Luka
9 Føri goti ke nzingʉe ndi una 12 kʉ ná kpa ndirigoti ke bbʉngʉe kpakpanga ma, bbonga ma na kpa dho, ndiro kpa di krʉ kʉ ná gó ndirigoti kpa gø dhe d’e. 2 Føri goti ke chongʉe kpa ndiro kpa rá Mungu dhó Pidhinga d’ra ndirigoti kpa gø ndrŭ d’e. 3 Føri kina ke pongʉeri kpa dho: “Nzɨ ni dzi ddikpa ritsi ro maddi ni dhona chu nǎ bbi dho, gongo ma nzɨ ddi, nyo dhi kpʉ ma nzɨ ddi, mukati ma nzɨ ddi, mbø* ma nzɨ ddi ndirigoti nzɨ ni d’u rù aro.* 4 Ro, ni tsu ddikpa dza na ró, anidi føga kpø ni tuni tu fø bba gʉ ro ná nga djo. 5 Ndirigoti ddikpa bba gʉ ndrŭ kó ni nzá ró, fø bba gʉ ro ni tuni ró, anicho ni ko ró hø, ndiri é lo dzá bbʉbbʉnga dhǒ ná lo kpa dho d’e.” 6 Føga ro kpa tuni nari goti, kpa ngʉ da krʉ kʉ ná bba gʉ lu, i vilaje nǎ ro nja vilaje na, hwè lo-i ndima d’ra ndirigoti dhe ndima gø krʉ kʉ ná nga lu ro.
7 Galilea nǎ guverner Herodi* rrngʉe nji njini ná fø lo krʉ ná saa na, ke djǒ nanga fø lo ngbʉngʉe bbo dhonalo nja ndrŭ ngʉ ripo ri kʉ Yohani ga che cheni ná ndrŭ kana ro ri. 8 Nja ndrŭ ngʉ ripo ri kʉ Eliya si ri, ndirigoti nja ndrŭ ngʉ ripo, ri kʉ drrdrr ngʉe ná bbanabi kana ddikpa ke ga ri. 9 Herodi pongʉeri: “Yohani djǒ ma krr e krr. Nde, fø di ná lo ma rr djo ná føri ká kʉ ie?” Føri dho ke ngʉ rine ndi nja ke.
10 Yesu unakpa ngʉngʉe ná saa na, kpa d’rangʉe ndima nji ná lo krʉ ke dho, føri goti ke dzingʉe kpa ndima kpali ro ndirigoti ke ma rangʉe kpa ma na Betsaida le nzǐ ná vile na. 11 Birobiro kʉ ná ndrŭ chungʉe fø lo ná saa na, ndrŭ rangʉe ke ulu. Yesu kongʉe fø ndrŭ bblo ndirigoti ke ngangʉe longaddidha tso ndrŭ dho Mungu dhó Pidhinga djo ndirigoti ngbà dhó lo ungʉe gødha ná ndrŭ ke gøngʉe gø. 12 Ngasdjó nga ngʉ si ro, ke una 12 kʉ ná kpa singʉe ke dhi ngana ndirigoti kpa pongʉeri ke dho: “Acho i ndrŭ, i nga tsotso lu kʉ ná vilaje ma, nza ndrŭ adi bbɨ ná nga ma na lu ndiro kpa ba ddo dhi nga ma, nyo ma na d’e, dhonalo iga ko kʉ nga tsotso.” 13 Ro, ke pongʉeri: “Anibbʉ nyo kpa nyó ni niro.” Kpa ngʉngʉe logoti: “Kodhó nga kʉ ritsi ro ri, rie nga mukati mbʉ ndidhi bbè aro na dhé ri ró, ro njaro ká ni ripo ko rá nyo dzi i ndrŭ kpari krʉ nyó ko koro.” 14 Føga ngʉe ná kpetsi kpa ngʉe chøchø 5 000. Føro ke pongʉeri ndi unakpa dho: “Anipori ndrŭ di gʉgʉlu 50 ndima nju ndima tso ro.” 15 Kpa njingʉeri fø ndirigoti ndrŭ krʉ dingʉe gʉgʉlu. 16 Føro ke dzingʉe mbʉ ngʉe ná mukati ma, aro ngʉe ná bbè ma na ndirigoti ke njangʉe nga røna nari goti ke lengʉe ri ronga. Ke d’rɨngʉe ri nanga ndirigoti ke bbʉngʉe ri ndi unakpa dhona, ná kpa ndongʉe ri birobiro kʉ ná ndrŭ dho. 17 Fø ndrŭ krʉ nyongʉe nga ndirigoti ndrŭ o lingʉe li ndirigoti nyo tso kúkú gʉ di nari tso le gbangʉe d’yó* 12.
