SOMO 30
Nidzá ji ni ji ná ndrŭ ka ndima ki si ngʉ shi vi!
Dhe ndrŭ dhe nari adi njedha bbʉ bbo. Fø lo dho Biblia adi dhe nzi mbuba. (1 Wakorinto 15:26) Somo 27 nǎ, ni chueri nari kʉ Yova si fø mbuba sasa. Ro b’lo cheni ná ndrŭ dhó lo ká sie ngbaribbai? I somo nǎ, ni si lochu bbo Yova dhó bblo pli kʉ ná nja tsodha djo: Ke kasi mamilioni kʉ ná ndrŭ ngʉ shi ndima di hwè na cho ró nŭnŭ. Ke kasi kpa gaga! Føri ká ka ndi njini bbʉbbʉ? Kpa ká si ga ndima di ra nǎ inga dz’ djó?
1. Kodhi ji ko ji ná checheni ná ndrŭ dho ká Yova jiri ndi njí addu?
Yova jiri bbo ndi ngʉ checheni ná ndrŭ ki shi. Yobu, udha dhi ddikpa ke ka ri uu ndi dhedhe ró, Mungu nzɨ vi ndi nga ro ri. Ke ka ripo Mungu dho: “Ni kasi ma nzi, ndirigoti ma kasi lo tso uu ni dho [Kabbuli nǎ ro].”—Azø Yobu 14:13-15.
2.Checheni ná ndrŭ ka ndima si gaga nari ká ko chu ngbaribbai?
Yesu ngʉe dz’ djó ná saa na, Mungu bbʉngʉe kpakpanga ke dho ke gá na ndrŭ d’e. Yesu gangʉe cho 12 dhi ddikpa singba ngba ndirigoti ddikpa mujane dzá kpetsi ngba. (Marko 5:41,42; Luka 7:12-15) Føri goti Yesu dzá kau Lazaro dhengʉe dhe. Ro ngba mai, Lazaro le d’øngʉe nari goti ddo dangʉe tho ro, Yesu gangʉe ke ga dhé. B’lo Yesu nzinga Mungu tso nari goti, ke høngʉe bbo ndi chu na kabbuli lai djo: “Lazaro avʉ fø tsi ro!” Ndirigoti “dhe dhengʉe ná fø ke vʉngʉe vʉ,” ke ka ngʉ shi! (Yohana 11:43,44) Anzi ngaddi Lazaro dhó familia ma, kedzá kau ma na ka ndima bae ná hwè djo!
3. Ji ni ji ná checheni ná ndrŭ djo ká ni kʉ ngba ngab’odha na?
Biblia tsoni ɨ: “Gadha sie ni.” (Matendo 24:15) Yesu gangʉe ná fø ndrŭ nzá rangʉe ra na ri. (Yohana 3:13) Ro kpa ngʉe hwè na ndima ga ndima di dz’ djó nari dho. Føri bbai, karr nga goti Yesu si mamilioni kʉ ná ndrŭ ga ndima di hwè na cho ró nŭnŭ paradiso kʉ ná dz’ djó d’e. Ke pongʉeri “no nga Mungu no ná kabbuli nǎ kʉ ná ndrŭ krʉ” si gaga, rie vi nga ma ndrŭ vi ná kabbuli ró, Mungu ró nzá ri nga ro vi ri.—Yohana 5:28, 29.
ANE LONANGA BBO
Aneri ni chu Biblia nǎ ro, addudho ma ko ka ko uri nari kʉ, Yesu kʉ kpakpanga na ndi gá ndrŭ ndirigoti ke si rinji fø nari. Aneri ni chu ngbaribbai ma gadha ka ndi pɨ ni iso ndirigoti ri ka ndi liri ni é ngab’odha na nari.
