Ab’o nidhó hwè ronga ngó ni kʉ nari kana

1-2. Yova ká e ngbá nganjadha na chi tøni ndi dho ná ngó ngʉ ná ndrŭ djo? (Zaburi 92:12-14; anja ji maddi.)

DZ’ DJOLU gble kʉ ná ndrŭ dhó nganjadha e njonjo ngó ndima ngʉ nari djo. Nja ndrŭ adi riddi nari kʉ, ngó ndima ngʉ nari kʉ heshima dhi lo ndirigoti nja ndrŭ nanga nzɨ adi jini ngó ndima ngʉ nari dho ri. Loroji na, addinga i ngadhudha djo di: Ya kwanza ni d’ingʉe ri utso nari kʉ, ni djoká nǎ kʉ pʉ ná saa na ká ni mbungʉe ni ngbaribbai? Njaro ni jingʉeri ni tu fø pʉ thei nzá ddikpa le ma d’e ri nja ddi ro. Ro, njaro ni rangʉe ri utso d’i nari kʉ, fø ni njiri nari ma nzá ddi chongʉe nja pʉ si nari tso ro ri. Fø loroji ridho nari kʉ, bí kʉ ná ndrŭ nzá jirie ngó ndima ngʉ nari ro ri.

² Nde, kodhi ra nǎ Baba dhó nganjadha ká e ngbaribbai ndidzá ngó ngʉ ná njí dhi ndrŭ djo? (Mez. 16:31) Ke pori nari kʉ, kpa kʉ ddiddi bbo pli d’ani ná tsú bbai. (Azø Zaburi 92:12-14.) Nde, fø lo na mana ká kʉ addu? Bí ina, b’lo ddo bicha ná tsú d’arieni bbo dhonalo ri djó e bí kʉ ná tsúbɨ ma, mauwa ma na. Loroji na, bbo pli d’arieni ná tsú kana e, Japon nǎ e ná cerise ya mauwa dhi tsú. Bbo pli d’arieni ná fø tsú kana nja ri dhó cho darie da elfu ddi djolu. Føri bbai, Mungu dzá ngó ngʉ ná njí dhi ndrŭ e mana na bbo ke nyǒ djó. Yova adi ndi thí li kpadhó bblo pli e ná sifa djo. Fø ndrŭ njirie njí cho bí kana b’lo Yova dho ndirigoti kpø njʉnga djo kpa adi tøni chi dhé Ke dho krʉ kʉ ná lo kana.

3. Abbʉ ngbaribbai ma Yova adi njínji ngó ngʉ ná ndrŭ na ndiro kpa njí ndidzá bbo na mana kʉ ná njí d’e nari dhǒ ná loroji ro.

³ Njati rié ngó ma ni kʉ ri ró, auri u nari kʉ, Yova adi ni nja mana na bbo.a Nja saa na, Yova adi njínji ngó ngʉ ná ndrŭ na ndiro kpa njí ndidzá bbo na mana kʉ ná njí d’e. Loroji na, Yova pongʉeri Sara si ngba gø nari ngʉe b’lo le ngʉ ngó bbo ri. Yova pongʉeri le dho nari kʉ, fø ngba nǎ ro kpakpanga na kʉ ná ndrŭ tsɨ si kʉ si ndirigoti fø ngba sie Masia dzá tata. (Mwa. 17:15-19) Yova pongʉeri Musa rá Waisraeli klo Misri nǎ ro nari ngʉe b’lo ke ngʉ ngó ri. (Kut. 7:6, 7) Føri kina, mutume Yohana ngʉngʉe ngó b’lo, roho ddangʉe chutso ke dho ndiro ke ndí Biblia nǎ mbʉ kʉ ná buku d’e ná saa na.

4. Ddiddi Mezali 15:15 ripo nari bbai, addui ká ka ndi kó ngó ndrŭ tsotso ndiro kpa ve ndima bani na ná kpakpalo tso d’e? (Anja ji maddi.)