18 Luti ddiro ke ngʉ sala nji ro, ke unakpa singʉe ke dhi ngana ndirigoti ke dhungʉeri kpa tso: “Birobiro kʉ ná ndrŭ ká ripo ma kʉ ie?” 19 Kpa ngʉngʉe logoti: “Yohani Mubatizaji, ro, nja ndrŭ ripo Eliya, ndirigoti nja ndrŭ ripo ri kʉ drrdrr ngʉe ná bbanabi kana ddikpa ke ga ri.” 20 Ke dhungʉeri kpa tso ɨ: “Nde, ni ká ripo ma kʉ ie?” Petro ngʉngʉe logoti: “Mungu dzá Kristo.” 21 Føri goti ke jangʉeri kpa dho li ndi li ndi d’yu ro, nzɨ kpa d’ra fø lo ro ddikpa le dho maddi. 22 Ro, ke pongʉeri: “Ndrŭ Ddù dho ringani ndi da bí kʉ ná nzadha lu ndirigoti ngó kpa ma, bbakuhani djó bbobbonga ma, nga ndi ná kpa ma na si ke gʉgʉ ndirigoti kpa si ke hwihwi, ro ddo gbo djó ke si gaga.”
23 Føri goti ke pongʉeri kpa krʉ dho: “Njati ddikpa ke jiri ndi rá ma ulu ró, fø ke dho ringani ndi gʉ ndi ndi ndiro, ndi d’ú ndidzá nzadha dhi tsú* krʉ ddo ró ndirigoti ndi di ra ma ulu. 24 Njati ddikpa le di riji ndi gø ndidhó shinga* gø ró, fø le si ri vivi, ro njati ddikpa le vi ndidhó shinga* ma djotsina ró, fø le si ri gøgø. 25 Njati ddikpa ke dho ngø che lu, ro ke vi ndidzá shinga i vi inga ke ba sadha ró, føri dzá bblonga ká kʉ addu? 26 Dhonalo, njati ddikpa ke djo do di pá ma djotsina ndirigoti madzá lo djotsina ró, ndrŭ Ddù djo maddi do si pa fø ke dzá lo djotsina, ndidzá kadha ma, ndidzá Baba dzá ri ma, takatifu kʉ ná malaiká dhi ri ma na nǎ ndi si si ná dyi. 27 Bbʉbbʉ dhé, ma ripo ni dho, iga kʉ ná ndrŭ kana nja ndrŭ ro nzɨ cheni nzá ndima d’e Mungu dhó Pidhinga nja ro ri.”
28 Fø lo ke po ná nga djó ro, ddo da 8 nari goti, ke dzingʉe Petro ma, Yohani ma, Yakobo ma na ndirigoti kpa djingʉe ngøtsɨ djo nja ndima rá sala nji d’e. 29 Sala ke ngʉ nji ro, ke nyǒ djó nga lengʉeni le ndirigoti ke ró rù ngʉngʉe sawø ndirigoti ri ngʉ chacha. 30 Føro anja! ke ma ngʉ loti aro kʉ ná kpetsi kpa na, føri ngʉe Musa ma, Eliya ma na. 31 Kadha nǎ singʉe ná fø kpa ngangʉe lotidha tso kedhó bbi djo, føri ngʉe Yerusalemu na ke si ra nari. 32 Petro ma, ndi lai aro kʉ ná kpa ma na nyǒ ddo ngʉ nji bbo, ro b’lo kpa nyǒ nǎ ddo sini krʉ nari goti, kpa njangʉe kedhó kadha ma, ke kuso ngʉ tøni ná aro kʉ ná kpa ma na. 33 Tu kpa ngʉ tuni Yesu kuso ro ná saa na, Petro pongʉeri ke dho: “Mwalimu, ri kʉ bblo ko di iga. Føri dzá lo dho, abbari ko chi bbadza gbo iga; ddikpa ri ni dho, ddikpa ri Musa dho ndirigoti ddikpa ri Eliya dho.” Ke nzá chungʉe addu ma ndi ngʉ po nari ro ri. 34 Go ke ngʉ fø lo po ro, ddikpa ndundu ngangʉe kpa djó nga tso tsɨdha tso; b’lo ri tsɨ kpa djó nga tso nari goti, do løngʉe kpa bbo. 35 Føri goti ddikpa lechu pongʉeri ɨ ndundu nǎ ro: “I ri kʉ madhi Dduna, vʉ ma vʉ ná ke. Anirrnga ke dho.” 36 Fø lechu tilo nari goti, Yesu mangʉe ddiro. Ndirigoti ke unakpa gongʉe ddi fø lo djo ddikpa ddo ro kana ndirigoti kpa nzá d’rangʉe ndima nja ná fø lo ro ddikpa le dho maddi ri.
