Ngbaribbai ma ko ka ko si ko nanga rɨni nari djolu nari

1-2. (a) Yova dzá njí dhi ndrŭ nanga ká adi rɨni ngbá lo ro djo mai? (b) I lo nǎ ká ko si loti addu djo?

NDRŬ krʉ nanga ro adi rɨni a ddikpa saa djo nì dhé. Loroji na, ddikpa jadda muhubiri nanga ka ndi di rɨni Yova ká ndi dyu li nì ndi ro nari djo. Njaro føri djotsina nzá ke ka ndi jiri ndi ba batiso ri. Inga addinga djo nari kʉ, ddikpa le-djo vʉngʉeri ndi li Pidhinga anziro ndidhó maisha nǎ jadda ndi ngʉe ro, ndi vʉeri ndi ne mbø bbo nari rɨngana. Ro, kpadjo ke ngʉ ngó ndirigoti ke mbø ba ndidhó familia dhó lo tso ka ndi gba ná ngatsi dhé. Njaro føri dho ke ka ndi di ridhu ndi tsó ndi ká vʉngʉe lo nanga bblo i ngbà jadda ndi ngʉe ro. Inga addinga nga ró klø kʉ ná ngó ngʉ ná le-ve djo. Njaro le thí bʉni anziro ndi ngʉ nji ná lo ka ndi njini ndi dho nzá nari dho. Ni ká dhurie i lo ro b’lo ni tso: ‘Yova ká ma nja bbʉbbʉ? Ma jʉngʉe ma tso ndiro ma njinjí Yova dho d’e nari ká ke adi nja mana na i nì? Ma ká ka ma njí nja ritsi ro ngbà dhé Yova dho?’

² Njati rie nzɨ ko rine ko ba fø ngadhudha goti ró, kodhó udha ka ndi djødjø ndirigoti njaro ko ka ko bbá Yova dho ko njínji nari tso ma bbá ddi. I lo nǎ ko si nja nari kʉ ngbaribbai ma Biblia nǎ kanuni ka ndi kó ko tsotso njati ko nanga di rɨni (1) Yova adi ndi dyu li ko ro nari ma, (2) anziro ko vʉngʉe nanga ná lo ma, (3) ko ká ka ko njí ritsi ki ro ngbà Yova dho nari ma na djo ró.

NGBARIBBAI MA NI KA NI SI NI NANGA RƗNI NARI DJOLU NARI

3. Ko nanga rɨni nari djolu ká ko ka ko si ddikpa ngbá chu nǎ?

³ Ko nanga rɨni nari djolu ko ka ko si ná ddikpa chu kʉ, Mungu dzá lo ko zø ndiro ko ba kodhó ngadhudha goti d’e nari. Njati ko njiri fø ró, kodhó udha ma, ko kana kau ma na si ngʉ kpakpa Yova na ndirigoti ri si kaka ko “tøni kprɨ udha kana.”​—1 Ko. 16:13.

4. Ko ká adi “krʉ kʉ ná lo nanga ne” ngbaribbai? (1 Watesalonike 5:21)

⁴ Azø 1 Watesalonike 5:21. Anonga nari kʉ Biblia rid’ra ko “ne krʉ kʉ ná lo nanga.” Føri ká ko ka ko njí ngbaribbai? Njati rie nzá ko chu ddikpa lo dzá d’ʉnga ri ró, ringani ko né Biblia po fø lo djo ná lo. Loroji na, addinga Yova ká adi ndi dyu li ndi ro nì, nari djo nanga e rɨni ná jadda ke djo. Ri ká ngani ke bbá fø ngadhudha nzá ndi ba ri dhi jibu ro? Nzá, ringani ke “ne krʉ kʉ ná lo nanga” Yova dhó ngaddidha ndi ne fø lo djo nari chulu.

5. Ko ká ka ko ba Yova dhó jibu kodhó ngadhudha dho ngbaribbai?

⁵ Biblia ko zø ná føri e Yova loti ko dho nari bbai. Ro, ko jiri ko ba kodhó ngadhudha dhi jibu ró, ringani ko njí nja lo ki maddi. Ringani ko ba ndirigoti ko zø ngbà ka ndi ngʉ kodhó ngadhudha goti ná maandiko. Ko ka ko njí utafiti fø lo djo Yova dhó tengenezo bbʉ ko dho ná vichapo lu. (Mez. 2:3-6) Ringani ko nziri Yova kó ko tsotso ndiro ko ba kodhó ngadhudha dhi jibu d’e. Føri goti ko ka ko ne Biblia nǎ kanuni ma, ngbà ka ndi kó ko tsotso ko bani na ná lo kana ná lo ma na. Føri kina, kodhó kpakpalo bbai di ná lo na bangʉeni ná ndrŭ dhó loroji djo ko lo zø Biblia nǎ ro nari maddi ka ndi kó ko tsotso bbo.