⁴ Ngó ngʉ ná ndrŭ dhe adi nji bí ina, ná føri adi rili maisha é kpakpa bbo kpa dho. Tsdha ndima ngʉ ti ro, ddikpa le-ve pongʉeri ɨ: “Ringani ni é kpakpanga na ngó ni ngʉ nari kana dhonalo ngó le kʉ nari ngae sʉsʉ ri.” Ro, Yova ka ndi kó ngó ndrŭ tsotso ndiro kpa é hwèb na ndima dhó maisha nǎ nì mai kpa bani kpakpalo na ro. (Azø Mezali 15:15.) I lo nǎ, ko si loti ngó ndrŭ ka ndima njí ndiro krʉ ddo ró ndima é hwè na d’e ná lo djo. Ndirigoti ko si loti ngbaribbai ma nja ndrŭ ka ndima kó kutaniko nǎ ngó kʉ ná le-djoi ma, le-vei ma na tsotso nari djo. Ro, ya kwanza akotilo addudho ma ri ka ndi é kpakpa ko b’o kodhó hwè ronga ngó ko ngʉ nari kana nari djo.

NGÓ NI KɄ NARI KA NDI LIRI RIÉ KPAKPA NI B’O NIDHÓ HWÈ RONGA

5. Addui ká ka ndi liri ngó ndrŭ thí bʉni bʉ?

⁵ Addui ká ka ndi liri ni thí bʉni bʉ? Njaro ni thí ka ndi bʉni anziro ni ngʉ nji ná lo njini nzɨ ni dho nari dho. Njaro ni ka ni di ngaddi go ni ngʉe jadda nari ma, bblo nidhó afya ngʉe ná saa ma na djo. (Muh. 7:10) Loroji na, Ruby ró dho kʉ ná ddikpa le-ve pori ɨ: “Rù ma thǒ nari maddi e kpakpa ma dho dhonalo njati ma di ma ronga já bbo ró, føri adi rili ma ndí ndindi. Nja saa na, shoseti thodha maddi e kpakpa ma dho. Ma thó adi ndí bbo ndirigoti ma thokpá na nzá ma ka ma njínjí bblo ri. Nga kʉ kpakpa ná njí njidha maddi e kpakpa ma dho.” Ndirigoti Beteli nǎ adi njínji ná Harold pori nari kʉ: “Nja saa na, ma nanga adi kani bbo dhonalo ma nzá ka ma njí krʉ ma ji ma njí ná lo ri. Go ma ngʉe jadda ro, ma ngʉe kpakpanga na bbo. Ma jingʉe spor njidha bbo. Mach ngʉ nja ná ndrŭ ka ndima poeri ɨ, ‘Abbʉ dja Harold dhona dhonalo ke ka ndi liri ko sisi mach djolu.’ Ro, kpadjo dja bladha ma ka ndi é kpakpa ddi ma dho.”

6. (a) Ri ká kʉ nja ngbá lo ki ka ndi liri ngó ndrŭ thí bʉni bʉ? (b) Ngó ndrŭ tsotso ká addu ka ndi kó ndiro ndima chu ndima ká ka ndima di d’ad’a inga nzá ma mutukari ma, moto ma inga velo ma na na d’e? (Anja i djǒ ripo ná lo, “Ri ká ngani ma bbá mutukari inga moto inga velo na ma d’a nari tso bbá?”)

⁶ Njaro ni thí ka ndi bʉni nidhó lo u ná ritsi krʉ nja ndrŭ nji ni dho nari dho. Føri kʉ bbʉbbʉ kʉ ná lo. Njaro nidhó lo ka ndi u ni tsotso ka ndi di kó ná le inga ni rá di nidzá ngba bba. Inga ni ró kʉ ná dhe ma, ni nzá ka ni njanga bblo nari ma na ka ndi liri rié kpakpa ni bbí ddiro inga ni d’a mutukari ma, moto ma inga velo ma na na. Føri ka ndi liri ni mbu ni che bbo! Bbʉbbʉ dhé, ni nzá ka ni njí ni ji ni njí ná ritsi krʉ ri. Ro, anonga nari kʉ, ni na mana kʉ bbo Yova ma, nja ndrŭ ma na dho. Ndirigoti auri u nari kʉ, Yova adi ngbaribbai ma ni adi ni mbu nari famu bblo pli. Yova chu ngbá ngatsi ma ni jirie ndi ma, ni djoi ma, ni vei ma na nari bblo, ná føri na mana e bbo ke dho.—1 Sa. 16:7.

