Ako hwè lo-i dho nanga jini ná ndrŭ tsotso

1. Ndrŭ ká adi njini ngbaribbai lo ko d’ra ndima dho ná saa na? (Matendo 13:47, 48; 16:14, 15)

KARNE ya kwanza na bí kʉ ná ndrŭ ungʉe bbʉbbʉlo, Kristo djo kpa rrngʉe lo ná saa na thei. (Azø Matendo 13:47, 48; 16:14, 15.) Føri bbai, njʉ maddi nja ndrŭ nanga adi jini hwè lo-i ndima rr ná saa na thei. Nja ndrŭ nanga nzɨ adi jini hwè lo-i dho thei ri, ro luti kpa adi ji ndima chu lo Mungu djo ndirigoti ndima bbʉ madha ke dho. Ko ba “bblo dhó nganjadha kʉ ná ndrŭ” lo ko d’ra ná saa na ró ká ringani ko njiri ngbǎ?

2. Ri ká kʉ ngbá chu nǎ kodhó lod’radha dhi njí kʉ ddiddi tunda zʉ ná ke na ri?

² Akotilo i loroji djo di. Kodhó lod’radha dhi njí le ka le ddí tunda zʉ ná ke na. Tunda nga lʉdha tso ró, ri adi ngani ke kle b’lo lʉ ná ri thei, nzá mai nja ri d’e lʉ go ro. Ro, ri adi ngani ke ra anzi dhé nzá d’e lʉ ná ri djo ndi dda ddó ndirigoti ri ronga ndi thɨ nari na. Føri bbai, ko ba ji nanga jini hwè lo-i dho ná ndrŭ ró, ko adi riji ko kó ndrŭ tsotso thei ndiro kpa ngʉ Yesu unakpa d’e. Ro, nzá nanga d’e jini hwè lo-i dho ná ndrŭ tsotso ko adi kó ndiro ndima nja addudho ma ri kʉ bbo na mana kʉ ná lo ndima chu lo Mungu ma, Biblia ma na djo d’e nari. (Yoh. 4:35, 36) Ko d’i ndrŭ nanga ká jini ji inga nzá ma nari utso ná saa na, ko ka ko chu ngbaribbai ma ko ka ko kó kpa tsotso bblo pli nari. I lo nǎ, ko si loti ji nanga jini ná ndrŭ ko ba ná saa na ko ka ko njí ná lo djo. Føri kina, ko si ngbaribbai ma ko ka ko kó fø di ná ndrŭ tsotso ndiro ndima njí maendeleo d’e nari nja.

NGBARIBBAI MA KO KA KO KÓ JI NANGA JINI HWÈ LO-I DHO NÁ NDRŬ TSOTSO NARI

3. Ji nanga jini ná ndrŭ ko ba lo ko d’ra ná saa na ró ká ringani ko njiri ngbǎ? (1 Wakorinto 9:26)

³ Ji nanga jini ná ndrŭ ko ba lo ko d’ra ná saa na ró, ko adi riji ko kó kpa tsotso ndiro kpa nga bbi tso shinga dhi ngana le mba ná chu lu d’e. Lo tso ko nga fø ndrŭ na ná saa na, ringani ko nga funzo tso thei ndirigoti ko nzi kpa kodhó njudha dho.​—Azø 1 Wakorinto 9:26.

4. Atilo tayari ngʉe funzo dho ná le dhó lo djo.

⁴ Anga funzo tso. Ko loti na ná nja ndrŭ e tayari funzo tso ngadha dho. Loroji na, ddikpa thonji dyi Canada nǎ ddikpa jadda le singʉe prezatwar tso ro ndirigoti le dzingʉe Anji Maisha Hwè Theinga dho! dhi broshua. Fø prezatwar na ngʉ lod’ra ná le-ve pongʉeri le dho nari kʉ, fø broshua chulu le ka le ddi Biblia nǎ longa le dho nga dhi mbø ro. Fø le nanga jingʉeni ji nari dho le bbʉngʉe ndidhó telefone dhi nimero le-ve dho. Fø dyi luti, le chongʉe mesaje fø le-ve dho ndiro ndi chu ngbá dyi ma ndima ka ndima nga funzo tso nari d’e. Le-ve pongʉeri le dho ndi si zanji ma kana yenga na ná saa na, fø le dhungʉeri ɨ: “Bbʉ ká ni ka ni si nzá?” Kpa ngangʉe funzo tso mbʉnji dyi thei. Fø jadda le singʉe fø yenga dyi thei njudha na ndirigoti le njingʉe maendeleo lele.

