Luka

19 Føro ke tsungʉe Yeriko na ndirigoti ke ngʉ da ri lu. 2 Føga ngʉe ná ddikpa ke ró dho ngʉe Zakayo; føri ngʉe kitas tso nju ná ke ndirigoti ke ngʉe mali. 3 Ke ngʉ riji ndi nja Yesu ká kʉ ie ma nari, ro birobiro kʉ ná ndrŭ dzá lo dho ke dho nzá ri ro kangʉeri dhonalo ke dhingʉe dʉ. 4 Ke d’angʉe anzi ndirigoti ke singʉe dji sikomore dhi tsú djo, ndiro ndi nja Yesu d’e dhonalo Yesu ngʉ si da fø chu lu. 5 Zakayo ngʉe ná fø ngana Yesu si ro, ke ngbengʉe ndi nyǒ røna ro, ke pongʉeri: “Zakayo athʉni lele dhonalo njʉ ringani ma di ni bbá.” 6 Føro Zakayo thʉngʉeni lele ndirigoti ke kongʉe Yesu ndi bba bbò hwè na. 7 Fø lo ndrŭ njangʉe ná saa na, ndrŭ krʉ nanga ngʉ nŭnŭ ɨ ndima ripo ro: “I ke ra di chenga dhi ke bbá.” 8 Ro, Zakayo dangʉeni ndirigoti ke pongʉeri Bboke dho: “Bboke, anja! ma madhó ritsi nanga ndo ddiddi nari lai ma ndo njedha dhi ndrŭ dho. Ndirigoti dhʉ dhó ritsi ma dhʉe* ná ndrŭ krʉ dho ma ri ngʉ tho ina.” 9 Føro Yesu pongʉeri ke dho: “Njʉ gødha si i dzá dhonalo ke maddi kʉ Abrahamu dhi dduna.” 10 Dhonalo ndrŭ Ddù singʉe ndiro ndi ne ndirigoti ndi gø vivi ná ndrŭ d’e.”

11 Fø lo ndrŭ ngʉ rr ná saa na, Yesu bbʉngʉe nja loroji ki dhonalo ke ngʉe chøchø ndi si Yerusalemu na ndirigoti ndrŭ ngʉ riddi nari kʉ, Mungu dhó Pidhinga ka ndi dhoeni thei fø saa na. 12 Føri goti ke pongʉeri: “Ddikpa pi dza nǎ ke ngʉ ra da ngø na ndiro le li ndi pi ndirigoti ndi ngʉngʉ d’e. 13 Føri goti ke nzingʉe ndidhó njí dhi kpa kana ro kumi kʉ ná kpa ndirigoti ke bbʉngʉe mina* kpa dhona kumi ndirigoti ke pongʉeri, ‘Aninji turusa i mbø na kpø ma ngʉ ná nga djo.’ 14 Fø ngø nǎ ndrŭ ndrongʉe ke ndro nari dho, ndrŭ chongʉe ngø ró dho na le cho lo-i mbadha dho ná kpa* ke ulu ndima rá ripo, ‘Ko nzá ji fø ke ngʉ pi ko bba ri.’

15 “B’lo le li ndi pi* nari goti ke ngʉ ro, ke nzingʉe mbø* ndi bbʉe dhona ná ndidhó njí dhi kpa ndiro ndi chu kpa ká bae ngbá faida ma turusa nǎ ro nari d’e. 16 Føro ya kwanza kʉ ná ke singʉe ro, ke pongʉeri: “Bboke, nidhó mina nǎ ro nja mina ki si kumi.” 17 Kedzá bboke pongʉeri, ‘Ni njiri bblo, ni kʉ bblo kʉ ná njí dhi ke! Dhonalo ni dho ni chi kʉ ná ke sese pli kʉ ná ritsi nǎ, anyopi kumi kʉ ná vile djo.’ 18 Føri goti ya pili ke singʉe ndirigoti ke pongʉeri: “Nidzá mina ki si mbʉ.” 19 Fø ke dho maddi ke pongʉeri, ‘Anyopi mbʉ kʉ ná vile djo.’ 20 Føri goti nja ke singʉe ndirigoti ke pongʉeri, ‘Bboke, nidhó mina ena, ma rue ri ddikpa rù na. 21 Nidzá lo do e ma njinji, dhonalo ni tsɨ sarieni che; ni adi nzá ni lie ná ritsi dzi ndirigoti ni adi nzá ni zʉe ná nyo tso njú.’ 22 Kedhó bboke ngʉngʉe logoti ke dho: ‘Ma lod’i ni djo ni tso nǎ lo nganga ró ro: Ni kʉ che kʉ ná noke. Ni churi nari kʉ, ma adi nzá ma lie ná ritsi dzi ndirigoti ma adi nzá ma zʉe ná nyo tso njú, ri ká nga fø ri? 23 Nde, føro ká ni lie madhó mbø* bake na nzá addudho? Føro ma ngʉ ró, ma sie ri ro b’lo ri ki ndrini ro.