7. Ni riddi ni si dhe Armagedoni njí nari djo ni thí di bʉni ná saa na ká ringani ni di ngaddi ngbá lo djo?

⁷ Njaro ni ka ni di ni mbu che dhonalo ni riddi nari kʉ, ni si dhe nzá Armagedoni d’e si ro. Nde, njati rié fø ni adi ni mbu ró ká ngbá lo ka ndi kó ni tsotso? Anonga nari kʉ, Yova chu addudho ma ndi adi ngatsove i dz’ sadha dho nari bblo pli. (Isa. 30:18) Yova ká adi ngatsove addudho? Dhonalo ke churieri chu nari kʉ, bí kʉ ná ndrŭ si lochu ndi djo ndirigoti kpa si riji ndima ngʉ ndidzá bbakau. (2 Pe. 3:9) Føri dho, bʉ ni thí di bʉni ná saa na, adi ngano nari kʉ, Yova djo ka ndima chu lo ná ndrŭ kʉ bí go Armagedoni si nari njí. Njaro fø ndrŭ kana kʉ nidhó familia nǎ ndrŭ maddi.

8. Ngó ndrŭ ndima mbu che ná saa na ká kpa ka ndima po inga ndima njí ngbá lo?

⁸ Njati ko é jadda ma inga ngó ma ró, dhe ko nji inga che ko ko mbu ná saa na, nja saa na ko adi po ná lo inga ko adi nji ná lo adi rili ko nanga rid’od’o. (Muh. 7:7; Yak. 3:2) Loroji na, chi ngʉ tøni Yova dho ná ke Yobu ngʉ nzani ná saa na, ke ngangʉe dhaa ndi loti nari tso. (Yob. 6:1-3) Føri kina, ngó ndrŭ ró kʉ ná dhe dho inga kpa ba ná dawa djotsina kpa ka ndima po inga ndima njí ná lo ka ndi é nzá kpa ka ndima poe inga ndima njie ná lo njati kpadhó afya ée bblo ró. Ro, njati ko é ngó inga dhe na ma ró, ri kʉ bblo ko di njini bblo ndirigoti ri nzá ngani ko di ndrŭ cho kpakpanga na ndiro ndima njí ritsi ko dho d’e ri. Føri djolu pli, njati ko d’i ri utso nari kʉ, ko poe ddikpa le ní ná lo kʉ nzá thonga ná lo ró, ringani ko kó zø le tso nzá ko nanga rɨni ro.—Mt. 5:23, 24.

NGBARIBBAI MA NI KA NI B’O NIDHÓ HWÈ RONGA NARI

9. Ká addudho ri kʉ bblo ni di nja ndrŭ ji ndima kó ni tsotso nari uu? (Anja ji maddi.)

⁹ Au nja ndrŭ ji ndima kó ni tsotso nari. (Gal. 6:2) Nja ndrŭ dhó le tsotsokodha ni u nari nga ka ndi é sʉsʉ thei ri. Gretl ró dho kʉ ná ddikpa le-ve pori ɨ: “Nja saa na, ma tsotso ndrŭ ji ndima kó nari ma u nari e kpakpa ma dho dhonalo ma adi riddi nari kʉ, kpa si riddi ma ndima nzanza. Madhó ngaddidha thika ma wø nari ma, madhó lo u nja ndrŭ dhó le tsotsokodha nari ma na ma u nari dzingʉe ddo bí.” Nja ndrŭ ji ndima kó ni tsotso nari ni ú ná saa na, føri chulu ni adi rili kpa ba nja ndrŭ dho le ritsi bbʉ nari nǎ ro adi si ná hwè. (Mdo. 20:35) Bbʉbbʉ dhé, ni nanga si jini bbo nja ndrŭ jidha dhǒ ni dho nari ma, kpa jiri ndima kó ni tsotso nari ma na dho.

