SOMO 60
Ara anzi Yova ro ni ndrini chøchø nari na
I buku ni jifunza nari chulu ni chulo bbo b’lo Yova djo. Ni chue ná lo lieri ni ji ke bbo ndirigoti njaro ri lieri ni bbʉ ni ke dho ndirigoti ni ba batiso. Rie nzá ma ni d’e rinji fø ri ró, njaro ni riddi ni si rinji karr nga goti. Ro batiso ni ba nari goti ma nzá ddi ringani ni bbá chøchø ni ni ndri Yova ro nari tso ri. Ringani ni ra anzi Yova ro ni ni ndri nari na nidhó maisha krʉ na. Ká ngbaribbai?
1. Ká addudho ringani ni ra anzi kpakpa ni ni kana kau li Yova na nari na?
Ringani ko nji klø bbo nja ko kana kau di kpakpa Yova na d’e. Ká addudho? “Ndiro nzɨ ko klani d’i chu lu” ke ró ro ró. (Waebrania 2:1) Ko tsotso ká addu ka ndi kó ndiro ko ra anzi chi ko tøni Yova dho ko njínji nari kana d’e? Ringani ko ba saa bbo lod’radha dho ndirigoti ko ne nja chu ro maddi ndiro ko njinjí bbo Yova dho d’e. (Azø Wafilipi 3:16.) Yova dho le njínji ná føri kʉ bblo pli kʉ ná lo maisha nǎ!—Zaburi 84:10.
2. Nidho ká ringani ni njí nja ngbá lo ki?
Ngbà mai ni dya i buku chulu ni Biblia nǎ longane nari tso ro, ni nga Mukristo dho ringani ndi di nǎ ná maisha tso go. Biblia ripo kodho ringani ko “thó ø le dha ko ro.” (Waefeso 4:23, 24) Biblia nǎ longanedha na ni di ra anzi ndirigoti ni di si njudha dhi ngana krʉ ddo ro ró, ni si nja ø lo ki chu Yova djo ndirigoti ke kʉ na ná sifa djo. Ane ngbà lu ni ka ni dyø kedhó sifa nidhó maisha nǎ ná chu. Ni di rinja nari kʉ nidhó maisha nǎ kʉ ø thika ni ka ni ø ná lo ro thé ró, adi rinji fø nja ni bbʉ hwè Yova thí dho d’e.
3.Yova ká si ni tsotso ko ngbaribbai ndiro ni ra anzi d’e?
Biblia ripo: “Mungu . . . si nidhó mazoezi tso dya ndi ndiro. Ke si rili ni tøni kprɨ, ke si klø bbʉ ni dho, ke si rili nzɨ ni ronga jaja.” (1 Petro 5:10) Ko krʉ adi bani mbudha na. Ro Yova adi kodhó loji ná kpakpanga bbʉ ko dho ndiro ko tøni kprɨ mbudha tso ró d’e. (Zaburi 139:23, 24) Ke tsoni djo nari kʉ ndi si chi le tøni ro le njínji ndi dho nari dhi ù ma, kpakpanga ma na bbʉ ni dho.—Azø Wafilipi 2:13.
ANE LONANGA BBO
Anja ngbaribbai ma ni ka ni ra anzi maendeleo ni nji nari na, ndirigoti ngbaribbai ma Yova si ni ronga le nari.
4. Adi loti nidzá bblo kʉ ná kau na
Sala ma, Biblia nǎ longa ni ne nari ma na ko ni tsotso nja ni ngʉ Yova dzá kau d’e. Nde ni ká ka ni njiri ngbǎ ndiro fø lo kó ni tsotso ndiro ni kana nga ngʉ Yova na chøchø pli d’e?
Azø Zaburi 62:8, ndirigoti anitilo i ngadhudha djo:
Ndiro ni kana kau ngʉ kpakpa Yova na d’e, ni ká ka ni liri nidhó sala é bblo ngbaribbai?
Azø Zaburi 1:2 ndirigoti maelezo ya chini, ndirigoti anitilo i ngadhudha djo:
Ndiro ni kana kau ngʉ kpakpa Yova na d’e, ni ká ka ni njiri ngbǎ nja ni ba faida Biblia ni zø nari nǎ ro d’e.
