SOMO 09
Andrini chøchø Mungu ro sala chulu
Ni ká d’erie ri ro ne b’lo le ddá chutso ni dho maisha nǎ? Ni ká adi bbo na mana kʉ ná logoti ne ddi? Nidhó lo ká jiri le li ni ro kpakpa maddi? Ni ká ka ni jieri ni kana nga é chøchø ddi Yova na? Sala ka ndi kó ni tsotso ko fø lo krʉ kana. Ro bblo ká le ka le nji sala ngbaribbai? Mungu ká adi krʉ kʉ ná sala rr rr? Ni ká ka ni njiri ngbǎ ndiro Mungu rr nidhó sala rr d’e? Akoba fø logoti i somo nǎ.
1. Ri ká ngani ko nzinga ie tso, ndirigoti ngbá lo djo?
Yesu ddingʉeri ko nzinga kodhi ra nǎ Baba ddiro tso dhé. Ke nganga ma ngʉ adi nganzi Yova tso dhé. Ke pongʉeri: “Ringani ni di nganzi ɨ: ‘Kodhi Baba ni kʉ ra nǎ . . .’” (Matayo 6:9) Yova tso ko di nganzi ró, ko kana kau adi ngʉ kpakpa ke na.
Ko ka ko nzinga krʉ kʉ ná lo djo. Bbʉbbʉ dhé, ndiro Mungu ngʉ kodhó sala goti d’e, ringani ri gbani ke ji ná lo na. “Ko nzinga ngbá lo djo ma, ro ri gbani [Mungu] ji ná lo na ngbà ró, ke ko rr rr.” (1 Yohana 5:14) Yesu bbʉngʉe nga le ka le nzi djo ná loroji. (Azø Matayo 6:9-13.) Føri djolu pli, ko di nganzi ko nanga d’o ná lo djo ma ró, kodho nzá ringani ko vi mbai ko po Mungu dho nari nga ri ndirigoti ringani ko nziri ke kó nja ndrŭ tsotso maddi.
2. Ri ká ngani ko nzinga ngbaribbai?
Biblia ko li kpakpa “ko kló [ko] thí tso [Mungu] nji.” (Zaburi 62:8) Føri dho, ringani kodhó sala si ko thí nǎ ro. Ko ka ko nzinga ko chu bbobbo ri na inga ko thí nǎ tsitsi ro ndirigoti heshima na. Ko ka ko nzinga krʉ saa ró ndirigoti krʉ kʉ ná ngana.
3. Mungu ká adi kodhó sala goti ngʉ ngbaribbai?
Ke adi sala goti ngʉ njonjo kʉ ná chulu. Yova bbʉ ndidzá Lo Biblia ko dho, ri nǎ ro ko adi kodhó ngadhudha goti ba. Mungu dzá Lo ka ndi “liri nzá chulo ná le [ngʉ] nyodyu na” njati le zøri ngbà ró. (Zaburi 19:7; azø Yakobo 1:5.) Ke ka ndi bbʉ ngoi dhi ngaddidha ko dho kpakpalo dhi saa na. Ndirigoti ke ka ndi cho ndidzá njí dhi kpa ronga ndiro kpa kó ko tsotso uhitaji dhi saa na d’e.
ANE LONANGA BBO
Aneri ni chu ni ka ni nji ná lo ndiro Mungu rr nidhó sala d’e ndirigoti aneri ni chu sala ka ndi bbʉ ni dho ná faida.
4. Ngbaribbai ma Mungu jiri ko nzinga nari
Addui ká adi rili Mungu rr kodhó sala inga nzɨ ke rr kodhó sala? Aninja VIDEO.
Yova adi riji ko nzinga ndi tso. Azø Zaburi 65:2, ndirigoti anitilo i ngadhudha djo:
Ni ká riddi “Sala adi rr ná ke” riji ni nzinga ddi ndi tso? Fø ká ni ripo addudho?
Ringani ko rrnga Mungu dzá yadha dho kodhó maisha nǎ njati ko jiri ke rr kodhó sala ngbà ró. Azø Mika 3:4 ndirigoti 1 Petro 3:12, ndirigoti anitilo i ngadhudha djo:
Yova ka ndi rr kodhó sala rr nari ká ko chu ngbaribbai?
