Matayo

21 Chøchø kpa ngʉ si Yerusalemu na ndirigoti b’lo kpa singʉe Mizeituni dhi Ngøtsɨ djó Betefage nǎ ro, Yesu chongʉe ndi unakpa kana ro aro kʉ ná kpa, 2 ndirigoti ke pongʉeri kpa dho: “Anira ni njí ni nja ná bba gʉ ndirigoti fø bba gʉ ni si ró, ni si ddikpa isɨ kana ma ro, ndidzá ngba na sʉ le sʉ ndima ro; aniklo ri ndirigoti anisi ri na ma dhi ngana. 3 Njati ddikpa ke po ddikpa lo ro ni dhi ngana ró, ringani ni pori ke dho, ‘Bboke dhó lo u ri.’ Føro ke ribba thei ni rá ri na.”

4 Fø lo bangʉe nga ndiro nabi chulu pongʉeni ná i lo njini d’e: 5 “Apori Sioni nǎ singba dho: ‘Anjari! Nidzá pi si ni dhi ngana, ri kʉ djø djøni ná ke ndirigoti ke dji kana djó, bbʉbbʉ dhé, ri kʉ kana dzá ngba, ri kʉ no adi d’u ná zǎ dzá ngba.’”

6 Føro Yesu unakpa rangʉe ro, kpa njingʉeri ke jae ndima dho nari nganga bbai. 7 Kpa singʉe kana ma, ndi dzá ngba ma na na ro, kpa hungʉe ndima ró arugu rù ri djo ndirigoti ke dingʉe ri djo. 8 Birobiro kʉ ná ndrŭ kana bí kʉ ná ndrŭ ngʉ ndima ró arugu rù hú chu lu ndirigoti nja ndrŭ ngʉ tsú bɨ d’rɨ nari ndrŭ ngʉ hú chu na. 9 Ke njí ngʉ ra ná ndrŭ ma, ke goti ngʉ ra ná ndrŭ ma na ngʉ ndima nanga jø ɨ: “Ko rinzi, agø Daudi Ddù, Yova* ró dho na si nari kʉ le ronga leni ná ke, ko rinzi, agø ke, arø bbo ngbeni ná nga nǎ ro.”

10 Føro, Yerusalemu na Yesu tsungʉe ro, fø bba lu na bbò kʉ ná makilele tangʉe ndirigoti ndrŭ ngʉ ridhu: “Føri ká kʉ ie?” 11 Birobiro kʉ ná ndrŭ ngʉ ripo: “Føri kʉ nabi Yesu, Galilea nǎ Nazareti nǎ ke!”

12 Hekalu na Yesu tsu ro, ke dingʉe ritsi nanga ngʉ dzi ná kpa ma, ritsi ngʉ dzi ná kpa ma na bbaidjo. Mbø nanga ngʉ wø ná kpa dhó meza ma, bbǎna nanga ngʉ dzi ná kpa ngʉ di djó ná ba ma na thí ke lengʉe glʉ. 13 Føri goti ke pongʉeri: “Ri ndini: “Madzá dza le si nzi sala dhi dza, ro ni liri fø dza ngʉ gbʉ dhi kpa ra runi ná nga.” 14 Føri goti nzɨ nyǒ nganja ná ndrŭ ma, tsú kó tsu ná ndrŭ ma na singʉe ke dhi ngana hekalu na ndirigoti ke gøngʉe kpa gø.

15 Bbakuhani djó bbobbonga ma, nga ndi ná kpa ma na njangʉe ke ngʉ nji ná ké ka ndi ke le nanga ná lo ma, jadda nzø ngʉ hø: “Ko rinzi, agø Daudi Ddù!” nari ma na ro, kpa lu fø lo kangʉeni ka. 16 Ndirigoti kpa dhungʉeri Yesu tso: “Ni ká fø nzø po ná lo rr nì?” Yesu ungʉe ritso: “Nio. Ni ká d’erie i lo ro zø nzá? “Ni liri madha si jadda nzø ma, kalʉ nzø ma na tso nǎ ro.” 17 Føro ke bbangʉe kpa føga nari goti ke tungʉeni fø bba gʉ ro, nari goti ke rangʉe ddo Betania na.

