shi roho chulu. 19 Ndirigoti ri kʉ roho dhi fø le ndí na ndi kʉ ro i ke rangʉe lod’idha dhi lod’ra prizo nǎ ngʉe ná malaiká dho ri, 20 føri i kʉ nzá rrngʉe nga Noa cho nǎ ná malaiká. Fø saa na Mungu ngʉ ngab’o ngatsovedha na go safina ngʉ chini ro, ná safina nǎ nga bí kʉ ná ndrŭ dhé gøngʉe dda lú, ná føri kʉ 8 kʉ ná nafsi.*
21 Føri bbai di nari kʉ batiso, njʉ ndi ni gø Yesu Kristo dhó gadha chulu ro. (Ri nzɨ ni gø ni ndí ró kʉ ná muchafu dhé ndi tu nari na ri, ro ri ni gø bblo kʉ ná zamiri ni nzǐ Mungu tso nari chulu.) 22 Ke kʉ Mungu thó thá djó ri laidjó, dhonalo ke rangʉe ra na ndirigoti malaiká ma, bbobbonga ma, kpakpanga ma na krʉ lingʉeni kedhó bbonga tsena.*