5. Ko tsotso ká ngbá lo ka ndi kó ndiro ko chu bblo ko nga funzo tso nǎ ná chu d’e? (Anja ji maddi.)

⁵ Bbʉbbʉ dhé, krʉ kʉ ná ndrŭ nga ka ndima é tayari funzo dho fø jadda le bbai ri. Nja ndrŭ dhó lo adi riu saa da bbo. Ringani ko nga lotidha tso ndrŭ na kpa nyǒ tho ná lo djó ro. Njati ko é bblo nganjadha na ndirigoti ko di ko d’yu li ndrŭ ro ró, sese ddo kana dhé ko ka ko nga funzo tso kpa na. Funzo tso ko ji ko nga ná saa na ká ko ka ko po ngbá lo? Akonja bblo chu funzo tso ngadha ná nja le-djoi ma, le-vei ma na po ná lo ro di.

6. Ko ddikpa le tsotso kó ndi chu Biblia nǎ lo kʉ bblo ndi dho nari ná saa na ká ko ka ko po ngbá lo?

⁶ Ngbaribbai ma le ka le nga funzo tso nari djo le dhuenga tso ná fø le-djoi ma, le-vei ma na pori nari kʉ, funzo tso le ji le nga ná saa na nja ngana nga ri e bblo le pori; “funzo,” “Biblia nǎ longa ddidha” inga “ma ji ma ddi longa ni dho” ri. Kpa d’i riutso nari kʉ, ri kʉ bblo pli le pori; “lotidha,” “ddinga le loti nari” inga “Biblia nǎ lo le chu nari.” Ndiro ni kó ji nanga jini ni sí loti ndi na luti ná le tsotso d’e, ni ka ni pori ɨ mai, “Maisha nǎ ko adi dhu ko tso ná logoti bani Biblia nǎ nari kʉ bbo thonga ná lo” inga “Biblia nga kʉ dini nǎ buku dhé ri, ro ri adi ko tsotso kó maisha nǎ njonjo lo kana maddi.” Ni ka ni pori ki ɨ: “Ri nzɨ adi saa dzi bbo ri, ro sese miniti kana dhé ni ka ni chu bbo ka ndi kó ni tsotso ná lo.” Føri ni ka ni njí nzá ni li ni ka ni di nju na ná “saa” ma inga “ddo” ma na nari chulu ndiro nzɨ le ndi mbu cho le cho nari bbai ró.

7. Nja ndrŭ ká adi Biblia nǎ bbbbʉlo chu ngbá saa na? (1 Wakorinto 14:23-25)

⁷ Anzi kpa njudha dho. Ri njani nari kʉ, mutume Paulo dhó saa na, nja ndrŭ chungʉe bbʉbbʉlo ya kwanza ndima singʉe njudha na ro. (Azø 1 Wakorinto 14:23-25.) Njʉ ma fø di ná lo adi njini ddi. Bí kʉ ná ndrŭ adi maendeleo nji lele kodhó njudha na ndima nga sidha tso ná saa na. Ri ká ngani ni nga kpa nzidha tso njudha dho ngbá saa na? Buku Anji Maisha Hwè Theinga dho! nǎ le tilo ndrŭ le nzǐ nari djo somo 10 nǎ, ro ri nzá ngani ni si fø somo djo dhé ndiro ni nga ndrŭ nzidha tso njudha dho d’e ri. Ya kwanza ni tilo ddikpa le na ró, ni ka ni nzi le thei kodhó yenga dhi njudha dho. Ni ka ni d’ra fø yenga dhi hotuba djǒ inga fø dyi le si nanga ne Dzamu dhi Munara nǎ ro ná lo ro le dho.

