Luka

20 Ddikpa cha hekalu nǎ ke ngʉ longaddi ndirigoti hwè lo-i d’ra ndrŭ dho ro, bbakuhani djó bbobbonga ma, nga ndi ná kpa ma, ngó kpa ma na singʉe ke dhi ngana, 2 ndirigoti kpa dhungʉeri: “Apori ko dho di, ni nji ná fø ritsi ká ni nji ie chu na? Inga ni dho ká ie bbʉ fø bbonga?” 3 Yesu ngʉngʉe logoti kpa dho: “Ma maddi ngʉ ddikpa lo ro i dhu ni tso, ndirigoti anid’rari ma dho: 4 Yohani ngʉ bbʉ ná batiso ká singʉe ra nǎ ro inga ndrŭ dhó ro?” 5 Føro kpa ngangʉe lonanganedha tso ndima kana ɨ ndima ripo ro: “Njati ko pori ‘Ri si ra nǎ ro’ ró, ke si ridhu ko tso: “Nde, føro ká ni ungʉe ke nzá addudho?” 6 Ro, njati ko pori, ‘Ndrŭ dhó ro’ ró, ndrŭ krʉ si ko bu dju na, dhonalo kʉ, ndrŭ uri u Yohani ngʉe nabi.” 7 Føri dho, kpa ngʉngʉe logoti ndima nzá churi ri. 8 Ro, Yesu maddi pongʉeri kpa ni: “Ma ma nzɨ ddi d’ra ma ká fø lo nji ie chu na nari ni dho ri.”

9 Føro ke ngangʉe lotidha tso ndrŭ dho i loroji djo: Ddikpa ke zʉngʉe divai mbi, føri goti ke ma rrngʉeni nza bbɨ ná kpa na ndima di fø nza gʉ o ná ritsi nanga ndondo ndirigoti ke rangʉe d’i ngø na bicha ddo dho. 10 Divai tso njudha dhi saa si ro, ke chongʉe ndidhó njí dhi ke nza bbɨ ná kpa dhi ngana ndiro kpa bbʉ divai kpa ro ndi dho d’e. Ro, kpa ngʉngʉe ke nga dhó ritsi ro b’lo ndima nji ke nji nari goti. 11 Ro, ke chongʉe njí dhi nja ke ki kpa dhi ngana, ná fø ke maddi kpa njingʉe nji, kpa pangʉe do ke djo* ndirigoti kpa ngʉngʉe ke nga dhó ritsi ro. 12 Føri goti ke chongʉe gbo na ri si ná ke; ná fø ke ronga maddi kpa vongʉe vó ndirigoti kpa bungʉe ke nza nǎ ro bbaidjo. 13 Føro divai nza dhi ke pongʉeri, ‘Ma ká ka ma njiri ngbǎ?” Ma madhi dduna bbo ma ji ná ke cho. Njaro fø ke dho kpa ka ndima bbʉ heshima ngbà.’ 14 Nza bbɨ ná kpa nja le ddù ro, kpa ngʉ riti ndima kana, ‘I ri i kʉ mali si che dho ná ke, akohwi ke hwi ndiro mali ché ko dho d’e!’ 15 Føri dho, kpa drrngʉe ke divai dhi nza nǎ ro ndirigoti kpa hwingʉe ke hwi. Nde, divai ba nganga ká si ngbá lo nji nza bbɨ ná fø kpa ró? 16 Ke si kʉ si ndirigoti ke si nza bbɨ ná fø kpa cheche ndirigoti ke si divai dhi nza bbʉ d’i kpa dhona.”

Fø lo ndima rr ro, kpa pongʉeri: “Nzɨ fø di lo ro njini ngbá dyi maddi.” 17 Ke njangʉe kpa chøø ro, ke pongʉeri: “Nde, føro ndi ndini ná i lo na mana ká kʉ addu: ‘Bu dza chi ná kpa bungʉe ná dju i vengʉe ngʉ dza kób’ɨ djó bbò dju’?* 18 Ddikpa ke bʉni fø dju djo ró, ke nanga si d’rɨni d’rɨ ndirigoti ddikpa ke djo fø dju bʉni ró, ke nanga ri si d’rid’ri.”

19 Nga ndi ná kpa ma, bbakuhani djó bbobbonga ma na jingʉeri ndima lø ke fø saa na thei dhonalo kpa famungʉeri nari kʉ ke ngʉ loti ndima djo fø loroji chulu, ro kpa ngʉ ndrŭ do nji. 20 B’lo ndima nja ke li ndima li ndima d’yu ro nari goti, kpa kpengʉe nja kʉ ná kpetsi kpa, ná kpa njí ndima chølo dhi kpa ndiro ndima lø ke, ke tso nǎ lo chulu nari goti ndima bbʉ ke bbobbonga ma, guverner ma na dhona d’e. 21 Kpa dhungʉeri ke tso: “Mwalimu, ko churi chu ni adi ti ná lo ma, ni ddi ná lo ma na e d’ʉ, ni nzɨ adi ndrŭ nanga ro krø ri, ro ni ddi Mungu djo nari kʉ bbʉbbʉ kʉ ná lo: 22 Nde, Kaisari dhó palata le wø nari tso ká uni u inga nzá?” 23 Yesu d’ingʉe kpadhó mayele utso ro, ke pongʉeri: 24 “Anibbʉ dinari* ro ddikpa ma nja di. Ri djó kʉ ná i ri ká kʉ ie ró ji ndirigoti ie ndi ná lo?” Kpa ngʉngʉe logoti: “Kaisari.” 25 Føro Yesu pongʉeri: “Nde føro, anibbʉ Kaisari dzá ritsi Kaisari dho, ndirigoti Mungu dzá ritsi Mungu dho.” 26 Føri dho, kpa dho nzá ri ro kangʉe ndima lø ke, ke tso nǎ lo chulu ndrŭ kpari nyǒ njí ri, ro kpa nanga kengʉeni ke, ke ngʉ goti ná lo dho. Fønga djó ro kpa gongʉe thei ke una ro.

