1922 Cho Da 100 B’lo

“BBO LØNGɄE NDRŬ THÍ RONGA NÁ DDIKPA LO”

Ddiddi lod’radha dhi njí ngʉ ra anzi nari bbai, ri ungʉeri vichapo é bí. Brooklyn nǎ Beteli nǎ le-djoi ngangʉe magazeti ndima pʉ nari tso, ro kpa ngʉ adi ndima tsotsokodha ne bbakomersa dhó izine nǎ ro ndiro ndima ba kpakpa kʉ ná d’ø ri chuti d’e. Bí kʉ ná bi kana, fø izine nzɨ ngʉ adi buku ro chapisha ngbà ka ná ngatsi lod’radha dho ri, ndirigoti Le-djo Rutherford nzingʉeri fø izine nǎ ngʉ njínji ná le-djo Robert Martin tsó, ri ká ka nzá ndima chapisha ndima dhó buku ndima ndima ro.

Le-djo Martin pongʉeri “følo løngʉe ndrŭ thí ronga bbo dhonalo ri ka ndi lieri le kló ø izine tso ndiro le di buku chapisha d’e.” Le-djoi dzingʉe dza tso Brooklyn nǎ Concord nǎ 18 le nzǐ ná chutso (18 ème rue) ro ndirigoti kpa bangʉe njí dhi no ba.

Le-djoi nanga jingʉeni bbo ndima si buku chapisha ndima ndima ro nari dho. Anziro le ngʉ kodhó buku chapisha ná ngana prezida singʉe vizite nji ø ko dzingʉe dza tso ná fø ngana ro, ke pongʉeri: “Nidhó buku ni chapisha na ná njí dhi no thonga bbo, ro ddikpa le ma nzá ddi chu njínjidha ro ri na ri. Bi aza (6) kana, nidhó njí dhi no si sani krʉ.”

Le-djo Martin pongʉeri, “Føri ngʉ njani bbʉbbʉ kʉ ná lo bbai, ro ko chungʉeri nari kʉ Yova ka ndi kó ko tsotso ngbà ndirigoti ke kongʉe ko tsotso ko.” Le-djo Martin pongʉe ná føri ngʉe bbʉbbʉlo. Karrnga goti, ko ngangʉe 2 000 ko buku chapisha krʉ ddo ró nari tso.

MAELFU KɄ NÁ NDRŬ TSOTSO KONGɄENI RADIO CHULU

Buku kpa chapisha nari kina, Yova dzá ndrŭ ngangʉe hwè lo-i ndima d’ra nari tso radio chulu. Le-djo Rutherford tingʉe lo radio nǎ ya kwanza ddikpa cha yenga dyi saa sita goti, bi 2 ddo 26, 1922 nǎ. États-Unis nǎ, Los Angeles nǎ, Californie nǎ, ke bbʉngʉe radio KOG nǎ ná hotuba djǒ pongʉeri ɨ “Kpadjo kʉ mamilioni ná ndrŭ ki ro nzɨ si cheni ri” (Anglais).

Fø progamu rrngʉe ná ndrŭ ngʉe chøchø 25 000. Fø ndrŭ kana nja ndrŭ pongʉe mbai barua chulu Le-djo Rutherford dho. Fø barua kana ddikpa barua singʉe Willard Ashford dhó ro, Californie nǎ Santa Ana nǎ ndi ngʉ di ro. Ke pongʉe mbai bbo Le-djo Rutherford dho “bbo thonga ná fø lo” ndi tingʉe nari dho. Ke pongʉeri ki: “Njati ni løe afø chu nzá ró, ko nzá ka ko rr e nidhó hotuba ro ri, ri dae chøchø ma ko kuso ró, dhonalo ma bbá kʉ nzɨ adi vʉ abba ro dhe dzá lo dho ná ndrŭ gbo (3).”

Bí kʉ ná nja lo ndrŭ rrngʉe føri goti singʉe ná yenga kana. Fø cho dzá mwisho na, Dzamu dhi Munara pongʉeri nari kʉ “[radio] chulu [rrngʉe] lo ná ndrŭ ngʉe chøchø 300 000.”