6. Njudha ká adi ko tsotso kó ko si ko nanga rɨni nari djolu ngbaribbai?

⁶ Biblia ko jifunza njudha dhi ngana ná føri e Yova loti ko dho nari bbai. Njati rie krʉ ddo ró ko si njudha dhi ngana ró, ko ka ko rr ddikpa hotuba inga komatere nari ka ndi ngʉ ko e dhu ko tso ná lo goti nganga. (Mez. 27:17) Kpadjo akonja addu ma ka ndi kó ko tsotso ko ba kodhó ngadhudha goti d’e nari di.

NI NANGA DI RƗNI RƗ YOVA NDI DYU LI NI RO NARI DJO RÓ NI KA NI NJÍ NÁ LO

7. Nja ndrŭ ká ka ndima dhu ngbá lo ndima tso?

⁷ Ni ká dhurie ri ro ni tso b’lo, ‘Yova ká adi ndi dyu li ma ro nì?’ Njati ni di ni nja nga nǎ mana kʉ ri ró, ni ka ni di riddi ni ro nzá ka ni ngʉ ngano ná Ke dzá kau ri. Njaro Pi Daudi ma ngʉ riddi føi. Ke ddingʉeri Yova ndi dyu li ndrŭ ro ná føri kʉ ké ka ndi ke le nanga ná lo. Føri dho ke dhungʉeri ɨ: “Ee Yova, ndrŭ ká kʉ addu ndiro ni ddinga ndi djo d’e, dhe ka ndi dhe ná ke ddù ndiro ni li ni dyu ndi ro d’e?” (Zb. 144:3) Fø ngadhudha goti ká ni ka ni ba ngbaga ro?

8. Ddiddi 1 Samweli 16:6, 7, 10-12 ridho nari bbai, Yova ká adi addu nja ndrŭ thí nǎ?

⁸ Biblia pori Yova adi ndi dyu lili pá nja ndrŭ bé ná ndrŭ ro. Loroji na, Yese bba Yova chongʉe Samweli ndi rá ke ddui kana ddike d’ri ché na ndiro ke si ngʉ Israeli nǎ Pi d’e. Yese nzingʉe ndi ddui ro sabba dhé 8 ngʉe ná kpa kana ro nja ndima nju Samweli na d’e, ro ke nzá nzingʉe ndidzá ya mwisho ke Daudi ro ri.b Føro mai, Yova vʉngʉe Daudi dhé. (Azø 1 Samweli 16:6, 7, 10-12.) Yova njangʉe Daudi thí nǎ kʉ ná lo. Yova chungʉe fø jadda ke ji ndi bbo nari chu.

9. Yova adi ndi dyu lili ni ro nari ká ni ka ni uu addudho? (Anja ji maddi.)

⁹ Addinga Yova adi ndi dyu li ni ro nì nari dhǒ ná lo ro djo. Ke adi nidhó lo u ná shauri nganga bbʉ ni dho. (Zb. 32:8) Rie nzá Yova churie ni ri ró, ká ke ka ndi njí føri ngbǎ? (Zb. 139:1) Njati ni di njínji Yova bbʉ ni dho ná shauri na ndirigoti ni di ngbaribbai ma ri ni tsotso kó nari nja ró, ni si ri uu nari kʉ Yova adi ndi dyu lili ni ro. (1 Ny. 28:9; Mdo. 17:26, 27) Yova adi ni nji ndi madha dho ná kpakpanga njanja. Yova adi nidhó bblo sifa nja, ná føri dho ke adi riji ndi ngʉ nidzá kau. (Yer. 17:10) Ndirigoti ke nanga si jini bbo ni jiri ni ngʉ ndidzá kau ró.​—1 Yo. 4:19.

NJATI NI NANGA DI RƗNI RƗ ANZIRO NI VɄE NANGA NÁ LO DJO RÓ, NI KA NI NJÍ NÁ LO

10. Njati ko di ngaddi anziro ko vʉngʉe nanga ná lo djo ró, ká ngbà ngadhudha ka ndi si ko djǒ na?

¹⁰ Nja saa djo, nja ndrŭ di ngaddi anziro ndima vʉngʉe nanga ná lo djo ró, kpa ka ndima ddiri ndima nzá vʉngʉe lonanga bblo ri. Njaro kpa bbangʉe bbo nǎ mbø kʉ ná njí inga kpa vʉngʉeri nzɨ ndima nga nja turusa tso ndiro ndima njinjí bbo Yova dho d’e. Ro, njaro føri kpa nji ná nga djó ro cho da bí b’lo. Kpa ka ndima di ndima lai kimwili nǎ njí ndima ngʉ nji na ná ndrŭ nja njʉ bbo mbø kʉ ndima dhó ro ndirigoti bblo ndima dhó maisha kʉ ro. Ná føri ka ndi liri kpa di ridhu ndima tso: ‘Ma vʉngʉeri ma njinjí Yova dho ná føri ká ngʉe bblo i nì? Ri ká nzá ngangʉeni ma njinjí bbo ndiro madhó mbø é bbo njʉ d’e ri?’