18 Bbʉtso kukú Yesu ngʉ ngʉ Yerusalemu na ro, ke ù løngʉe. 19 Ke njangʉe figi dhi ddikpa tsú chu tso ro ndirigoti ke ndringʉeni ri kuso, ro fø tsú djó nga ngʉe ddikpa ritsi ro maddi ri, ri djó ngʉe ri bɨ dhé. Føro ke pongʉeri fø tsú ni: “Nzɨ tsu-kpa ki o ni djo!” Ndirigoti figi dhi fø tsú dyungʉe thei. 20 Fø lo ke unakpa nja ro kpa nanga kengʉeni ke ndirigoti kpa dhungʉeri: “Figi dhi fø tsú ká dyu thei fø ngbǎ?” 21 Ke ngʉngʉe logoti kpa dho: “Bbʉbbʉ dhé ma ripo ni dho, njati ni é udha na ndirigoti ni nanga ro di rɨni nzá ró, ni nzɨ nji figi dhi fø tsú ró ma nji ná lo dhé ri, ro ni ka ni pori po i ngø ni: ‘Angbeni iga ro ndirigoti ni rá ni bu jʉdda na,’ ná føri njini njí.” 22 Ndirigoti ni di nganzi nì ni kʉ udha na ro ró, ni nganzi djo ná ritsi krʉ ni si baba.

23 Hekalu na ke si ro, bbakuhani djó bbobbonga ma, fø bba gʉ ngó kpa ma na singʉe ke dhi ngana longa ke ngʉ ddi ro ndirigoti kpa dhungʉeri: “Ni nji ná fø ritsi ká ni nji ie chu na? Ndirigoti ni dho ká ie bbʉ fø bbonga?” 24 Yesu ngʉngʉe logoti kpa dho: “Ma maddi ngʉ ddikpa lo ro i dhu ni tso, njati ni d’ra fø lo d’ra ma dho ró, ma d’ra ma ká fø lo nji ie chu na nari thei ni dho: 25 Yohani ngʉ bbʉ ná batiso ká singʉe ngbaga ro? Ri ká singʉe ra nǎ ro inga ndrŭ dhó ro?” Føro kpa ngangʉe lonanganedha tso ndima kana ɨ ndima ripo ro: “Njati ko pori ‘Ri si ra nǎ ro’ ró, ke si ridhu ko tso: “Nde, føro ká ni ungʉe ke nzá addudho?” 26 Ro, njati ko pori, ‘Ndrŭ dhó ro’ ró, ringani ko njí birobiro kʉ ná ndrŭ ka ndima njí ko ró ná lo do dhonalo kʉ, ndrŭ churi chu Yohani ngʉe nabi.” 27 Føri dho, kpa ngʉngʉe logoti Yesu dho: “Ko nzá churi ri.” Ro, Yesu maddi pongʉeri kpa ni: “Ma ma nzɨ ddi d’ra ma ká fø lo nji ie chu na nari ni dho ri.

28 “Ni ká ddiri ngbǎ i lo djo? Ddikpa ke dzá nzø ngʉe aro, føro ke singʉe ya kwanza ngba dhi ngana ndirigoti ke pongʉeri, ‘Madzá ngba ara njínji njʉ divai dhi nza gʉ.’ 29 Fø ngba pongʉeri, ‘Ma nzɨ ra ri,’ ro luti ngba nanga fø lo d’ongʉe d’o ro, ngba rangʉe ra nza gʉ. 30 Føro ke rangʉe ya pili ngba dhi ngana, ná fø ngba dho ma ke singʉe fø lo i po. Ngba ungʉe ri tso, ‘Ma ra nì Baba,’ ro ngba i nzá rangʉeri. 31 Nde, fø nzø aro kana ro ngbà nji ndidzá baba ji ná lo nari ká kʉ ie?” Kpa ngʉngʉe logoti: “Ri kʉ ya kwanza ngba.” Føro Yesu pongʉeri kpa dho: “Bbʉbbʉ dhé ma ripo ni dho, kitas tso nju ná kpa ma, ndumba nji ná ndrŭ ma na si tsu Mungu dhó Pidhinga na ni njí. 32 Dhonalo Yohani si ro, ke dhongʉe chølo dhi chu ni dho, ro ni nzá ungʉe ke ro ri. Ro, kitas tso nju ná kpa ma, ndumba nji ná ndrŭ ma na i ungʉe ke u. Ngbà mai ni njangʉe fø lo ro, ni nanga ro nzá ri d’ongʉeri ndirigoti ni nzá dhé ungʉe ke ro ri.