37 Fø bbʉdyi ngøtsɨ djó ro kpa ngʉ thʉ ro, birobiro kʉ ná ndrŭ kpari singʉe Yesu dhi ngana. 38 Ndirigoti anja! fø ndrŭ kana ro ddikpa ke jøngʉe ndi nanga: “Mwalimu ma rinzi ni tso, kirikiri ako madhi dduna tsotso, dhonalo ke kʉ madzá ddikpa dhé kʉ ná ngba. 39 Ddikpa gó adi tsu ke na, ndirigoti ke adi hø tso nga chʉ, ri adi ke nanga ja kpakpanga na ndirigoti ke nǎ ro b’usa adi ra, ri ve adi ra vʉ ke nǎ ro kpakpanga na, b’lo ndi vo ke ronga nari goti. 40 Ma nzieri ni unakpa pʉ ri ke nǎ ro, ro kpa tsonga ri gʉe gʉ.” 41 Yesu ngʉngʉe logoti: “Nga dhó udha kʉ ná sa sani ná i gø, ni na ká ma di thɨcha ndirigoti ni tso ká ma ve thɨcha? Asi nidhi dduna na iga.” 42 Ro, Yesu dhi ngana ngba ngʉ si ro, gó bʉngʉe ngba gʉna, ri jangʉe ngba nanga che sani. Føri goti Yesu tangʉe gó djó, ke gøngʉe ngba ndirigoti ke bbʉngʉe ngba ledzá baba dhona. 43 Krʉ kʉ ná ndrŭ nanga kengʉeni ke Mungu dzá kpakpanga dzá bbonga dho.
Go ndrŭ nanga ngʉ keni ke nji ná lo krʉ dzá lo dho ná saa na, ke pongʉeri ndi unakpa dho: 44 “Anirrnga bblo ndirigoti anino i lo nga: Ndrŭ Ddù si bbʉni ndrŭ thó thina.” 45 Ro, ke po ná fø lo na mana ro nzá kpa famungʉeri, bbʉbbʉ dhé fø lo na mana rungʉeni ru kpa ró ndiro nzɨ kpa famu ri ró ndirigoti nga ndima dhu ke tso fø lo djo nari do ngʉ kpa njinji.
46 Føro gʉ tangʉe kpa kana ndima kana ie ká kʉ bbo ma nari djó. 47 Yesu chungʉe kpa ngʉ ddi ná lo chu nari dho, ke dzingʉe ddikpa re ngba nø ndirigoti ke lingʉe ngba ndi kuso. 48 Ndirigoti ke pongʉeri kpa dho: “Ddikpa ke kó i ngba ma ró dho djotsina ró, fø ke ko ma maddi. Ndirigoti ddikpa ke kó ma ró, fø ke ko cho chongʉe ma ná Ke maddi. Dhonalo sese kʉ nari bbai njini ni krʉ kana nari i kʉ bbo pli kʉ ná ke.”
49 Føri goti Yohani pongʉeri: “Mwalimu, ko njae ddikpa ke ni ró dho na ndi gó pʉ ro, ro ko mbueri ko gʉ ri gʉ ke dho dhonalo ke nzɨ ko dyø ri.” 50 Ro, Yesu ngʉngʉe logoti: “Nzɨ ni mburi ni gʉ fø ke tso, dhonalo nzɨ ddani ni tso ró nari kʉ ni laidjó kʉ ná ke.”
51 Ra na ke sie ngʉ ná ddo ngʉe chøchø nari bbai, ke vʉngʉeri ndi rá tete Yerusalemu na. 52 Føri dho ke chongʉe lo-i mba ná kpa ndi njí, ná fø kpa tsungʉe Samaria nǎ ddikpa vilaje na ndiro ndima thɨnga ke dho d’e. 53 Ro, fø bba gʉ ndrŭ nzá kongʉe ke ro ri dhonalo ke vʉngʉeri ndi rá Yerusalemu na. 54 Yakobo ma, Yohani ma na nja fø lo ro, kpa dhungʉeri ke tso: “Bboke, ni ká jiri ko nzi kazz ra nǎ ro ndiri ché kpa d’e?” 55 Ke lengʉe ndi thí kpa dhi ngana ndirigoti ke ongʉe ó kpa na. 56 Føro kpa rangʉe nja d’i vilaje na.
57 Chu nǎ kpa ngʉ ra ro ddikpa ke pongʉeri Yesu dho: “Ma si ra ni ulu ni ra ná nga krʉ lu.” 58 Ro, Yesu pongʉeri ke dho: “Nzerr e ndima dhó bbù na, rakpa ró rè e ndima dhó dza na, ro ndrŭ Ddù la ndi djǒ ná nga ro nga kʉ ri.” 59 Føri goti Yesu pongʉeri nja d’i ke dho: “Angʉ ma unake.” Ro, ke pongʉeri: “Bboke, abbari ma rá madzá baba d’ø vi.” 60 Ro, Yesu ngʉngʉe kedhó logoti: “Abba che cheni ná ndrŭ d’ø ndima dhi che cheni ná ndrŭ, ro ara Mungu dzá Pidhinga d’ra.” 61 Ndirigoti nja ke ki pongʉeri ɨ: “Bboke ma si ra ni ulu nì, ró abbari ma rá mabbá dza nǎ ndrŭ ronga i zʉ vi.” 62 Yesu ngʉngʉe logoti: “B’lo ddikpa ke ngá nza bbɨdha tso zǎ adi drr ná ritsi na, ro i ke di nganja aluti ró, fø ke nzá ka Mungu dhó Pidhinga dho ri.”