8. Njudha dho ko ddikpa le nzǐ ná saa na ká ko ka ko po ngbá lo le dho? (Isaya 54:13)

⁸ Njudha dho ni ddikpa le nzǐ ná saa na, atu ngbaribbai ma kodhó njudha nǎ adi njini ná lo kʉ njonjo ledhó dini nǎ ri na nari nanga le dho. Ya Kwanza singʉe kodhó njudha na ná ddikpa mwanafunzi njangʉe ngbaribbai ma Dzamu dhi Munara nǎ lo da nari ná saa na, le dhungʉeri ndidhó mwalimu tso, “Ri dho chutso ddá ná fø ke ká chu ndrŭ ró dho krʉ?” Le-ve pongʉeri le dho nari kʉ, ddiddi ko churie kodhó familia nǎ ndrŭ krʉ ró dho nari bbai, ko adi riji ko chu kutaniko nǎ krʉ ndrŭ ró dho. Føri goti, fø mwanafunzi pongʉeri nari kʉ, ndima dhó kanisa nǎ nzá bí kʉ ná ndrŭ churie ndima ró dho ndima kana ri. Føri kina, ko ka ko dhǒ kodhó njudha e njonjo kpadhó ri ró ro nǎ ná nja d’i chu ki maddi kpa dho. (Azø Isaya 54:13.) Ko adi njuni ddinga ndiro ko bbʉ madha Yova dho, ko chu lo kedhó ro ndirigoti ko li ko kpakpa ko kana d’e. (Ebr. 2:12; 10:24, 25) Føri dho, kodhó njudha le kperie ndiro ko chu lo d’e ndirigoti ri nǎ ngae desturi dhi lo ro ri. (1 Ko. 14:40) Kodhó Pidhinga dzá dza nǎ ngae bí kʉ ná ritsi ro ri ndirigoti ngbaribbai ma le chirie ri nari dho rie sʉsʉ ko dho longaddini. Ndirigoti ko nzɨ adi ko tso gba politiki nǎ lo na ri nari dho nzɨ ko adi loti ri djo inga ko lé ko tsonga ri nǎ lo djo ri. Njudha dho ni mwanafunzi nzǐ ná saa na, ri ka ndi é bblo pli ni dhǒ ɨ djǒ ripo ná video le dho: Pidhinga dzá dza nǎ ká ngbá lo adi da? Føri ka ndi kó le tsotso ndiro le chu fø lu si njini ná lo d’e.

9-10. Ddikpa le ko nzǐ njudha dho ná saa na ká ko ka ko njiri ngbǎ ndiro nzɨ le nji do ró? (Anja ji maddi.)

⁹ Nja ndrŭ nanga adi rɨni kodhó njudha na ndima si nari dho, kpa adi riddi nari kʉ, ko si ripo ndima ngʉ Yova dzá Dimu. Njudha dho ko nzǐ ná le dho ko ka ko pori nari kʉ, ko nanga adi jini bbo ko lʉ kó nari dho ndirigoti le si njudha na ná saa na, ko nzɨ cho le ndi po inga ndi njí ddikpa lo ro maddi ri. Familia nǎ ndrŭ ka ndima si ndima dhi rere nzø na maddi. Kodhó njudha nǎ nzɨ nzø adi njonjo mafundisho ba gø dhi ndrŭ ró ro ri. Føri rɨngana, gø dhi ndrŭ ma adi nzø ma na ddikpa ngana ndiro ndima rr lo d’e. Føri adi rili gø dhi ndrŭ chu ndima dhó nzø ká kʉ ngbaga ndirigoti kpa dho ká le ngbǎ di ná lo ngaddi nari. Kodhó njudha dhi ngana nzɨ ko adi sadaka kó inga ko nzɨ adi avelop bbʉ ndrŭ dhona ri. (Kum. 31:12) Føri rɨngana, ko adi Yesu pongʉe ná i lo dyø: “Ni bangʉe ri pá, anibbʉ ri pá.” (Mt. 10:8) Føri kini, ni ka ni pori le dho nari kʉ, ri nzá ngani le njø bbo ró dzi kʉ ná rù i di njudha dho ri. Mungu adi le thí nja, ro nga le ndí ró le njani nari ri.​—1 Sa. 16:7.

¹⁰ Njati ddikpa le si njudha na ró, anji ni dho ka ná lo krʉ ni kó le bblo ndiro le mbu ndi bblo d’e. Adho le wazee ma, nja le-djoi ma, le-vei ma na dho. Njati le njari ndi le ko bblo ró, le ki ka ndi si njudha dhi ngana vi. Njudha dhi saa na, njati ledhó Biblia é nga ró, aninjinjí nidhó ri na ndirigoti ako le tsotso le famu hotuba ma, ngbaribbai ma ko adi lo jifunza ddinga nari ma na.