Kpakpa ka ndi li le ná fø lo ndima rr ro, Wanafunzi wa Biblia vʉngʉeri ndima chi radio dhi nga Staten Island na, chøchø kʉ Brooklyn nǎ Beteli nǎ ro ná ngana. Føri goti si ná cho nǎ, Wanafunzi wa Biblia ka ndima njie njí radio WBBR na, ndiro ndima d’ra Pidhinga dzá hwè lo-i njonjo nga lú bí kʉ ná ndrŭ dho d’e.

“ADV”

Bi 6 ddo 15, 1922 nǎ ngʉe ná Dzamu dhi Munara d’rangʉeri nari kʉ, Bi 9 ddo 5 djó ro kpø 13 djo 1922 nǎ, ddikpa asamble si da Ohio nǎ Cedar Point nǎ. Wanafunzi wa Biblia singʉe Cedar Point na ná saa na, kpa nanga jingʉeni bbo.

Ndidhó ya kwanza hotuba nǎ Le-djo Rutherford pongʉeri lo ngʉ rr ná ndrŭ dho: “Ma churi chu nari kʉ Bboke si . . . i asamble ronga lele ndirigoti lo si d’rani bbo pli nzá ri ro d’erie njini dz’ djó nari bbai.” Fø asamble nǎ ngʉ hotuba bbʉ ná kpa lingʉe le-djoi ma, le-vei ma na kpakpa ndiro ndima d’ra hwè dhi lo-i d’e.

Føri goti, Bi 9 ddo 8 na, chøchø 8 000 kʉ ná ndrŭ njungʉe ndima tso, nja ndima rr Le-djo Rutherford ngʉ bbʉ ná hotuba d’e. Bbo hwè na ndrŭ ngʉ rib’o ndima chú evitasio djó le ndingʉe ná “ADV” na mana. Gʉna ndrŭ dingʉe ná saa na, nja kʉ ná ndrŭ njangʉe nga le ndi djó ná kunanga le ku ná ritsi estrade djotsi nǎ le chi ndi ro. États-Unis nǎ Tulsa nǎ, Oklahoma dhi bbagʉ ro singʉe asamble dho ná ke Arthur Claus dingʉe bblo nǎ ro ndi ka ndi rr lo ná ngana. Fø ga ro ke ka ndi rr e hotuba ngʉ bbʉ ná kpa chu bblo dhonalo micro ro nga ngʉeri.

Ndiro nzɨ fø ga da ná lonanga d’ini ró, prezida ngʉ adi ripo, retar sí ná ddikpa le dho ma nzá ddi ringani ndi tsu adza Le-djo Rutherford dhó hotuba dhi saa na ri. Bbʉtso saa tatu na nusu na, Le-djo Rutherford ngʉ adi ndidhó lo tso nga Yesu pongʉe Matayo 4:17 nǎ ná ɨ lo na: “Ra nǎ pidhinga kʉ le thó thí.” (King James Version) Ke ngʉ loti ngbaribbai ma ndrŭ ka ndima rr Pidhinga nari djo ná saa na, ke ngangʉe lo tso ɨ: “Yesu pongʉeri ndidhó sidha dhi saa na ndi si chutso dda ndidzá ndrŭ dho nyo tso njudha dho, fø saa na ndi si bbʉbbʉ kʉ ná ndrŭ ma, chi kʉ ná ndrŭ ma na tso nju.”

Le-djo Claus pongʉeri ɨ: “Ko ngʉ krʉ lo rr li ko li ko thí ro.” Ro, chʉ dhe kongʉe ke ndirigoti ke rangʉe ra fø ga ro. Ngbà mai Arthur rangʉe ra fø ga ro ro, ke nzá jingʉe ndi rá ri dhonalo ke chungʉeri ndi ki ro nzɨ si tsu ri, rie go Le-djo Rutherford hotuba bbʉ ró.

Sese nga goti ke rrngʉe ndi bblo. Ke pori, bbaidjo lú ndi ngʉ bbí ná saa na, ndi rrngʉe ndrŭ thó ndrŭ b’i nari. Føri løngʉe ke ronga bbo! Ke vʉngʉeri ndi dji dza djo nja ndi rr fø bbo d’ani ná fø hotuba dzá nja sehemu gʉ d’e. Le-djo Claus, dhó cho ngʉe 23 fø saa na, ro ke mbungʉeri ndi dji dzaikpa ro lu dza djo. Dza djotsi nǎ ngʉe ná madirisha tso ngʉe wazi, ná føri dho ke pongʉeri, “ndi rrngʉe fø ga da ná lo bblo.”

