Luka

16 Føri goti ke pongʉeri ki ndi unakpa dho: “Mali dhi ddikpa ke dhó ritsi djó nga ngʉ adi nja ná ke ndrŭ bbøngʉe nari kʉ, ke mali dhi ke dhó ritsi sasa. 2 Føri dho mali dhi ke nzingʉe ke ro, ke pongʉeri ke ni: ‘Ni djo ma rr ná føri ká kʉ ngbá lo? Adho ngbaribbai ma ni njinjí madhó mali na nari ma dho, dhonalo njʉnga djó ro nzɨ ni madzá ritsi djó nga ki nja ri.’ 3 Føro ritsi djó nga ngʉ nja ná ke ngʉ riddi ɨ ndi thí nǎ: ‘Madzá bboke pori nzɨ ma ndidhó mali djó nga ki nja. Nde, kpadjo ká ma rinji ngbǎ? Ma ro nga kʉ kpakpanga na nza bbɨdha dho ri. Ndrŭ tsó le nga kó nari adi do pá ma djo. 4 Aah! ma chu ma ka ma njí ná lo b’lo, ndiro ke si ma pʉpʉ ndidhó njí nǎ ro ná saa na, ndrŭ si ma koko ndima bba d’e.’ 5 Føro ke nzingʉe ndidzá bboke dhó mbø ngʉe nǎ ná ndrŭ kana ddi ke ndirigoti ke dhungʉeri ke tso: Ni nǎ ká madzá bboke dhó ddeni kʉ thɨ?’ 6 Ke ngʉngʉe logoti: ‘Olive dhi ché le ddi 100 ina ná ngatsi.’* Ke pongʉeri ke dho: ‘Adzi nidhó kotra ndirigoti adi gʉna ndirigoti andiri tse, ni nǎ ri kʉ 50.’ 7 Føri goti ke dhungʉeri nja ke tso: ‘Nde, ni nǎ ká ri kʉ thɨ?’ Ke pongʉeri: ‘Ri kʉ 100 ina le ddi ngano bbobbo no* nǎ ná ngatsi. Føro ke pongʉeri: ‘Adzi nidhó kotra ndirigoti andiri ni nǎ ri kʉ 80.’ 8 Bboke mangʉe ndidhó mali djó nga ngʉ adi nja ná fø ke ma, dhonalo nga mai ke kʉ chølo dhi ke ro, ke njingʉe njí nyod’yu* na. Dhonalo i dz’* ddui adi lo nji ndima lai ndrŭ dho nyod’yu na pli, kadha ddui djolu.

9 “Godhé ma ripo ni dho: Aninji bbakau ni dho i dz’ djó nga kʉ chø ná mali chulu ndiro ri sie nga ná saa na, kpa si ni ko cho ró nŭnŭ ni ka ni di ná ngana d’e. 10 Ddikpa ke é chi sese kʉ ná ritsi nǎ ró, fø ke sie chi bbo kʉ ná ritsi nǎ maddi, ro ddikpa ke é chi nga, sese kʉ ná ritsi nǎ ró, fø ke ro nga sie chi bbo kʉ ná ritsi nǎ maddi ri. 11 Føri dho, rie nzɨ ni e ni dhǒ chi kʉ ná ke, nga kʉ chø ná mali na ni njínji nari kana ri ró, føro ká ie ka ndi li ndi thí ni djo bbʉbbʉ kʉ ná mali kana? 12 Ndirigoti rie nzɨ ni e ni dhǒ chi kʉ ná ndrŭ, nga kʉ nidhi ri ná mali na ni njínji nari kana ri ró, føro ká ie ka ndi ve ritsi bbʉ ni nganga dho? 13 Ddikpa njí dhi ke ro ma nga ddi ka ndi é aro kʉ ná bbobbokpa dhó noke ri; dhonalo ke si ddi ke ndrondro ndirigoti ndi ji nja ke ji, inga ke si chini ddi ke na ndirigoti ndi bé nja ke pá. Ni dho nzá ri ro ka ndi ka ni é nokpá Mungu dho ndirigoti mali dho ri.”