FUNZO TSO NI NGA NÁ SAA NA NI KA NI NJÍ NÁ LO

11. Biblia nǎ longa ni ddi dho ná le dhó saa ma, programu ma na ronga ni b’o nì nari ká ni ka ni dhǒ ngbaribbai?

¹¹ Ri ká ngani ko di ngbá lo ngano funzo tso ko nga ddikpa le na ná saa na? Ab’o ledhó saa ma, programu ma na ronga. Loroji na, njati ni rrni ddikpa saa djo ró, asi fø saa nganga na njati rié ngbaribbai ma ndrŭ adi saa ronga le b’o nari nja ni di ná ngana ró. Føri goti, ri kʉ bblo nzɨ ni dzi ledhó saa bbo funzo tso ni nga ná dyi. Nja le-djoi ma, le-vei ma na adi riji ndima zønga sese ngbà mai kpa ngazø na ná ndrŭ ji ndima zønga bbo ro. Ndirigoti nzɨ tilo bbo, ro abba nga ni zø na ná le i tilo bbo.​—Mez. 10:19.

12. Funzo tso ko nga ndrŭ na ró ká ringani ko ddinga ngbá lo djo?

¹² Funzo tso ko nga ddikpa le na ná saa na, ko adi riji ko kó le tsotso thei ndiro le chu Yova ma, Yesu ma na d’e ndirigoti le dhí ndidhó jidha kpa djo. Ndiro ko njiri fø d’e, ringani ko ddi ná lo d’yʉ ndi Mungu dzá lo ro nga kodhó ngaddidha ro ri. (Mdo. 10:25, 26) Bí ina, mutume Paulo ngʉ adi ndidhó longaddidha d’yʉ Yova chongʉe ndi kó ko tsotso ndiro ko chu ndi ndirigoti ko ji ndi d’e ná ke Yesu Kristo ro. (1 Ko. 2:1, 2) Føri kina, Paulo dhongʉe ngbaribbai ma ri kʉ bbo na mana kʉ ná lo le kó wø si bbʉbbʉlo kana ná le-djoi ma, le-vei ma na tsotso ndiro kpa é bblo sifa na d’e nari. Fø sifa le ka le ddie or ma, feza ma, bbo na mana kʉ ná nja dju ma na na. (1 Ko. 3:11-15) Bbo na mana kʉ ná fø sifa kana e udha ma, nyod’yu ma, lo utsod’idha ma, Yova do le nji nari ma na. (Zb. 19:9, 10; Mez. 3:13-15; 1 Pe. 1:7) Adyø Paulo ngʉ adi longaddi nǎ ná chu nidhó mwanafunzi tsotso ni kó ndiro ndi li ndidhó udha kpakpa ndirigoti ndi li ndima kana kau kpakpa ndidzá ra nǎ ji dhi Baba na d’e nari chulu.​—2 Ko. 1:24.

13. Ji nanga jini ná ndrŭ tsotso ko kó ná saa na ká ko ka ko dhǒ ngatsovedha ma, lo ko famu nari ma na ngbaribbai? (2 Wakorinto 10:4, 5) (Anja ji maddi.)

¹³ Adyø Yesu ngʉ adi longaddi nǎ ná chu ngatsovedha na ni kʉ nari ma, lo ni famu nari ma na chulu. Nzɨ di che dho ndrŭ ka ndima mbu ndima ná lo dhu ndrŭ tso. Njati ddikpa lo le famu nari é kpakpa le dho ró, nzɨ ra anzi fø lo djo ni loti nari na. Føri rɨngana, anira anzi funzo na ndirigoti ni si ngʉ fø lo djo luti. Kpakpanga na ni le cho ddikpa lo udha dho nzá le d’e ri famu ro nari djolu, abba saa le dho ndiro bbʉbbʉlo banga le thí na d’e. (Yoh. 16:12; Kol. 2:6, 7) Biblia ddi kali dhi mafundisho “kpakpa tɨtɨ tsu dz’ nǎ ná ritsi na” kwá ringani ko kwá ndi ro. (Azø 2 Wakorinto 10:4, 5.) B’lo ndi ungʉe ná lo na mwanafunzi bbani nari nga ka ndi é sʉsʉ ri. Føri dho, ringani ko kó mwanafunzi tsotso ndi chu kali dhi lo nyi, ná føri ka ndi liri ke li ndi thí Yova djo. Føri si rili rié sʉsʉ mwanafunzi bbani bbo ndi jingʉe ndirigoti bbo ndi ungʉe ná lo na.​—Zb. 91:9.