11. Zaburi 73 ndi ná ke thí ká ngbá lo bʉngʉe?

¹¹ Rie føri bbai di ná lo ni adi dhu ni tso ri ró, anja Zaburi 73 ndi ná ke djo Biblia po ná lo di. Ke ngʉ nzɨ njínji Yova dho ná ndrŭ nja bblo dhó afya kʉ ri, mali dhi ri, ndirigoti ngadhó kpakpalo ro kʉ nari bbai. (Zb. 73:3-5, 12) Ke ngʉ fø ndrŭ dhó maisha nja bblo pli kʉ nari bbai, ná føri dho ke ddingʉeri Yova dho ndi njínji nari nga kʉ bblo ndi vʉ lonanga ri. Che kʉ ná fø ngaddidha ngʉ adi rili ke “thí bʉni bʉ krʉ ddo ró.” (Zb. 73:13, 14) Che kʉ ná fø ngaddidha djolu ká ke singʉe ngbaribbai?

12. Zaburi 73:16-18 ndi ná ke ká singʉe che kʉ ná fø ngaddidha djolu ngbaribbai?

¹² Azø Zaburi 73:16-18. Zaburi ndi ná ke ngʉ adi ra Yova ma takatifu kʉ ná ngana. Fø ngana i ke ngʉ adi ngaddi bblo. Ke rangʉeri famu nari kʉ nja ndrŭ dhó maisha di njani bblo kʉ nari bbai ma ró, kpa ro nga kʉ ngab’odha na gosi ná saa djo ri. Fø ngaddidha ngʉ adi rili ke é ngoi na ndirigoti ke uri u nari kʉ Yova ndi li anziro ná føri kʉ bblo pli kʉ ná longavʉdha. Ndirigoti ke vʉngʉeri ndi ra anzi Yova dho ndi njínji nari na.​—Zb. 73:23-28.

13. Ni ká ka ni njiri ngbǎ anziro ni vʉngʉe nanga ná lo di ni nanga d’od’o ró? (Anja ji maddi.)

¹³ Zaburi ndi ná ke njingʉeri nari bbai, ni ma ka ni si ddi che kʉ ná fø ngaddidha djolu. Ká ngbaribbai? Addinga b’lo ni ba ná bblo ritsi djo, føri tsu ndi nǎ Yova na ni tso uni nari ndirigoti anonga nari kʉ nzɨ njínji ke dho ná ndrŭ djó ngae fø ledha ro ri. Bbo nǎ mana e kpa dho nari kʉ, ndima dhó é bblo njí inga ndima dhó maisha é bblo nari dhonalo kpa ro ngae ngab’odha na ri. Ro, bí kʉ ná bblo kado Yova bbʉ ni dho njʉ nari kina, ke tsoni ndi si bí kʉ ná bblo pli kʉ ná ritsi bbʉ ni dho cho ró nŭnŭ. (Zb. 145:16) Godhé, addinga i lo djo: Njati ni vʉeri ni njinjí Yova dho nzá ró, ká nidhó maisha ka ndi ée njʉ ngbaribbai nari ro nzá ni chu d’ʉ ri. Ro, bbʉbbʉlo kʉ ena: Mungu ma, nja ndrŭ ma na ndima ji nari ró ro lonanga vʉ ná ndrŭ nzɨ adi bblo ritsi ro kosa ri.

NI NANGA DI RƗNI RƗ NI KÁ KA NI NJÍ RITSI YOVA DHO NGBÁ MA NARI DJO RÓ, NI KA NI NJÍ NÁ LO

14. Nja ndrŭ ká adi bani ngbá lo na ndirigoti kpa ká adi ngbá lo dhu dima tso?

¹⁴ Yova dzá ndrŭ kana nja ndrŭ nzá ka ndima njinjí bbo ke dho ndima jie ná ngatsi ri, njaro ri kʉ kpa ngʉ ngó, kpa dhe nji inga kpa tsutsu nari dho. Føri djotsina kpa ka ndima di riddi ndima nǎ mana nga kʉ Yova nyǒ djó ri. Kpa ka ndima di ridhu ndima tso, ‘Ma ká kʉ mana na Yova nyǒ djó go i nì?’