10. Ká addudho ringani nzɨ ko di mbai ko po nja ndrŭ dho nari nga vi? (Anja ji maddi.)

¹⁰ Adi mbai po ni tsotso ko ná ndrŭ dho. (Kol. 3:15; 1 Te. 5:18) Nja ndrŭ njí bblolo ko dho ná saa na, ko adi riji ko po mbai kpa nji ko dho ná lo dho. Ro, nja saa na, mbai ko po nari nga adi vivi ko ró. Nì mai ri kʉ fø ro, njati ko di ngagbo ndirigoti ko di mbai po ró, kodhó bbakau ka ndima njari pʉlʉpʉlʉ nari kʉ, ko nanga jini ji ndima nji ko dho ná njí dho. Leah, Beteli nǎ adi ngó ngʉ ná ndrŭ tsotso kó ná ddikpa le-ve pori nari kʉ: “Ma adi tsotso kó ná le-vei kana ddikpa le-ve adi mbai po bí ina ma dho. Le adi lo ro ndí ddikpa kar karatasi djo. Fø karatasi djo nzɨ le adi bí kʉ ná lo ndí ri, ro ri e kpakpa ka ndi li ma ná lo. Ma nanga adi jini bbo le ndi ma dho ná lo ma zø ná saa na ndirigoti ri chulu ma adi ri uu nari kʉ, le nanga jini ji ma nji ndi dho ná njí dho.”

11. Nja ndrŭ tsotso ká ni ka ni kó ngbaribbai? (Anja ji maddi.)

¹¹ Anji ni dho ka ná lo ndiro ni kó nja ndrŭ tsotso d’e. Nja ndrŭ djo ni ngaddi nari ma, kpa tsotso ni kó nari ma na ka ndi liri nzɨ ni di ni thí li bbo ni bani na ná kpakpalo djo. Ko ka ko ddí ngó ndrŭ nyod’yu dhi lo bani nǎ ná buku na. Ro, njati nja ndrŭ zø fø buku nǎ kʉ ná lo nzá ró, kpa nzá ka ndima chu ri nǎ kʉ ná lo ri. Føri bbai, jadda kpa nzá ka ndima chu ni churie ná bbo na mana kʉ ná lo ri njati ni d’ra ri kpa dho nzá ró. Ndiro ni chu jadda kpa bblo d’e, adhunga kpa tso ndirigoti arr kpa po ná lo li ni li ni d’yu ro. Ad’ra ngbaribbai ma Yova dho ni njinjí nari korie ni tsotso nidhó maisha nǎ nari kpa dho ndirigoti ad’ra ngbaribbai ma Yova dho kpa njínji nari ka ndi kó kpa tsotso kpadhó maisha nǎ nari maddi kpa dho. Bbʉbbʉ dhé, nidzá jadda bbakau iso ni pɨ nari ma, kpa ni li kpakpa nari ma na si rili ni é hwè na.—Zb. 71:18.

12. Ddiddi Isaya 46:4 ripo nari bbai, ngó ndrŭ dho ká Yova tsoni ngbá lo djo? (Anja ji maddi.)

¹² Anziri Yova bbʉ kpakpanga ni dho. Nja saa na, ni ka ni mbu ni nje njeni ndirigoti si ró klø sini nari bbai, ná føri ka ndi liri ni thí bʉni bʉ. Ro, anonga nari kʉ, Yova kʉ kpakpanga na bbo. Biblia ripo nari kʉ, Yova “nzɨ adi njeni ri ndirigoti ke ró klø nzɨ adi sini ri.” (Isa. 40:28) Føri dho, ke ka ndi bbʉ nidhó lo u ná kpakpanga ni dho. (Isa. 40:29-31) Bbʉbbʉ dhé, Yova tsoni ndi ni tsotso koko. (Azø Isaya 46:4.) Ndirigoti krʉ ddo ró ke adi ndi tsoni djo ná lo njinji dhé. (Yos. 23:14; Isa. 55:10, 11) Sala ni nji nari si rili Yova bbʉ nidhó lo u ná kpakpanga ni dho. Føri si rili ni nja ngbá ngatsi ma Yova ji ni nari ndirigoti ri si hwè bbʉ bbo ni dho.

13. Ddiddi 2 Wakorinto 4:16-18 ridho nari bbai, ri ká ngani ko nó ngbá lo nga? (Anja ji maddi.)

¹³ Anonga nari kʉ, ni nga sie ngó theinga dho ri. Rie sʉsʉ ko ve ko bani na ná kpakpalo tso njati ko di ringano nari kʉ, karnga goti ri si dada ró. Biblia rili ko uri u nari kʉ, ngó le ngʉ nari ma, nga kʉ bblo ná afya na le kʉ nari ma na kʉ kar saa dho. (Yob. 33:25; Isa. 33:24) Føri dho, ni ka ni é hwè na dhonalo ni churi chu nari kʉ, gosi ná saa na ni sie bblo pli kʉ ná afya na ndirigoti nidhó kpakpanga sie bbo anziro nga djolu. (Azø 2 Wakorinto 4:16-18.) Nde, nja ndrŭ ká ka ndima njí addu ndiro ndima kó ngó ndrŭ tsotso d’e?