NGBARIBBAI MA LE KA LE KÓ WØ SI NJUDHA DHI NGANA NÁ NDRŬ TSOTSO NARI

14. Ri ká ngani ko njini wø si kodhó njudha dhi ngana ná ndrŭ na ngbaribbai?

¹⁴ Yova adi riji ko njini krʉ kʉ ná ndrŭ na jidha na, rié ngbaga ro ma kpa si, rié ngbá desturi nǎ ma kpa kʉ inga rié ngbabø ma mbø kʉ kpadhó ri ró. (Yak. 2:1-4, 9) Nde, ko ká ka ko dhǒ jidha wø si kodhó njudha dhi ngana ná ndrŭ dho ngbaribbai?

15-16. Ko ká ka ko kó wø si kodhó njudha dhi ngana ná ndrŭ tsotso ngbaribbai ndiro kpa mbu ndima ngbà le ko bblo nari bbai d’e?

¹⁵ Nja kʉ ná ndrŭ adi si kodhó njudha na ndiro ndima nja fø ga adi njini ná lo d’e inga d’i ngana di ná ddikpa le lingʉe ndima kpakpa ndima si fø ga nari dho. Føri dho, njati ni nja wø si kodhó njudha dhi ngana ná ndrŭ ró, atilo kpa na. Anji kau kpa na, ro nzɨ liri kpa mbu ndima d’idhé nga djolu ni ronga wa kpa dho nari na. Anzi kpa ndima si di ni kuso. Aninjinjí nidhó Biblia ma, lonanga le ne nǎ ro ná vichapo ma na na ddinga inga abbʉ nja ri kpa dhona. Godhé, addinga ngbaribbai ma kpa ka ndima mbu ndima nari djo. Kodhó Pidhinga dzá dza na singʉe ná ddikpa ke pongʉeri ndi ronga singʉe zʉ ná le-djo dho nari kʉ, ndi doe nji bbo ndi nzá thoe ndi ronga nja ndrŭ bbai ri nari dho. Fø le-djo lingʉeri ke mbu ndi bblo ndirigoti ke d’rangʉeri fø ke dho nari kʉ, ngbà mai ko tho ko ronga fø njudha dho ro, ko ma kʉ nja ndrŭ bbai dhé. Luti, fø ke bangʉe batiso ndirigoti ke nzá virie fø le-djo pongʉe ná lo nga ro ri. Nì mai ri kʉ fø ro, wø si ná ndrŭ ro ko ko d’yu li nari kana, ringani ko é krr ndiro nzɨ ko dhu do ka ndi pá kpa djo ná lo inga nzɨ ko tsu ko kpadhó nzá lø ko ronga ná lo na ró.​—1 Pe. 4:15.

¹⁶ Godhé, ko ka ko liri kodhó njudha dhi ngana si ná ndrŭ mbu ndima bblo. Loroji na, heshima na ko loti ko kana nari na ndirigoti kodhó njudha na løe nga kʉ Yova dzá Dimu ná ndrŭ inga kpa urie ná lo ronga ná lo djo ko loti ná saa na. Nzɨ ko di ka ka ndi kani kpa lu inga nzá dho kpa ki ka ndima si njudha dhi ngana ná lo ti. (Tit. 2:8; 3:2) Føri kina, ko dho nzá ringani ko di loti kpa urie ná lo djo nga dhi heshima ro ri. (2 Ko. 6:3) Hotuba adi bbʉ ná le-djoi dho maddi ringani ndima njí kpakpanga ndima é krr fø di ná lo kana. Godhé, ringani kpa nonga nari kʉ, hotuba ndima bbʉ ná saa na, njudha dhi ngana ka ndi é nga kʉ Yova dzá Dimu ná ndrŭ maddi ndirigoti fø ndrŭ nzá ka ndima famu nja lo ri.

17. Ko ká adi ko thí li ngbá lo djo “bblo dhó nganjadha” kʉ ná ndrŭ ko ba lo ko d’ra ná saa na ró?

¹⁷ Ddo da nari bbai, wanafunzi ko adi ndrŭ nji ná føri kʉ lele ringani ko njí ná njí. Ndirigoti ringani ko ra anzi “bblo nganjadha na kʉ nŭnŭ di ná shinga djo” ná ndrŭ ko ne nari na. (Mdo. 13:48) Njati rié nì ko rinji fø ri ró, ko nanga ro nzá ka ndi rɨni funzo tso ko nga kpa na inga njudha dho ko kpa nzi nari dho ri. Fø ko rinji nari na, ko ka ko kó kpa tsotso kpa ngá “shinga dhi ngana le mba ná chu lu” ndima bbí nari tso.​—Mt. 7:14.