Lo dho chutso ddá ná Baraza dhó ro si ná barua

Ji dhi le-djoi ma, le-vei ma na:

Mungu ma, ndrŭ ma na ko ji nari adi ko ronga cho ko “rá . . . ndiri- goti ko ddi longa ndrŭ dho, krʉ kʉ ná ndrŭ tsɨ kana ro ndirigoti ko bbʉ batiso kpa dho.” (Mt. 28:19, 20; Mk. 12:28-31) Njati ko é fø di ná jidha na ndrŭ dho ró, ko ka ko kó “nì thí kʉ bblo choro nŭnŭ di ná shinga badha dho” ná ndrŭ tsotso ko.​—Mdo. 13:48.

Drrdrr ko ngʉ adi ngbaribbai ma ko lo tsonga nari li ko djǒ na ndirigoti kichapo bbʉ. Ro, njʉ ringani ko njí kpakpanga ndiro ko thɨ kodhó lo tso ngadha dhi ufundi thika d’e. Ko jiri ko dhǒ jidha nja ndrŭ dho kpa nyǒ tho ná lo djo ko loti nari na. Føri na mana kʉ, ko di kodhó lo thika øø ndirigoti ko di ko thí lili ndrŭ krʉ dhó lo djo ndirigoti ndrŭ nyǒ tho ná lo djo. Nde, i broshua ká si ko tsotso ko ko njiri fø ngbaribbai?

I broshua nǎ somo kʉ 12, nari ka ndi kó ko tsotso kodho ringani ko é na ná sifa na ndiro ko dhǒ jidha ndirigoti ko ddi longa ndrŭ dho d’e. Ri nǎ krʉ kʉ ná somo dyʉ ndi Biblia d’ra Yesu ma, karne ya kwanza nǎ ngʉe ná Wakristo ma na dhongʉe lod’radha dhi njí kana ná sifa ró. I broshua dhi muradi nga kʉ ko li ngbaribbai ma le lo tsonga nari ko djǒ na ri, ro ko ne jidha ko ka ko dhǒ ndrŭ dho ná chu. Nì mai krʉ kʉ ná sifa e lazima lod’radha dhi njí kana ro, ko si ngbaribbai ma nja kʉ ná sifa ka ndi kó ko tsotso bbo pli lo tso ko nga nari kana, ndrŭ ronga ko ngʉ be nari kana, ndirigoti Biblia nǎ longa ko ddi ndrŭ dho nari kana nari nja.

Ri nǎ krʉ kʉ ná somo ni zø ná saa na, addinga bbo ngbaribbai ma ni ka ni dhǒ fø sifa nidhó eneo nǎ ndrŭ na ni loti ná saa na nari djo. Aliri nidhó jidha é kpakpa Yova djo ndirigoti nja ndrŭ djo. Fø di ná jidha si ni tsotso ko krʉ kʉ ná ufundi djolu ndiro ni si nidhó muradi djo longa ni ddi ndrŭ dho nari kana d’e.

Ko adi mbai po bbo ko ba bbò kʉ ná pendeleo ko njinjí ni ma na ddinga nari dho. (Sef. 3:9) Yova lé ni ronga bbo ni ra anzi jidha ni dhǒ ndirigoti longa ni ddi ndrŭ dho nari na nari dho!