4. Yesu dhongʉeri ndi ka ndi gá ndrŭ ga
Aneri ni chulo bbo Yesu njingʉe ndidzá kau Lazaro dho ná lo djo. Azø Yohana 11:14, 38-44, ndirigoti anitilo i ngadhudha djo:
Lazaro dhengʉe dhe bbʉbbʉ nari ká ko chu ngbaribbai?—Anja verse 39.
Njati rie ra na Lazaro rangʉe ri ró, ni ká riddi Yesu ka ndi ngʉe ke ki shi vi dz’ djo?
5. Bí kʉ ná ndrŭ si gaga!
Azø Zaburi 37:29, ndirigoti anitilo i ngadhudha djo:
Ga si ga ná mamilioni kʉ ná ndrŭ ká si di ngbaga?
Yesu si ga ná ndrŭ kana bí kʉ nari sie Yova dzá njí dhi ndrŭ. Azø Matendo 24:15, ndirigoti anitilo i ngadhudha djo:
Ni ká ka ni jiri ni si ie nja ga si ga ná ndrŭ kana ro?
Addinga i lo djo: Ndrŭ gadha kʉ sʉsʉ Yesu dho, ddiddi ngba dzá baba ka ndi da ngba ddo nǎ ro nari bbai
6. Gadha ka ndi liri ni iso pɨni pɨ ndirigoti ni é ngab’odha na
Biblia nǎ le tilo Yairo dzá singba ngba dhó lo djo, ná føri pɨngʉe bí kʉ ná ndrŭ iso ndirigoti ri lingʉe njedha na thí kʉ ná ndrŭ kpakpa. Azø fø historia Luka 8:40-42, 49-56 nǎ.
Yairo dzá singba ngba Yesu ga nari njí, ke pongʉeri ngba dzá baba dho: “Nzɨ nji do, adi udha na dhé.” (Anja verse 50.) Gadha dhi ngab’odha ká ka ndi kó ni tsotso ngbaribbai . . .
nidzá ji ni ji ná le dhe ná saa na?
nidhó shinga é hatari nǎ ná saa na?
Aninja VIDEO, ndirigoti anitilo i ngadhudha djo.
Gadha dhi ngab’odha ká pɨngʉe Phelicity dzá gø dhi ndrŭ iso ngbaribbai ndirigoti ri ká lingʉe fø ndrŭ kpakpa ngbaribbai?
NJA NDRŬ ADI RIPO: “Le ripo checheni ná ndrŭ si gaga ná føri kʉ nzá ka ndi njini ná lo.”
Nde ni ká adi riddi ngbà?
Ni ká ka ni njínji ngbá andiko na ndiro ni dho gadha sie nì nari d’e?
LO DZÁ DɄNGA
Biblia ripo mamilioni kʉ ná checheni ná ndrŭ kasi gaga. Yova jiri kpa ki ngʉ shi ndirigoti ke bbʉ kpakpanga Yesu dho ke kasi kpa gaga d’e.
Lo djolu le ngʉ nari
Yova ma, Yesu ma na ká adi ndima mbu ngbaribbai checheni ná ndrŭ si ngʉ shi nari dho?
Ga si ga ná mamilioni kʉ ná ndrŭ ká si di ngbaga, ra nǎ inga dz’ djó? Fø ká ni ripo addudho?
Addui ká rili ni uri nari kʉ nidzá ji ni ji ná checheni ná ndrŭ ki kasi ngʉ shi vi?
NI KA NI CHU NÁ NJA LO
Aneri ni chu ni ka ni nji ná lo ndiro ni hwini ni thí bʉni nari tso ró d’e.
“Musaada kwa Wale Wenye Wamefiwa na Mupedwa Wao” (Amuka! Na. 3 2018)
Biblia nǎ kanuni ká ka ndi kó le tsotso bbʉbbʉ rie dhe ledzá le dhe ri ró?
Nzø ká ka ndima hwini ndima dhi ndrŭ cheni nari tso ró ngbaribbai?
Ndrŭ krʉ ká si ga ndima rá di ra nǎ? Nzɨ si ga nari ká kʉ ie ma?