NGBARIBBAI MA NJA NDRŬ KA NDIMA KÓ NGÓ NDRŬ TSOTSO NARI

14. Ngó ndrŭ ronga ko ra be nari ma, kpa ko nzǐ telefone nǎ nari ma na ká kʉ bbo na mana kʉ ná lo addudho?

¹⁴ Adi ngó kʉ ná le-djoi ma, le-vei ma na ronga be inga adi kpa nzǐ bí ina. (Ebr. 13:16) Ngó ndrŭ ka ndima mbu ndima che njati ndima é ddiro saa bí kana ró. Nzɨ adi vʉ ndibbá ro ná ddikpa le-djo Camille pori ɨ: “Ri adi ngani ma di abba kukutsonga djó ro kpø ngasdjonga djo. Føri dho, nja saa na ma adi ma mbu ddikpa dza nǎ le sʉ ná ngó ngʉ ná simba bbai, ná føri adi rili ma mbu ma che bbo.” Ngó ndrŭ ronga ko ra be nari chulu, ko adi rili kpa churi chu nari kʉ, kpa na mana kʉ bbo ko dho ndirigoti ko ji kpa bbo. Nja saa na, ngó ndrŭ ronga ko ra be inga kpa ko nzǐ telefone nǎ nari nga ka ndi vivi ko ró. Bbʉbbʉ dhé, maisha nǎ njí ko ka ko njí ná lo e bí. Ro, ngó ndrŭ ronga ko ra be nari kʉ bbo na mana kʉ ná lo. Nde, ko tsotso ká addu ka ndi kó ndiro ko d’i bbo pli na mana kʉ ná fø lo utso d’e? (Flp. 1:10) Ni ka ni ndí nidhó kutaniko nǎ ngó ngʉ ná le-djoi ma, le-vei ma na ró dho ndirigoti ni ka ni ndí kpa ronga ni ka ni di ra be ná ddo maddi. Føri kina, avʉ ddikpa ddo ndiro kpa ronga ni ra be nari nga nzɨ di vi ni ró ró.

15. Jadda kpa ma, ngó ndrŭ ma na ká ka ndima njí ngbá lo ddinga?

¹⁵ Njati rié jadda ni kʉ ró, njaro ni ka ni njí do dhonalo ni riddi nari kʉ, ngó ndrŭ dho ni ka ni po inga ni ka ni njí ná lo ro nga kʉ ri. Ro, ri nzá ngani ni di ngaddi føri bbai ri. Anji kpakpanga ndiro ni é bblo kʉ ná kau d’e. (Mez. 17:17) Adi loti ngó ndrŭ na njudha njí inga njudha goti. Apori kpa d’ra ndima dhó bbo ndima jirie ná andiko inga jadda ndima ngʉe ro ndima nyǒ ngʉ adi tho ná lo ro ni dho. Føri kina, ni ka ni nzi kpa ndiro ni nja JW TV^® dhi programu ddinga. Ni ka ni kó ngó ndrŭ tsotso nzá ka ndi njini kpa dho ná njí na maddi. Loroji na, ni ka ni thɨ kpadhó telefone nǎ nzɨ bbí bblo ná lo thika inga ni ka ni telesharje wø si ná vichapo kpa dho. Carol ró dho kʉ ná ddikpa le-ve pori ɨ: “Anji ni nanga adi jini dho ná lo ngó ngʉ ná ndrŭ dho. Nì mai ma kʉ ngó ro, maisha hwè le nji nari ma jirie bbo. Loroji na, njonjo kʉ ná ritsi ko ra dzi nari ma, ddinga ko nganyo madzá bbakau na nari ma, d’ad’ani ná nga ronga ko ra be nari ma na adi hwè bbʉ bbo ma dho.” Ndirigoti Maira ró dho kʉ ná ddikpa le-ve pori nari kʉ: “Madzá bbakau kana ddikpa le dhó cho e 90 ndirigoti madhó cho e 33. Ro, ddinga ko é le na ná saa na, ledhó cho dada madhó ri djolu nari nga adi vivi ma ró dhonalo ko adi nga ma gbo, video ma na nja ddinga. Ndirigoti ko kana ddi le bani kpakpalo na ná saa na, ko adi ko tsotso koko ko kana.”