15. Zaburi 71 ndi ná ke ká ungʉe ngbá lo u?

¹⁵ Zaburi 71 ndi ná ke ngʉ adi ndi mbu føri bbai. Ke nzingʉeri: “Nzɨ bba ma si ma ró klø sini ná saa djo.” (Zb. 71:9, 18) Føro mai, Zaburi ndi ná ke ungʉeri u nari kʉ, njati ndi njinjí Mungu dho chi ndi tøni ro ró, Yova ka ndi ddá chutso ndi dho ndirigoti ke ka ndi kó ndi tsotso ko. Zaburi ndi ná ke chungʉeri nari kʉ, nì mai ndima bani kpakpalo na ro njínji Yova dho ndima thí nǎ ro krʉ ná ndrŭ adi hwè bbʉ ke dho.​—Zb. 37:23-25.

16. Ngó ngʉ ná ndrŭ nǎ mana ká e bbo Yova dho ngbá chu nǎ? (Zaburi 92:12-15)

¹⁶ Njati rie ngó ni kʉ ró, adi ni nja Yova adi ni nja nari bbai. Ke ka ndi kó ni tsotso ni njinjí ndi dho chi ni tøni ro, nì mai ni bani kpakpalo na ro. (Azø Zaburi 92:12-15.) Nzá ni ka ni njí ná lo djo ni die ngaddi nari rɨngana, ali ni thí ngbà ni ka ni njí ná lo djo. Loroji na, ni ka ni li nja ndrŭ kpakpa chi ni tøni nari ma, nja ndrŭ ro ni ni dyu li nari ma na chulu. Ni ka ni d’ra ngbaribbai ma Yova ko ni tsotso cho bí kana nari ma, Biblia nǎ ngbá tsodha ma ni adi b’o bbò ù na nari ma na nja ndrŭ dho. Ndirigoti nzɨ vi nja ndrŭ dho ni nji ná sala ka ndi kó nga tsotso bbo nari nga. (1 Pe. 3:12) Rie ngbá kpakpalo na ma ko bani ri ró, ko krʉ ka ko njí ritsi ro ngbà dhé Yova ma, nja ndrŭ ma na dho.

17. Ri ká ngani nzɨ ko di ko ddi nja ndrŭ na addudho?

¹⁷ Njati ni di ni mbu nzá ka ndi njí ritsi bbo Yova dzá njí kana nari bbai ró, auri u nari kʉ ni ka ni njí ná ritsi krʉ nǎ mana e bbo ke dho. Njaro ni ka ni di rimbu ni ddi ni nji ná ritsi nja ndrŭ nji ná ri na. Ro, nzɨ njiri fø! Ká addudho? Dhonalo Yova nzɨ adi ni ddi nja ndrŭ na ri. (Gal. 6:4) Loroji na, Maria bbʉngʉe bbo ró dzi kʉ ndirigoti djú ngø ná ché kado Yesu dho. (Yoh. 12:3-5) Føri ró ro njonjo, njedha ngʉe ná dhe bbá ke dhengʉe ná isɨle bbʉngʉe sese dzá valere kʉ ná mbø-kpa aro bbʉdha hekalu na. (Lu. 21:1-4) Ro, Yesu nzá ddingʉe fø le dhó bbʉdha Maria dhó ri na ri. Føri ró ro njonjo aro fø isɨ ndrŭ krʉ dhongʉe ndima dhó udha bbʉdha ndima bbʉ nari chulu. Yesu adi ndidzá Baba dyø kaka nari bbai. Føri dho ni ka ni uri u nari kʉ, jidha ma, udha ma na djotsina ni nji Yova dho ná ritsi krʉ ke adi nja mana na bbo, njati ni di ridya nga ma ri nǎ mana kʉ ri ró.

18. Addui ká ka ndi kó ko tsotso ndiro ko si ko nanga rɨni nari djolu d’e? (Anja kisanduku maddi “Yova dzá lo ka ndi kó ni tsotso ko nja ni si ni nanga rɨni nari djolu d’e.”)

¹⁸ Ko krʉ nanga ro adi rɨni nì dhé nja saa djo. Ro, b’lo ko nja nari bbai Biblia ka ndi kó ko tsotso ko nja ko si ri djolu d’e. Føri dzá lo dho, anji ni dho ka ná lo krʉ ni ba nidhó ngadhudha goti d’e ndirigoti ni nanga ri die d’od’o nari rɨngana ni si ni chu ná lo uu. Bbʉbbʉ dhé, Yova churie ni bblo pli. Ke nanga adi jini bbo ni vʉri ni li ndi anziro nidhó maisha nǎ nari dho ndirigoti ke si ni ronga lele ndi tsoni ri djo nari bbai. Auri u nari kʉ, chi ndima tøni ro njínji ndi dho ná ndrŭ Yova jirie ji ndirigoti ke adi ndi dyu lili kpa ro.