Luka

17 Ke pongʉeri ndi unakpa dho: “Bʉ ka ndi bʉ le ná ritsi tso ro nzɨ nyini ri. Nì mai ri kʉ fø ro, njedha bʉ ka ndi bʉ le ná ritsi si chulu ná ke dho! 2 Ri kʉ bblo pli le sʉ kana adi drr ná ngaudha dhi dju fø ke chu ndirigoti le bu ke jʉdda d’u djo, rere i kpa kana ddikpa ke, ke bʉ nari djolu. 3 Anib’o ni ronga. Njati nidhi djona njí chenga ró, ao ó ke na ndirigoti ke leni ngbà ró, anji ke zø nji. 4 Njati ke tani ni dho 7 ina ma ddikpa cha ndirigoti ke si ni dhi ngana 7 ina i, ɨ ndi ripo ro, ‘Ma leni le’ ró, ringani ni njí ke zø nji.”

5 Føro cho le cho ná kpa pongʉeri Bboke dho: “Andri kodhó udha ki ndri.” 6 Føro Bboke pongʉeri: “Njati nidhó udha ée haradali dhi tsu-kpa tsi ró, ni ka ni poeri tɨtɨ kʉ ná i kǎ dhi tsú ni, ‘Angbeni iga ro, ni rá ni zʉ jʉdda na’, ndirigoti ri ka ndi rrnga rr ni dho.

7 “Ni kana njí dhi ke kʉ dhó ná ngbá ke i ká ka ndi pori ndidhó njí dhi ke dho, nza gʉ ro inga miya ró ke ra rø ná nga nǎ ro ke si ró: ‘Asi tse mesa tso ro ni nyonga d’e’? 8 Ro, føri rɨngana ká ke ka ndi pori ɨ nzá: ‘Arɨ nyo ma nyó, awø ni ró rù thika ndirigoti ni kó ma tsotso kpø ma d’ya nganyodha ma, jødha dhi ritsi ma na tso ná nga djo, ná føri goti i ni ve kʉ nganyo ndirigoti jødha dhi ritsi jø? 9 Ke nzá ka ndi po mbai ro fø njí dhi ke dho ri, dhonalo njí dhi ke nji ndi dho ringaeni ndi njí ná njí, ri ká nga fø ri? 10 Føri bbai, b’lo ni nji ni dhona le bbʉ ná njí nari goti anipori: ‘Ko kʉ nzá ro ka ddikpa madha dho maddi ná nokpá. Dhonalo ko nji ko dho ngaeni ko njí ná njí dhé.’”

11 Yerusalemu na ke ngʉ ra ro, ke dangʉe Samaria ma kana lu Galilea na. 12 Ddikpa bba kana ke ngʉ tsu ro, korøkorø kʉ ró ná kumi kʉ ná kpa singʉe ke dhi ngana, ro kpa tøngʉeni da ngana. 13 Føro kpa jøngʉeri: “Yesu, Mwalimu, abe zø ko djo!” 14 Kpa ke nja ro, ke pongʉeri kpa dho: “Anira ni dho bbakuhani dho.” Ro, go kpa ra chu nǎ ro, kpa ró korøkorø singʉe sini thei.” 15 Kpa kana ddikpa ke njangʉe ndi ró dhe gøgø nari ro, ke ngʉngʉe ndi goti bbobbo ndi chu na ndi Mungu má ro. 16 Ke kongʉeni Yesu kó tsena gʉna ndi nganja ro ndirigoti mbai ndi po ke dho ro. Føri kina, føri ngʉe Samaria nǎ ke. 17 Føro Yesu dhungʉeri: “Kumi ni e ro ká ni gøe krʉ nzá? Nde, tisa kʉ ná nja kpa ká kʉ ngbaga? 18 D’i ngø nǎ i ke ró ro ká ddikpa ke ki ro ma ngʉ nzá ndi bbʉ madha Mungu dho d’e?” 19 Føro Yesu pongʉeri fø ke dho: “Adani, arara ni dho, dhonalo nidzá udha gø ni gø.”

20 Bbafarisayo dhungʉe ngbá saa na ma Mungu dhó Pidhinga si nari ke tso, ro ke ngʉngʉe logoti: “Mungu dhó Pidhinga si nari nzɨ krʉ ndrŭ si nja pʉlʉpʉlʉ ri; 21 ndirigoti ndrŭ nzɨ si ri ro po ɨ maddi ri: ‘Aninja, ri ena!’ inga ‘Ri chána!’ Dhonalo Mungu dhó Pidhinga kʉ ni kana.”

22 Føri goti ke pongʉeri ndi unakpa dho: “Gosi si ná ddo na ni si rine ni nja ndrŭ Ddù si si ná ddo, ro ni nzɨ si ri ro nja ri. 23 Føri goti ndrŭ si kʉ ripo ni dho, ‘Aninja chána!’ inga ‘Aninja ena!’ Nzɨ ni ra følu ndirigoti nzɨ ni d’a kpa ulu. 24 Vo chá nari adi nga í rakpa ró ddi nga laidjó ro kpø nja nga laidjo nari bbai, ndrŭ Ddù si si ná ddo maddi sie føri bbai. 25 Ro, ya kwanza ringani ke dá bí kʉ ná nzadha lu ndirigoti i gø gʉ ke gʉ. 26 Noa cho nǎ ri ngʉe nari bbai, ri sie ndrŭ Ddù si ná ddo na maddi. 27 Ndrŭ ngʉ nganyo, jødha dhi ritsi jø, kpetsi kpa ngʉ dhɨ kø, isɨ ndrŭ ngʉ køni kø kpø Noa tsu safina na ndirigoti bbò Dji ko, ndi ché kpa krʉ ná nga djo. 28 Godhé, Loti cho nǎ ri ngʉe nari bbai, ndrŭ ngʉ nganyo, jødha dhi ritsi jø, ngadzi, ritsi nanga dzi, ngazʉ, ndirigoti dza chi. 29 Ro, Sodomu nǎ ro Loti vʉ ná dyi, kazz dhi dji ma, rørø ná dju ma na kongʉe ra nǎ ro ndirigoti ri chengʉe kpa krʉ. 30 Ndrŭ Ddù si dhoni ná dyi maddi ri sie føri bbai.

31 “Fø dyi, ddikpa ke é dza djó le chi ná ngana, ro kedhó ritsi é adzá ró, nzɨ ke thʉni ndi rá fø ritsi sø, ndirigoti nza gʉ é ná ke dho nzá ringani ndi ngʉ ndi goti kʉ ná ritsi sødha dho ri. 32 Anino Loti bbá le ró njingʉeni ná lo nga. 33 Njati ddikpa le di rine ndi b’o ndidhó shinga* ronga ró, fø le si ri vivi. Ro, ddikpa le vi ndidhó shinga vi ró, fø le si ri ronga b’ob’o. 34 Ma ripo ni dho, fø dyi kuna, aro kʉ ná ndrŭ sie ddikpa ra djó, ddikpa ke le si dzidzi ndirigoti ddikpa ke le si bbabba. 35 Aro kʉ ná isɨ ndrŭ sie ddikpa dju djó ndima ngau ro, ddikpa le le si dzidzi ndirigoti ddikpa le le si bbabba.” 36* — 37 Kpa dhungʉeri ke tso: “Ká ngbaga, Bboke?” Ro, ke ngʉngʉe logoti: “Bbŭ dhi rè si ndima tso nju, bʉ kʉ ná ngana.”