16. Ká addudho ri ka ndi é bblo ko mba ngó ngʉ ná le-djoi ma, le-vei ma na goti dawa djo?

¹⁶ Njati kpadhó lo uri ndima njani munganga na ró, amba kpa goti. Ni ka ni mba ngó ngʉ ná le-djoi ma, le-vei ma na dawa djo njati kpadhó lo uri ndima njani munganga na ró. Føri kina, ni ka ni di kpa kuso ndiro ni nja munganga ká njini bblo inga ke ká kpa tsotso kó kpadhó lo uri nari bbai nì ma nari d’e. (Isa. 1:17) Ndirigoti ni ka ni kó kpa tsotso munganga po kpadhó lo djo ná lo ni ndí nari chulu. Ruth ró dho kʉ ná ddikpa ngó le-ve pori ɨ: “Bí ina, ma rá ddiro dawa djo ná saa na, bbanganga nzɨ adi ma po ná lo ro u ri. Kpa adi ripo ɨ mai ma ní, ‘Ni nga kʉ dhe na ri; ni riji dhe ko ni.’ Ro, njati ko si d’i le na ró, bbanganga adi njini bblo pli ma na. Ma adi mbai po bbo ndima dhó njí adi bba ndiro ndima mba ma goti dawa djo d’e ná le-djoi ma, le-vei ma na dho.”

17. Ni ká ka ni d’ra lo ngó ngʉ ná le-djoi ma, le-vei ma na na ngbaribbai?

¹⁷ Adi lod’ra kpa na. Nja kʉ ná ngó ngʉ ná le-djoi ma, le-vei ma na dho nzá ri ka ndi ka ndima d’ra lo nyumba kwa nyumba ri. Loroji na, ni ka ni kperi ni d’ra lo ddinga ngó ngʉ ná le na prezatwar na. Ni ka ni si kiti na ndiro le si di ri djó d’e. Inga ni ka ni nzi le ndiro ni ddá chutso ddinga nidhó mwanafunzi dhó funzo dho d’e. Inga ni ka ni rá funzo nji le bba nidhó mwanafunzi na. Wazee ka ndima kperi mahubiri dho le adi nji ná njudha di da ngó ngʉ ná ndrŭ bbá, ná føri ka ndi liri rié sʉsʉ kpa di lod’ra nja le-djoi ma, le-vei ma na na. Jidha ko dhǒ ngó ndrŭ dho nari ma, heshima ko bbʉ kpa dho nari ma na adi Yova nyǒ tho bbo pli.—Mez. 3:27; Ro. 12:10.

18. Gosi ná lo nǎ ká ko si loti ngbá lo djo?

¹⁸ I lo nonga ko dho nari kʉ, Yova jirie ngó ndrŭ bbo ndirigoti ke adi kpa nja mana na bbo. Ndirigoti le-djoi ma, le-vei ma na maddi adi kpa nja Yova adi kpa nja nari bbai! Ngó le ngʉ nari ngae sʉsʉ ri, ro Yova ni tsotso koko ndiro krʉ ddo ró ni é hwè na dhé nidhó maisha nǎ d’e. (Zb. 37:25) Ndirigoti ni ka ni ddinga nidhó maisha si lili ndi nǎ hwè na ná ddo djo! Ro, nja kʉ ná le-djoi ma, le-vei ma na adi bani njonjo kʉ ná kpakpalo na ndima dhó maisha nǎ. Kpa adi ndima dhó familia nǎ ngó ndrŭ ma, nzø ma inga dhe na kʉ ná kau ma na ronga b’o. Nde, fø le-djoi ma, le-vei ma na ká ka ndima njiri ngbǎ ndiro ndima b’o ndima dhó hwè ronga d’e? Gosi ná lo si fø ngadhudha goti ngʉ.