Matayo

14 Fø saa na, Galilea nǎ Guverner* Herodi rrngʉe lo Yesu djo, 2 ndirigoti ke pongʉeri ndidhó njí dhi kpa dho: “Føri kʉ Yohani Mubatizaji. Ke ga che cheni ná ndrŭ kana ro ndirigoti ri kʉ føri dho i ke kʉ ddù njidha dhi kpakpanga na ri.” 3 Herodi* løngʉe Yohani ndirigoti ke sʉngʉe ke prizo na, ndidhi djona Filipo bbá le Herodia djó. 4 Dhonalo Yohani ngʉ ripo Herodi ni: “Ri tso nzá uni ni kø Herodia ri.” 5 Nì mai Herodi ngʉ rine ndi hwi Yohani hwi ro, ke ngʉ birobiro kʉ ná ndrŭ do nji dhonalo ndrŭ ngʉ ke nja nabi. 6 Herodi ngʉ ndi gøni ná ddo dhi fete nji ná dyi, Herodia dzá singba ngba bengʉeni fete dho singʉe ná ndrŭ njí, ná føri thongʉe Herodi nyǒ bbo, 7 ndirigoti ke tsongʉeni ndi ngba kó ná ritsi krʉ bbʉbbʉ ngba dho. 8 Føro ndidzá mama chò ndi ro ngba pongʉeri: “Abbʉ Yohani Mubatizaji djǒ ma dhona iga pla djó.” 9 Fø lo bbʉngʉe njedha bbo pi thí dho, ro nyo ndima ngʉ nyo na ná ndrŭ njí ndi njingʉe ná tsodha djotsina, ke jangʉeri le bbʉ Yohani djǒ fø singba dhona. 10 Føro ke chongʉe ddikpa ke ndi rá Yohani djǒ krr prizo na. 11 Le singʉe Yohani djǒ na pla djó ndirigoti le bbʉngʉe ri singba ngba dhona ndirigoti ngba mbangʉe ri ndidzá mama dhona. 12 Føri goti Yohani unakpa singʉe kedzá bʉ d’u ndirigoti kpa rangʉe ke d’ød’ø, ná føri goti kpa rangʉe fø lo d’ra Yesu dho. 13 Fø lo ndi rr ro Yesu tungʉeni føga ro bbú nǎ ndirigoti ke rangʉe di nga ndrŭ ro kʉ ná ngana ndi rá di ddiro d’e. Ro, føri ndima rr ro birobiro ngʉe ná ndrŭ rangʉe føga lu ngʉe ná bba gʉ lu ro ke ulu ndima kó na.

14 Bbú nǎ ro Yesu ngʉ thʉni ro, ke njangʉe birobiro kʉ ná ndrŭ kpari; ke ndrŭ dhiri zø njingʉe ndirigoti ke gøngʉe ndrŭ ró dhe. 15 Ngasdjó nga singʉe ro, ke unakpa singʉe ke dhi ngana ndirigoti kpa pongʉeri ke dho: “Iga nga kʉ nga tsotso ndirigoti saa dada; ró apori i ndrŭ rará ndiro kpa rá nyo dzi ndima nyó bbaka lu d’e.” 16 Føro Yesu ngʉngʉe kpadhó logoti: “Ri nzá ngani fø ndrŭ rárá ri; anibbʉ nyo kpa nyó ni niro.” 17 Kpa pongʉeri ke ni: “Kodhó nga ritsi ro kʉ ri; kodhó kʉ mukati mbʉ ndidhi bbè aro na dhé.” 18 Ro, ke pongʉeri kpa dho: “Anisi ri na iga ma dhona.” 19 Ndirigoti ke jangʉeri birobiro kʉ ná ndrŭ dho ndrŭ di tsó djolu. Føri goti ke dzingʉe mbʉ ngʉe ná mukati ma, aro ngʉe ná bbè ma na. Røna ndi ngbe ndi nyǒ ro ke nzingʉe ledha ri djo, ke bbʉngʉe ri ndi unakpa dhona ndirigoti kpa ndongʉe ri birobiro ngʉe ná ndrŭ dho. 20 Fø ndrŭ krʉ nyongʉe nga ndirigoti kpa o lingʉe li. Nyo gʉ di nari tso kpa gbangʉe dyó 12 lu pɨpɨ. 21 Fø nyo nyongʉe ná kpetsi kpa ngʉe chøchø 5 000, nzá le zø isɨ ndrŭ ma, nzø ma na ro. 22 Føri goti thei, ke pongʉeri ndi unakpa dho, kpa dji bbú na ndirigoti kpa dá jʉdda djolu adzɨ, go ndi ripo birobiro kʉ ná ndrŭ rá ná saa na.

23 B’lo ndi pori ndrŭ rá nari goti, ke djingʉe ngøtsɨ djo ndi rá sala nji, ndirigoti nga tɨngʉe ke ro følu ddiro ndi kʉ ro. 24 Bbú rangʉe dda tso ró ro metre* mia kpari b’lo ndirigoti ri nanga dda-gru ngʉ dyá dhonalo nga ngʉ vʉ kpa si nǎ ro ná nga laidjo. 25 Chøchø nga si bbʉ ro Yesu singʉe kpa dhi ngana dda djó ndi bbí ro. 26 Ke unakpa njangʉe ke dda djó ndi bbí ro ná saa na, kpa do løngʉe bbo ndirigoti kpa ngʉ ripo: “I ri ká kʉ addu ko nja ri!” Ndirigoti kpa do ngʉ nji nari dho kpa ngʉ hø ngbe. 27 Føro thei, Yesu pongʉeri kpa dho: “Aniko ni jotso! I ri kʉ ma ró, nzɨ ni nji do.” 28 Føro Petro pongʉeri: “Bboke, rie bbʉbbʉ ri kʉ ni ró, apori ma si ni dhi ngana dda djó.” 29 Ke pongʉeri: “Asi!” Føro Petro thʉngʉeni bbú nǎ ro ndirigoti ke dingʉe bbi dda djolu Yesu dhi ngana ndi ra ro. 30 Føri goti ke njangʉe dda djó nga vʉ bbo nari ro, ke do løngʉe ndirigoti ke ngangʉe dda na ndi ko nari tso, ro ke høngʉe: “Bboke agø ma!” 31 Føro thei Yesu ddangʉe ndi thó ro ke løngʉe Petro, ndirigoti ke pongʉeri: “Ni sese dhó udha kʉ ná ke, ni ká bbari ni nanga rɨni addudho?” 32 Bbú na kpa dji nari goti fø bbò vʉvʉ tso gongʉe thei. 33 Føro bbú nǎ ngʉe ná kpa kongʉeni ndima d’eti djo ke nji ndirigoti kpa pongʉeri: “Bbʉbbʉ dhé, ni kʉ Mungu Ddù.” 34 B’lo kpa da jʉdda djolu nari goti, kpa singʉe Genezareti dhi ngø na.

35 Fø ngø nǎ ndrŭ njangʉe Yesu nyi ro, ndrŭ d’rangʉe ke si fø bba nari fø ngø tsotso lu ngʉe ná ngø lu krʉ ndirigoti ndrŭ singʉe dhe dhi ndrŭ krʉ na ke dhi ngana. 36 Ndrŭ ngʉ ddoni ke ró, ke bbari ndima lø ndi ró arugu rù tsodjo ronga kpali. Ndirigoti ri ronga lø ná ndrŭ krʉ gøngʉe gø.