Ro Arthur nga ngʉe ddiro ri. Ke lai nja kʉ ná bbakau ma djingʉe ddi dza djo. Kpa kana ddike, Frank Johnson singʉe ke dhi ngana lele ndirigoti ke dhungʉeri ke tsó, “Ni dhó ká kʉ kpʉ (mufuko) nǎ le adi d’u ná ja ku le ja ná dyʉ ddi?”

Arthur ungʉeri tso “ddio.”

Frank ngʉngʉe logoti “Ni chulu kodhó sala goti ngʉngʉ. Ni ká nja kú nanga le ku ná i papie ddi? Fø papie djó kʉ alama. Anirr juji po ná lo bblo.a Ke si ripo ‘nidho ringani ni d’ralo, ni d’ralo’ ná saa na, nidho ringani ni krr fø papie tso le chi na ná mbi nanga krr.”

Arthur ngʉe dyʉ na ndi thó thi ndirigoti ke ma, nja ndrŭ ma na ngʉ ri b’o le bbʉ signale ndima dho. Dhonalo le-djo Rutherford tso singʉe chøchø ndidhó hotuba nǎ bbo na mana kʉ ná sehemu djó, føri ngʉe mbi nanga le si krr ná saa. Le-djo Rutherford ngʉe hwè na ndirigoti bidii na bbo ndirigoti ndrŭ njingʉe makelele ɨ ke pongʉeri ná saa na: “Anitøni chi ndirigoti ni é Bboke dzá bbʉbbʉ kʉ ná Dimu. Anira anzi là ni nji nari na kpø kali dhi dini si sadha ba ná nga djo. Anid’ralo krʉ kʉ ná nga lú. Ringani dz’ churi nari kʉ Yova kʉ Mungu ndirigoti Yesu Kristo kʉ pikpa djó Pi ndirigoti bbobbokpa djó Bboke. I ri kʉ, bbo na mana kʉ historia nǎ ná saa. Aninjari, Pi nga pinyodha tso b’lo! Nidhó njí bbʉni ni d’ra fø lo krʉ kʉ ná ndrŭ dho. Føri dho, anid’ra, anid’ra, anid’ra, Pi ma, ndidhó Pidhinga ma na!”

Arthur pori, ndima krr ngʉe fø mbi nanga ndi lai kpa ma na ndirigoti kú nanga le ku ná papie wengʉe ndi nanga. “‘ADV’, ngʉe Anglais nǎ i lo nǎ ro le tu ná lo: ‘Advertise’, ná fø lo nǎ mana kʉ ‘lo le d’ra nari’.”

BBO NA MANA KɄ NÁ NJÍ

Cedar Point nǎ da ná asamble kongʉe le-djoi tsotso ndima li ndima thí bbo na mana kʉ ná njí djo, føri kʉ Pidhinga le d’ra nari, ndirigoti ngbà nanga jini ná ndrŭ ngʉe hwè na fø njínjidha dho. États-Unis nǎ Oklahoma nǎ ro, ddikpa colporteur (painia) ndingʉeri ɨ: “Ko ngʉ adi lod’ra ná eneo nǎ ndrŭ ngʉ adi njínji sharbo na, ndirigoti ndrŭ ngʉe njedha.” Ke pongʉeri, bí ina ko ngʉ adi lod’ra ndrŭ dho L’Âge d’Or nǎ ro. “Ndrŭ nyǒ-dda ngʉ adi [sisi] nganga” fø lo ndima rr ró. Ke pongʉeri ki, “Ko nanga ngʉ adi jini bbo dhonalo fø lo na ko ngʉ adi ndrŭ iso pɨpɨ.”

Wanafunzi wa Biblia chungʉeri nari kʉ, Yesu po Luka 10:2 nǎ ná ɨ lo kʉ bbo na mana kʉ ná lo: “Nyo tso njudha dhi njí kʉ bbo, ro njí dhi ndrŭ kʉ nga bí.” Ddiddi cho ra nari bbai, kpa vʉngʉeri ndima d’ra Pidhinga dhi lo dada nga lu ndirigoti dz’ djolu gble.