Ni ká ka ni njí addu ndiro ni ba faida bbo ddiro ni Biblia nǎ longane nari nǎ ro d’e? Ndiro ni ba nja lo ki d’e, aninja VIDEO, ndirigoti anitilo i ngadhudha djo.
Video nǎ le dho ná lo kana ro ká ni ka ni jiri ni njinjí ngbá ri na?
Ni ká ka ni jiri ni chulo bbo ngbá lo djo?
5. Ali kiroho nǎ muradi ni nji
Muradi ni li ni nji Yova dzá njí kana nari ka ndi kó ni tsotso ni njí maendeleo. Aninja VIDEO, ndirigoti anitilo i ngadhudha djo.
Video nǎ ni njari nari bbai, Cameron ká bae ngbá faida kiroho nǎ muradi ndi lie ndi nji nari dho?
Ri nga kʉ krʉ ndrŭ i ka ndima rá lod’ra d’i eneo na ri. Ro, ko krʉ ka ko li ngbà ka ndi ka ko dho ná muradi ko nji. Azø Mezali 21:5, ndirigoti anja ngbá muradi ma ni ka ni li ni nji . . .
kutaniko nǎ nari.
lod’radha dhi njí kana nari.
Fø verse nǎ kʉ ná kanuni ká ka ndi kó ni tsotso ngbaribbai nja ni tso si kpø nidhó muradi djo d’e?
Ni ka ni li ni nji ná muradi
Anjiri nidhó sala é bblo pli.
Azø Biblia lú.
Anjiri ni chu nidhó kutaniko nǎ ndrŭ krʉ.
Anjiri ni nga funzo tso ndrŭ na ndirigoti aongoza ri.
Anjiri ni é painia musaidizi inga painia wa kawaida.
Njati ni é le-djo ró, anjiri ni ngʉ mutumishi wa huduma.
6. Anji maisha hwè theinga dho!
Azø Zaburi 22:26, ndirigoti anitilo i ngadhudha djo:
Ni ká ka ni njí addu ndiro ni njí maisha hwè kpadjo ndirigoti theinga dho d’e?
LO DZÁ DɄNGA
Ara anzi kpakpa ni ni kana kau li Yova na ndirigoti kiroho nǎ muradi ni li ni nji nari na. Fø ni njí ri ró, ni ka ni njí maisha hwè theinga dho!
Lo djolu le ngʉ nari
Ká addudho ni ka ni uri u nari kʉ Yova si ni tsotso ko nì nja ni njinjí ndi dho chi ni tøni ro d’e?
Ni ká ka ni liri ni kana kau é Yova na kpakpa ngbaribbai?
Kiroho nǎ muradi ni li ni nji nari ká ka ndi kó ni tsotso ngbaribbai ndiro ni njí maendeleo d’e?
NI KA NI CHU NÁ NJA LO
Bbo na mana kʉ Yova nyǒ djó nari ká kʉ ké dho ndrŭ nanga ka ndi keni ná lo ko nji nari inga chi ko tøni ke dho kodhó maisha nǎ nari?
Chi tøni Yova dho ná le ma ka ndi vi ndidhó hwè ddi. Anja ngbaribbai ma le ka le ba ri ki vi nari.
Aba hwè ki vi Biblia ni zø ndirigoti ri nǎ longa ni ddi nari chulu (5:25)
Muradi ká ni ka ni li ni nji ndirigoti ni tso si kpø ri djo ngbaribbai?
“Ujiwekee Miradi ya Kiroho Juu ya Kutukuza Muumbaji Wako” (Munara wa Mulinzi, 15 Mwezi wa 7, 2004)
Ká addudho ri kʉ bblo Mukristo dhidhi kiroho nǎ, ndirigoti ni ká ka ni njiri ngbǎ ndiro ni tso si kpø fø ga d’e?
“Ujikaze Kukomala Kiroho Juu ‘Siku Kubwa ya Yehova Iko (Munara wa Mulinzi, 15 Mwezi wa 5, 2009)