24 “Føro ke pongʉeri føga ngʉ tøni ná kpa dho: ‘Anidzi mina kedhó ro ndirigoti anibbʉ ri kumi ri kʉ dhó ná ke dhona.’ 25 Føro kpa pongʉeri: ‘Nde bboke, fø ke dhó mina kʉ kumi!’ 26 ‘Ma ripo ni dho, nì dhó ri kʉ ná ke dho le si ri ki ndrindri, ro nga dhó ri kʉ ná ke dhó ro le si nì kʉ ke dhó nari gʉ ma dzidzi ddi. 27 Føri kina, anisi madhó mbubai kʉ ná nzá jieri ma nyopi ndima djo ná kpa na iga ndirigoti aniche kpa nì ma njanja ro.’”

28 Fø lo ke po nari goti, ke rangʉe anzi dhé, Yerusalemu na ndi ra ro. 29 Chøchø ke si Betefage na ndirigoti Betania nǎ Mizeituni dhi ngø kuso ná saa na, ke chongʉe ndi unakpa kana aro kʉ ná kpa, 30 ke pongʉeri: “Anira ni njí ni nja ná bba gʉ, ndirigoti fø bba gʉ ni si ró, ni si nzá djo ndrŭ ro d’erie dji ná kana dzá ngba ro. Aniklo ri ndirigoti anisi ri na iga. 31 Njati ddikpa ke dhuri ni tso: ‘Ni ká ri kló addudho?’ ró, ringani ni pori, ‘Bboke dhó lo u ri.’” 32 Føro cho ke chongʉe ná kpa rangʉe ro, kpa singʉe ri ro ke poe ndima dho nari nganga bbai. 33 Ro, kana dzá ngba kpa ngʉ kló ro, ri baí pongʉeri: “Ni ká fø kana dzá ngba kló addudho?” 34 Kpa pongʉeri: “Bboke dhó lo u ri.” 35 Kpa mbangʉe ri Yesu dhi ngana ndirigoti kpa hungʉe ndima ró arugu rù ri djo nari goti kpa lingʉeri Yesu dji ri djo.

36 Ra ke ngʉ ra ro, kpa ngʉ ndima ró arugu rù hú chu lu. 37 Chøchø ke ngʉ si Mizeituni dhi ngøtsɨ djó ro thʉ ná chu na ná saa na, ke una birobiro kʉ ná ndrŭ krʉ ngangʉe hwè ndima nji nari tso ndirigoti Mungu ndima má bbobbo ndima chu na ndima njangʉe ná ddù krʉ djotsina nari tso. 38 Ndrŭ ngʉ ripo: “Yova* ró dho na si ná Pi ronga leni le! Ngoi é ra nǎ ndirigoti madha é arø bbo ngbeni ná nga nǎ!” 39 Føro birobiro kʉ ná ndrŭ kana ro, nja Bbafarisayo ngʉ ripo ke ni: “Mwalimu, ata ni unakpa djó.” 40 Ro, ke ngʉngʉe logoti kpa dho: “Ma ripo ni dho, njati kpa gogo ma ró, dju ma ka ndima jø ndima nanga jø dhé.”

41 Ro, chøchø ke singʉe ro, ke njangʉe Yerusalemu ro ke dzzngʉe dzz ri djó, 42 ɨ ndi ripo ro: “Njati ni maddi d’ie ngoi bbʉ ná lo utso njʉ ró! Ro, kpadjo le ru ri rú ni nyǒ djó ro. 43 Dhonalo ddikpa cha nidhó mbubai si lubba chi ni ro lu tsa tso ndima tsa ná tsú na, kpa si ni ronga tso d’e ndirigoti ni nanga b’ʉ* krʉ nga laidjó ro. 44 Kpa si ni d’rɨd’rɨ lu ndirigoti kpa si nidzá nzø tso d’ød’ø, nari goti kpa nzɨ si ddikpa dju ro ma bba nja dju djo ni bba ddi ri, dhonalo ni nzá chu ni tso kpa loe ná saa ri.”

45 Føri goti Yesu tsungʉe hekalu na ro, ke ngangʉe ritsi nanga ngʉ dzi ná kpa didha tso, 46 ɨ ndi ripo kpa ni ro: “Ri ndini, ‘Madzá dza sie sala dhi dza’, ro ni liri fø dza ngʉ gbʉ dhi kpa ra runi ná nga.”

47 Ke rangʉe anzi dhé krʉ ddo ró ndi longaddi hekalu nǎ nari na, ro bbakuhani djó bbobbonga ma, nga ndi ná kpa ma, ndrŭ dhó nja bbobbokpa ma na ngʉ rine ndima hwi ke hwi. 48 Ro, kpa nzá bangʉe ke ndima hwi ná chu ro ddikpa maddi ri dhonalo ndrŭ krʉ b’angʉe b’a ke ró ke ti ná lo rrdha dho.