SOMO 21
Hwè lo-i ká a di d’rani ngbaribbai?
Yova si kodhó kpakpalo krʉ sisi karr nga goti ndidhó Pidhinga chulu. Føri kʉ ndrŭ krʉ dho ringani ndima chú ná hwè dhi lo i. Yesu jingʉeri ndi unakpa d’ra fø lo ndrŭ krʉ dho! (Matayo 28:19, 20) Yesu dhó fø yadha dho ká Yova dzá Dimu adi ngarr ngbaribbai?
1. Matayo 24:14 nǎ kʉ ná lo ká njini njʉ ngbaribbai?
Yesu pongʉeri: “I pidhinga dzá hwè lo i si d’rani dz’ djolu gble.” (Matayo 24:14) Yova dzá Dimu e hwè na bbo na mana kʉ ná fø njí ndima nji nari dho. Ko adi hwè lo i d’ra dz’ djolu gble 1 000 djolu da ná luga nǎ. Fø njí dhó lo uri le é kpakpanga na ndirigoti le kpé ndi bblo. Ngadhi Yova dhó ngatsotsokodha ro nzá fø njí ro ka ndi njini ri.
2. Ko ká adi ngbá kpakpanga nji ndiro ko d’ralo ndrŭ dho d’e?
Ko adi lod’ra krʉ ko ba ndrŭ ná nga lu. Karne ya kwanza na, Wakristo ngʉ adi rinji nari bbai, ko adi lod’ra “dzadza lu dzadza lu.” (Matendo 5:42) Fø ko rinji nari rili ko d’ralo mamillioni kʉ ná ndrŭ dho. Ndrŭ nzɨ adi di abba dhé ri ná lo dho, ko adi lo d’ra bí ndrŭ tso njuni ná nga lu maddi. Krʉ chu nǎ ko adi rine ko d’ralo ndrŭ dho Yova djo ndirigoti ke pɨ ná lo djo.
3. Hwè lo-i d’radha dhi njí ká bbʉni ie ma dho?
Hwè lo i le d’ra nja ndrŭ dho ná fø njí bbʉni bbʉbbʉ Wakristo krʉ dhó. Ko adi lod’ra ngbà ri ka ko dho ná ngatsi dhonalo ko churi fø njí ka ndi gø ndrŭ dhó shinga gø. (Azø 1 Timoteo 4:16.) Fø njí nzɨ ko adi nji mbø ró ri, dhonalo Biblia ripo: “Ni ba ri pa ró, anibbʉ ri pa.” (Matayo 10:7, 8) Bí kʉ ná ndrŭ nzɨ adi kodhó lo rr ri. Ro ko adi ra anzi dhé lod’radha dhi njí na dhonalo ko adi ngarr Yova dho ndirigoti fø ko rinji nari na ko adi hwè bbʉ ke thí dho.
ANE LONANGA BBO
Aneri ni chulo bbo Yova dzá Dimu adi nji ná kpakpanga djo nja ndima d’ralo dz’ djolu gble d’e, ndirigoti anja ngbaribbai ma Yova adi ko tsotso kó nari.
Ngø djolu gble lod’rani nari: (A) Kosta Rika, (B) Amerika, (C) Benin, (D) Tailandi, (E) Yape, (F) Suède
4. Ko adi kpakpanga nji ndiro ko ba ndrŭ krʉ d’e
Yova dzá Dimu adi kpakpanga nji bbo pli ndiro ndima d’ra hwè lo i ndrŭ dho krʉ nga lu d’e. Aninja VIDEO, ndirigoti anitilo i ngadhudha djo.
Ni nanga ká ngbá lo adi ke Yova dzá Dimu kpakpanga nji ndima d’ralo nari djo?
Azø Matayo 22:39 ndirigoti Waroma 10:13-15, ndirigoti anitilo i ngadhudha djo:
Kodhó lod’radha dhi njí chulu ká ko adi ridho ngbaribbai ko ji ko lai ndrŭ ji?
Yova ká adi ndi mbu ngbaribbai hwè lo i dʼra ná ndrŭ dhi lo dho?—Anja verse 15.