27 Ro, nzá urie gadha ná kpa, Bbasadukayo kana ro nja kpa singʉe ke dhi ngana ndirigoti kpa dhungʉeri ke tso: 28 “Mwalimu, Musa ndingʉeri ko dho nari kʉ, njati ddikpa ke dhi djona dhe nga dzá nzø ro ndirigoti kebbá le i má shi ró, fø ke dho ringani ndi kø ndidhi djona bba ná fø le ndiro ndi liri ndidhi djona nǎ gø rá anzi d’e.’ 29 Nde, ddikpa kpetsi kpa ngʉe ndima bbá ro 7. Føro ya kwanza ke køngʉe dhɨ, ro ke dhengʉe nga dzá nzø ro. 30 Nari goti ya pili ke køngʉe fø le, ná ke ró maddi ri njingʉeni fø, 31 ndirigoti ya tatu ke køngʉe le. Saba kʉ ná fø kpa krʉ ró ri njingʉeni fø; kpa krʉ chengʉeni nzá ndima ba nzø ro. 32 Mwisho, isɨle gʉ ma dhengʉe dhe ddi. 33 Nde, ga ndrŭ ve di ga ná dyi, fø kpa kana ká fø le si che ie dho? Dhonalo 7 kʉ ná fø kpa krʉ køngʉe le kø.”

34 Yesu ngʉngʉe logoti kpa dho: “I dz’* djó kpetsi kpa ma, isɨ ndrŭ ma na adi ndima køkø, 35 ro ngbà tso si uni ndima si di gosi ná saa na ndirigoti ndima si ga che cheni ná ndrŭ kana ro, ná fø ndrŭ ro nzɨ si kʉ køni ndima kana ri. 36 Bbʉbbʉ dhé, kpa ki ro nzɨ si cheni che maddi ri, dhonalo kpa sie malaiká bbai ndirigoti kpa kʉ Mungu dzá nzø, gadha dzá nzø ndima kʉ nari chulu. 37 Che cheni ná ndrŭ si gaga, ná føri Musa maddi dhongʉe pʉlʉpʉlʉ kpelé dhi kúkú djo tilo ná lo nǎ. Ke nzingʉe Yova,* ‘Abrahamu dzá Mungu, Isaka dzá Mungu ndirigoti Yakobo dzá Mungu.’ 38 Ke kʉ shi di ná ndrŭ dhi Mungu, nga che cheni ná ndrŭ dhi Mungu ri, dhonalo ke nyǒ djó kpa krʉ kʉ shi.” 39 Fø lo ndima rr ro, nga ndi ná kpa kana nja kpa pongʉeri: “Mwalimu ni po bbʉbbʉlo.” 40 Dhonalo kpa ki ro nga ngʉe klø na ndima dhú ddikpa lo ki ro ma Yesu tso ddi d’e ri.

41 Føro Yesu dhungʉeri kpa tso: “Nde, ndrŭ ká adi ripo Kristo kʉ Daudi dhi dduna addudho? 42 Dhonalo Daudi nganga i pori Zaburi dzá buku nǎ: ‘Yova pongʉeri madzá Bboke dho: “Adi ma thó thá djó ri laidjo, 43 kpø ma nidhó mbubai li ni kó ni li djo ná ritsi bbai ni kó tsena ná nga djo?”’ 44 Nde, rie Daudi i nzi ke ndidzá Bboke ri ró, føro ká ke kʉ Daudi dhi dduna ngbaribbai?”

45 Føro, krʉ kʉ ná ndrŭ ngʉ ke ti ná lo rr ná saa na, ke pongʉeri ndi unakpa dho: 46 “Anib’o ni ronga nga ndi ná kpa ró, ndima ró dadá robe na ndima jiri ndima di bbí ro, kpa jiri ndrŭ di ndima ronga zʉ soko lu, sinagogi lu kpa adi riji ndima di anziro* kʉ ná kiti djolu ndirigoti ngasdjó nyo dhi saa na, kpa adi riji ndima di bbo pli kʉ heshima dhi ri ná ngana. 47 Che bbá kpetsi kpa cheni ná isɨ ndrŭ dhó ritsi kpa sø krʉ, kpa dadá kʉ ná sala nji ndrŭ nja ndima d’e. Kpa djo le si lod’i che bbo.”