Vita ra nji ná kpa adi nganzi ndiro ndima sisi ndima ra hwini tso ró ná kpa djó d’e. Ri ká ka ndi kaka Mungu ngʉ fø di ná sala goti?
5. Kodhó sala dho ringani ndi si ko thí nǎ ro
Nja ndrŭ dho le ddirie ri nari kʉ, sala nǎ le ka le ngʉ ddikpa lo djolu dhé. Ro Mungu ká adi riji le nzinga ndi tso føri bbai? Azø Matayo 6:7, ndirigoti anitilo i ngadhudha djo:
Nidhó sala nǎ ni ngʉ “ddikpa lo djolu dhé” nari ká ni ka ni pʉ ngbaribbai?
Krʉ ddoró adi ngaddi Yova dho ni ka ni po mbai dho ná lo ro djo. Njati ni njiri fø krʉ yenga ddo ro ró, ni ka ni nzinga saba kʉ ná njonjo lo djó nzá ni ngʉ ddikpa lo djolu dhé ro.
Bblo kʉ ná Baba adi riji ndidzá ngba d’ra ndi thí nǎ kʉ ná lo ndi dho. Føri bbai Yova adi riji ko nzinga ndi tso ko thí nǎ ro
6. Sala kʉ Mungu dhó ro si ná kado
Bblo lo ma, chelo ma na dhi saa na ká sala ka ndi li ko kpakpa ngbaribbai? Aninja VIDEO.
Biblia pori, sala ka ndi liri ko jotso koko. Azø Wafilipi 4:6, 7, ndirigoti anitilo i ngadhudha djo:
Nzɨ mai sala adi kodhó kpakpalo sisi ro, ri ká ka ndi kó ko tsotso ngbaribbai?
Ni ká ka ni jiri ni nzinga ngbá lo djo?
Ni ká chu ri ngbà?
Le ripo “amina” nari na mana kʉ “ri di fø” inga “bbʉbbʉ.” Biblia ridho, drrdrr nga djó ro Mungu dzá ndrŭ adi “amina” po sala tso dyani nari goti.—1 Mambo ya Nyakati 16:36.
7. Adi saa ba sala njidha dho
Nja saa na kodhó njí ka ndi é bbo nari ka ndi liri ko vi sala ko nji nari nga vi. Addui ká ridho Yesu njangʉe sala mana na bbo? Azø Matayo 14:23 ndirigoti Marko 1:35, ndirigoti anitilo i ngadhudha djo:
Yesu ká ngʉ rinji ngbǎ nja ndi ba saa sala njidha dho d’e?
Ni ká ka ni ba saa ngbá saa na sala njidha dho?
NJA NDRŬ ADI RIPO: “Sala nzá ka ndi kó le tsotso ro ri.”
Ni ká ka ni poeri ngbǎ?
LO DZÁ DɄNGA
Ko thí nǎ ro si ná sala adi rili ko kana nga ngʉ chøchø Mungu na, ko é ngoi na ndirigoti ri adi kpakpanga bbʉ ko dho nja ko bbʉ hwè Yova thí dho d’e.
Lo djolu le ngʉ nari
Ri ká ngani ko nzinga ie tso?
Ri ká ngani ko nzinga ngbaribbai?
Sala dzá bblonga ká kʉ addu?
NI KA NI CHU NÁ NJA LO
Aneri ni chulo bí kʉ ná ndrŭ adi dhu ndima tso sala djo ná lo djo.
“Mambo 7 Yenye Unapaswa Kujua Juu ya Sala” (Munara wa Mulinzi, 1 Mwezi wa 10, 2010)
Aneri ni chu addudho ma ringani ni njí sala ndirigoti ngbaribbai ma ni ka ni liri nidhó sala é bblo nari.
Anja Biblia ká ripo ko ka ko nzinga ie tso ma nari.
“Je, Ninapaswa Kusali kwa Watakatifu?” (Jw.org djó kʉ ná lo)
I miziki dhi video ridho nari bbai, sala le ka le njí ngbaga ma inga ngbá saa na ma ngbà dhé.