5. Ko kʉ ddinga njínji Mungu na ná ndrŭ
Bí kʉ ná lo ridho nari kʉ kodhó njí dho Yova chutso ddá. Loroji na, Nouvelle-Zélande nǎ, Paul ró dho kʉ ná le-djo njungʉe ddikpa isɨle na nyumba kwa nyumba ndi ngʉ lod’ra dyina ro. Fø dyí bbʉtso djó le nzingʉe nga Mungu tso, Mungu ró dho Yova na ndi njínji ro ndiro ddikpa le si ndi ronga ro be d’e. Paul pori: “le nzinga nari goti saa dangʉe gbo ro, ma singʉe le bbá dzaitso d’o théi.”
Azø 1 Wakorinto 3:9, ndirigoti anitilo i ngadhudha djo:
Nouvelle-Zélande nǎ njingʉeni ná lo ká ridho ngbaribbai nari kʉ kodhó njí dho Yova chutso ddá ni?
Azø Matendo 1:8, ndirigoti anitilo i ngadhudha djo:
Ká addudho kodhó lo jiri Yova kó ko tsotso ndiro ko njí lod’radha dhi njí d’e?
Ni ká churi ngbà?
Krʉ yenga ddo ró, ko adi formasio ba yenga ddo kana ko adi nji ná njudha na ndiri kó ko tsotso lod’radha dho d’e. Njati rie b’lo ni ro si rie fø njudha dhi ngana ri ró, ni ká addu ddi fø formasio djo?
6. Ko adi ngarr Mungu po le d’ralo ná yadha dho
Karne ya kwanza nǎ, gʉ ngʉ lo gʉ ná kpa ngʉ rine ndima cho Yesu unakpa tso nzɨ kpa d’ralo ró. Anziro ngʉe ná Wakristo tungue ndima kʉ lod’radha dhi haki “na nari nga sheria njí ndima lingʉeri ri chuni nari chulu.” (Wafilipi 1:7) Njʉ ma Yova dzá Dimu adi rinji fø i.a
Azø Matendo 5:27-42, ndirigoti anitilo i ngadhudha djo:
Ko ká ka ko bbá lod’radha dhi njí tso nzá addudho?—Anja verse 29, 38, ndirigoti 39.
NJA LE KA NDI DHURI: “Ká addudho Yova dzá Dimu adi lod’ra ndrŭ bba lu?”
Ni ká ka ni ngʉ fø logoti ngbaribbai?
LO DZÁ DɄNGA
Yesu jangʉeri ndi unakpa dho, kpa d’ra hwè dhi lo i ndrŭ tsɨ krʉ dho. Yova adi ndidzá ndrŭ tsotso kó ndiro ndrŭ nji fø njí d’e.
Lo djolu le ngʉ nari
Hwè lo i ká adi d’rani dz’ djolu gble ngbaribbai?
Kodhó nji ká adi ridho ko ji ko lai ndrŭ ji ngbaribbai?
Ni ká riddi lod’radha dhi njí ka ndi bbʉ hwè ddi? Nde fø ká ni riddi addudho?
NI KA NI CHU NÁ NJA LO
Anja ngbaribbai ma Yova dzá Dimu lod’ra bbobbo bbagʉ lu nari.
Yova dzá Dimu ká adi refije tsotso kó ngbaribbai?
Arr ngbaribbai ma ddikpa le krʉ saa ró ndi lod’ra nari adi bbʉ ndi dho ná hwè d’ra nari.
Aneri ni chu ngbaribbai ma ko bae ushindi njonjo kʉ ná tribinale nǎ nari, føri koe ko tsotso ko rá anzi lod’radha dhi njí na.
“Wahubiri wa Ufalme Wanajitetea Kwenye Tribinali” (Ufalme wa Mungu Unatawala!, sura ya 13)
a Lod’radha dhi njí Mungu bbʉ ko dho. Føri dzá lodho Yova dzá Dimu dho nzá ringani ndima kó rusha dz’ djó bbobbokpa tso ndiro ndima d’ra hwè lo i d’e ri.