33 “Anirr nja loroji ki ena: Ddikpa ke dhó ngʉe ddikpa nza, ná fø nza gʉ ke zʉngʉe divai mbi ndirigoti ke d’engʉe ri ronga tso lubba na, ke thɨngʉe divai nanga le di zz ná nga ndirigoti ke chingʉe nga le di b’o nǎ ná bbo ngbeni ná dza, føri goti ke ma rrngʉeni nza bbɨ ná kpa na ndima di fø nza gʉ o ná ritsi nanga ndondo ndirigoti ke rangʉe d’i ngø na. 34 B’lo divai o nari goti ke chongʉe ndidhó njí dhi kpa nza bbɨ ná kpa dhi ngana ndiro kpa kó ndi rɨnga d’e. 35 Ro, nza bbɨ ná kpa løngʉe kedhó njí dhi kpa ro, kpa njingʉe ddi ke nji, kpa hwingʉe nja ke hwi ndirigoti gbo ri si na ná ke kpa búngʉe dju na. 36 Føri goti ke chongʉe njí dhi nja kpa ki, ná fø kpa ngʉe bí anziro ke choe ná kpa djolu, ná fø kpa ró ma nza bbɨ ná kpa njingʉe fø di ná lo dhé. 37 Mwisho ke chongʉe ndidhi dduna, ke ngʉ riddi, ‘Kpa ka ndima bbʉ heshima ngbà madhi dduna dho.’ 38 Nza bbɨ ná kpa nja le ddù ro, kpa ngʉ riti ndima kana, ‘I ri i kʉ mali si che dho ná ke, anisi ko hwi ke hwi ndiro ke dho si ma ná mali ché ko dho d’e!’ 39 Føro kpa løngʉe ke, kpa drrngʉe ke divai dhi nza nǎ ro ndirigoti kpa hwingʉe ke hwi. 40 Føri dho, divai ba nganga ve si si ró, ke ká si ngbá lo nji nza bbɨ ná fø kpa ró?” 41 Kpa ngʉngʉe logoti: “Ke si che bbo kʉ ná fø kpa che nga nǎ zø ro ndirigoti ke si divai dhi nza bbʉ ngbà ka ndima bbʉ ndi dho ka ndi ché ná tunda, ngbà thonga ná saa na ná kpa dhona.”

42 Yesu dhungʉeri kpa tso: “Ni ká d’erie ndi ndini ná i lo ro zø nzá? “Bu dza chi ná kpa bungʉe ná dju i vengʉe ngʉ dza kób’ɨ djó bbò dju.* Fø lo si Yova* dhó ro ndirigoti ri kʉ ké ka ndi ké le nanga ná lo ko nyǒ djó.” 43 Ri kʉ føri dzá lo dho i ma ripo ni dho, Mungu dhó Pidhinga le si dzidzi nidhó ro ndirigoti le si ri bbʉ nì ri kpa ó ná ndrŭ dhona. 44 Godhé, ddikpa ke bʉni fø dju djo ró, ke nanga si d’rɨni d’rɨ ndirigoti ddikpa ke djo fø dju bʉni ró, ke nanga ri si d’rid’ri.

45 Yesu bbʉ ná fø loroji bbakuhani djó bbobbonga ma, Bbafarisayo ma na rrngʉe ro, kpa chungʉeri chu ke loti ndima djo. 46 Nì mai kpa ngʉ riji ndima lø* ke ro, kpa ngʉ birobiro kʉ ná ndrŭ do nji, dhonalo ndrŭ njangʉe Yesu ddikpa nabi.