14 Mbø jingʉe ná Bbafarisayo ngʉ fø lo rrrr ndirigoti kpa ngangʉe Yesu gbodha tso. 15 Føri dho ke pongʉeri kpa ni: “Ni ni nji chølo dhi kpa ndrŭ nyǒ njí, ro Mungu chu ni thí ngbà. Dhonalo bbo na mana kʉ ndrŭ nyǒ njí ná føri e ndro Mungu ndro ná lo.

16 “Yadha ma, Bbanabi ma na ngʉe kpø Yohani djo. Fønga djó ro adi d’rani ná hwè lo-i kʉ Mungu dhó Pidhinga, ndirigoti njonjo kʉ ná ndrŭ adi kpakpanga nji ndima tso si ri djo d’e. 17 Bbʉbbʉ dhé, ra ma, dz’ ma na da nari kʉ sʉsʉ pli Sheria nǎ sese pli kʉ ná lo lai njini nzɨ nari djolu.

18 “Ddikpa ke kló ndoa nanga ndibbá le na ndirigoti ke kø d’i le ró, fø ke nji uzinifu.* Ndirigoti ddikpa ke kø kloklo ndoa nanga ndibbá ke na ná le ró, fø ke nji uzinifu.*

19 “Ddikpa ke dhó mali ngʉe bbo; ná fø ke ngʉ adi bbo ró dzì kʉ ná bbo d’ani ná rù njø ndirigoti krʉ ddo ró ke ngʉ adi di hwè dhi maisha nǎ. 20 Lazaro ró dho ngʉe ná nga ngʉ adi kó ná ddikpa ke ndrŭ ngʉ adi si mba kebbá dzaitso ro, ndirigoti ke ndí lu chengʉe kilonda, 21 ná fø ke ngʉ adi riji ndi ngu ndi mali dhi ke dhó mesa djó ro d’røni ná nyo tso kúku na. Bbʉbbʉ dhé, tsɨ ngʉ adi si ke ró kilonda nanga d’a. 22 Cho ngʉ da nari bbai, nga ngʉ adi kó ná fø ke dhengʉe dhe, ndirigoti malaiká mbangʉe ke Abrahamu kuso.*

“Føri goti mali dhi fø ke ma dhengʉe dhe ddi ndirigoti le d’øngʉe ke d’ø. 23 Ro, Kabuli* nǎ ke ngʉ nzani ná nga nǎ ro, ke njangʉe Abrahamu da ngana, Lazaro kʉ ndi kuso* ro. 24 Føro ke jøngʉe nga ndirigoti ke pongʉeri, ‘Baba Abrahamu abe zø ma djo, acho Lazaro nja ke ti ndi thó-kpa djǒ dda na ndirigoti ke si ma dà ronga ze dhonalo ma nzani che, bbo pli rø ná i kazz nǎ.’ 25 Føro Abrahamu pongʉeri, ‘Madzá ngba anonga nari kʉ, ni bangʉe bí kʉ ná bblo ritsi shi ni ngʉe ná saa na, ro Lazaro bangʉeni che kʉ ná lo na dhé, kpadjo ke ndi isopɨdha ba iga, ro ni nzani nza.’ 26 Føri kina, ni ma na kʉ ko kana ddikpa bbo kʉ ná bbù, føri dho ko kʉ ná nga nǎ ro ji ndima da ni kʉ ná ngana ná ndrŭ dho nzɨ ri ro ka ri, ndirigoti ni kʉ ná ngana ro ma nzɨ ddi ndrŭ ro da ko kʉ ná ngana ri. 27 Føro ke pongʉeri, ‘Baba njati rie fø ró, acho Lazaro madzá baba bbá dza na, 28 dhonalo ma djoi kʉ mbʉ, ndiro ke rá nji njini ná i lo dzá bbʉbbʉnga d’ra kpa dho nja nzɨ kpa maddi si nzadha dhi i ngana ró. 29 Ro, Abrahamu pongʉeri, ‘Kpa kʉ Musa ma, Bbanabi ma na na, abbari kpa rr fø kpa.’ 30 Ke pongʉeri: ‘Nzɨ baba Abrahamu, njati ddikpa ke rá che cheni ná ndrŭ kana ro kpa dhi ngana ró, kpa leni le.’ 31 Ke ngʉngʉe kedhó logoti: ‘Njati kpa rr Musa ma, Bbanabi ma na dhó lo nzá ró, kpa nzɨ si che cheni ná ndrŭ kana ro ga ná ke dhó lo ro ma u ddi ri.’”