Matayo

16 Bbafarisayo ma, Bbasadukayo ma na singʉe Yesu dhi ngana ndiro ndima mbu ke d’e. Kpa pongʉeri ke dhǒ ra nǎ ro si ná ddikpa ddù ndima nja. 2 Ke pongʉeri kpa ni: “Ngasdjó nga si ró, ni adi ripo, ‘ngá* sie bblo dhonalo rakpa ronga kʉ kaka,’ 3 ndirigoti bbʉtso ni adi ripo, ‘njʉ grì si kʉ o ndirigoti dji si kʉ ko dhonalo rakpa ronga kʉ kaka, ro ndundu ma chini ddi.’ Rakpa ró njini ná lo nanga tudha ni chuchu, ro njonjo kʉ ná saa na njini ná lo nanga i nzɨ tuni ni dho ri. 4 Che kʉ ndirigoti nzɨ tøni chi Mungu dho ná gø ddù ne, ro kpa nzɨ si ddikpa ddù ro ma nja ddi ri, rie nga Yona dho njingʉeni ná ddù dhé ri ró.” Føro ke rangʉe ra ndirigoti ke bbangʉe kpa føga.

5 Yesu unakpa dangʉe jʉdda dzá ddinga laidjo, ro kpa vingʉe mukati ndima d’u nari nga vi. 6 Yesu pongʉeri kpa ni: “Aniwe ni nyǒ tso ndirigoti anib’o ni ronga Bbafarisayo ma, Bbasadukayo ma na dhó thì* ró.” 7 Føro kpa ngʉ riti ɨ ndima kana: “Ko d’u mukati ro nzá.” 8 Yesu chungʉe fø lo chu nari dho ke dhungʉeri kpa tso: “Ni ká gʉni ni kana ni d’u mukati ro nzá nari djó addudho, ni sese dhó udha kʉ ná i kpa? 9 Ni djǒ ká lo d’e lø nzá dhé go? Ni ká 5 kʉ ná mukati le ndoe 5 000 kʉ ná kpetsi kpa dho ndirigoti ri tso kúkú gʉ mae dyó thɨ ma nari ngano nzɨ? 10 Inga ni ká 7 kʉ ná mukati le ndoe 4 000 kʉ ná kpetsi kpa dho ndirigoti ri gʉ mae bbobbo d’yó* thɨ ma nari ngano nzɨ? 11 Ma nzɨ e loti mukati nganga djo ri nari ká ni famu nzá addudho? Anib’o ni ronga Bbafarisayo ma, Bbasadukayo ma na dhó thì* ró.” 12 Føro kpa famungʉe ri nari kʉ, ke nzɨ e ripo ndima b’o ndima ronga mukati nǎ thì* nganga ró ri, ro Bbafarisayo ma, Bbasadukayo ma na dhó longaddidha ró.

13 Kaisaria Filipi nǎ eneo na Yesu si ná saa na, ke dhungʉeri ndi unakpa tso: “Ndrŭ ká ripo ndrŭ Ddù kʉ ie?” 14 Kpa pongʉeri: “Nja ndrŭ ripo ndrŭ Ddù kʉ Yohani Mubatizaji, nja ndrŭ ripo Eliya, ndirigoti nja ndrŭ ripo Yeremia inga ddikpa nabi.” 15 Yesu dhungʉeri kpa tso: “Nde, ni ká ripo ma kʉ ie?” 16 Simoni Petro ngʉngʉe logoti: “Ni kʉ Kristo, shi di ná Mungu Ddù.” 17 Føro Yesu ngʉngʉe logoti ke dho: “Hwè na kʉ nari kʉ ni, Simoni, Yona ddù dhonalo fø lo nzá le ndí ma, ju* ma na d’ra ni dho ri, ro ri kʉ madzá ra nǎ Baba. 18 Godhé, ma ripo ni dho: Ni kʉ Petro, ndirigoti fø dju djo ma si kutaniko chi, føri goti Kabuli* dhi dzaitso dzá kpakpanga ro nzɨ si da ri djolu ri. 19 Ma si kʉ ra nǎ Pidhinga dhi klekpa bbʉ ni dhona. Ddikpa ritsi tso ni chi i dz’ djó ró, føri sie b’lo tso chini ra nǎ ná ritsi ndirigoti ddikpa ritsi tso ni kló dz’ djó ró, føri sie b’lo tso kloni ra nǎ ná ritsi.” 20 Føri goti ke jangʉeri ndi unakpa dho li ndi li ndi dyu ro, nzɨ kpa d’ra ndi kʉ Kristo nari ro ddikpa le dho maddi.

21 Fønga djó ro, Yesu ngangʉe ri nanga tudha tso ndi unakpa dho nari kʉ, ringani ndi rá Yerusalemu na ndirigoti ndi ba bí kʉ ná nzadha, ngó kpa ma, bbakuhani djó bbobbonga ma, nga ndi ná kpa ma na dhó ro ndirigoti kpa hwi ndi hwi; føri goti ddo 3 djó ndi si gaga. 22 Føro Petro dzingʉe Yesu nga mbess ndirigoti ke ngangʉe ɨ ndi o Yesu na nari tso: “Abe zø ni djo Bboke; fø di ná lo nzɨ ni ro ba karrnø maddi ri.” 23 Ro, Yesu lengʉe ndi chuti Petro dho ndirigoti ke pongʉeri: “Ada ma goti, Shetani! Ni kʉ ma ronga tso cho ná ritsi dhonalo ni nzɨ ngaddi Mungu bbai ri, ro ndrŭ bbai.”

24 Føri goti, Yesu pongʉeri ndi unakpa dho: “Njati ddikpa ke jiri ndi si ma ulu ró, fø ke dho ringani ndi gʉ ndi ndi ndiro, ke d’ú ndidhó nzadha dhi tsú* ndirigoti ndi di ma dyø. 25 Njati ddikpa le di rine ndi gø ndidhó shinga* gø ró, fø le si ri vivi, ro ddikpa le vi ndidhó shinga* ma djotsina ró, fø le si ri baba. 26 Njati ddikpa ke dho ngø ché lu, ro ke vi ndidzá shinga* i vi ró, føri dzá bblonga ká kʉ addu? Inga ddikpa ke ka ndi bbʉ ndidzá shinga* ødha dho ná ritsi ro ká kʉ ddi? 27 Dhonalo ndrŭ Ddù si si ndidzá Baba dzá kadha nǎ ddironga ndidzá malaiká ma na, ndirigoti ke si nja ke ddiro kobe bbʉ ke njingʉe ná lo ró ro. 28 Bbʉbbʉ dhé ma ripo ni dho, iga kʉ ná ndrŭ kana nja ndrŭ ro nzɨ cheni, nzá ndima d’e ndrŭ Ddù si ndidhó Pidhinga nǎ nari nja ró ri.”