Luka

10 Føri goti Bboke vʉngʉe nja kpa ki 70 ná kpa ke chongʉe roro ro njonjo kʉ ná vile lu, føri ngʉe ke nganga ngʉ si ra ná nga. 2 Føro ke pongʉeri kpa dho: “Nyo o bbo, ro njí dhi ndrŭ i kʉ sese. Aninziri nyo tso njudha dhi Bboke chó njí dhi ndrŭ ki ndidzá nyo tso njudha dho. 3 Anirr di! Anira! Ma ni cho chembø dzá nzø bbai tsó nǎ tsɨ kana. 4 Nzɨ ni d’u mbø ma, nyo dhi kpʉ ma, ss ro ma nzɨ ddi ndirigoti nzɨ ni zʉ ndrŭ ronga ro* chu nǎ. 5 Njati ni tsu ddikpa dza na ró, ya kwanza anipori ɨ: ‘Ngoi é i dza nǎ.’ 6 Ngbà ji ngoi ná ke é føga ró, anibbari nidhi ngoi di ke djó, ke é nga ró anibbari nidhi ngoi ngʉ ni dhi ngana. 7 Anidi fø dza nǎ, aninyonga ndirigoti anijø jødha dho le bbʉ ni dho ná ritsi dhonalo njí dhi ke kaka ndi kobe dho. Nzɨ ni di tsɨ i dzá ro cha dzá.

8 “Godhé, ddikpa vile na ni tsu ro, ndrŭ kó ni ngbà ró, aninyo ni nyó ndrŭ bbʉ ná nyo nyo. 9 Ndirigoti ni gø fø bba dhe nji ná ndrŭ ndirigoti ni d’rari ɨ kpa dho: ‘Mungu dhó Pidhinga kʉ chøchø.’ 10 Ddikpa vile na ni tsu ro ndrŭ kó ni nzá ró, anivʉ fø bba gʉ bbobbo chu na ndirigoti ni pori ɨ: 11 ‘Nidhi bba gʉ ro b’ae ko kó ro ná hø ko cho ni djó, ro anichuri nari kʉ, Mungu dhó Pidhinga i kʉ chøchø.’ 12 Ma ripo ni dho, Sodomu dhó lo ro sie bblo fø dyi, fø bba gʉ ndrŭ dhó ri djolu.

13 “Njedha ni dho, Korazini! Njedha ni dho, Betsaida! dhonalo ni bbá njini ná ddù kpari njieni Tiro nǎ ndirigoti Sidoni nǎ ró, fø bba gʉ ndrŭ eé drrdrr ndima leni saki ndima tho ndima ro ndirigoti hu nǎ ndima di nari chulu ro. 14 Føri dho, lod’idha dhi ddo dyina Tiro ma, Sidoni ma na dhó lo ro sie bblo nidhó ri djolu. 15 Ndirigoti ni, Kapernaumu, ni ká riddi ni si ngbeni kpø ra na? Ni le si kʉ thʉ kpø Kabuli* na!

16 “Njati ddikpa ke rr ni po ná lo ró, fø ke rr ma po ná lo maddi. Ndirigoti ni gʉ ná ke, gʉ ma maddi. Føri kina ma gʉ ná ke, gʉ cho chóngʉe ma ná Ke maddi.”

17 Føro, 70 kʉ ná kpa ngʉngʉe hwè na, ɨ ndima pori ro: “Bboke, gó ma rrnga ko dho krʉ, ni ró dho na ko njinjí ro.” 18 Føro ke pongʉeri kpa dho: “Ma Shetani nja b’lo ndi d’e ra nǎ ro, vo adi chá nari bbai ro. 19 Anirr di! Ma bbʉ bbonga ni dho, ni tsí su ma, ranga ma na nanga d’e ndirigoti ni si nidhó mbuba dhó kpakpanga krʉ djolu d’e. Bbʉbbʉ dhé ddikpa ritsi ma nzá ddi ka ndi njí ni ro che ri. 20 Nì mai ri kʉ fø ro, nzɨ ni nji hwè gó djøni ni dho nari dho, ro aninji hwè ni ró dho ndini ra nǎ nari dho.” 21 Fø saa nganga na dhé, Yesu bangʉe hwè bbo roho takatifu chulu ndirigoti ke pongʉeri: “Ma madha bbʉ ni dho pʉlʉpʉlʉ, Baba, ra ma, dz’ ma na dhi Bboke, dhonalo ni ru i lo nyod’yu dhi ndrŭ ma, bbo zønga ná ndrŭ ma na ró; ndirigoti ni dho fø lo rere nzø dho. Kɨɨ Baba, bbʉbbʉ dhé, ni njangʉeri ri kʉ bblo ni njiri fø. 22 Madzá Baba bbʉ krʉ kʉ ná ritsi ma dhó ndirigoti kedhi Dduna ká kʉ ie nari ro nzá ddikpa le ma chu ddi ri, rie nga Baba dhé ri ró, ndirigoti Baba ká kʉ ie nari ro nzá ddikpa le ma chu ddi ri, rie nga kedhi Dduna dhé ndirigoti kedhi Dduna jiri ndi dhǒ Baba dho ná ke dhé ri ró.”

23 Føri goti ke lengʉe ndi thí ndi unakpa dhi ngana ro, ke pongʉeri kpa kpali dho: “Hwè na kʉ nari kʉ, kpadjo ni nja ná ritsi nja ná ndrŭ. 24 Dhonalo, ma ripo ni dho, bí kʉ ná bbanabi ma, pikpa ma na nengʉeri ndima nja ni nja ná fø lo, ro kpa nzá njangʉe ri ro ri ndirigoti ndima rr ni rr ná fø lo, ro kpa nzá rrngʉe ri ro ri.”

25 Føro anja! bbo chu Yadha ná ddikpa ke singʉe Yesu dhi ngana ndi mbu ke d’e ndirigoti ke dhungʉeri: “Mwalimu, ma dho ká ringani ma njí addu ndiro ma ba cho ró nŭnŭ di ná shinga d’e?” 26 Yesu dhungʉeri ke tso: “Yadha nǎ ká ri ndirieni ngbǎ? Ri nǎ ká ni adi ngbá lo zø?” 27 Ke ngʉngʉe logoti: “‘Ringani ni ji Yova* nidzá Mungu ni thí nǎ ro krʉ, nidhó nafsi* na krʉ, nidhó kpakpanga na krʉ ndirigoti nidzá ngaddidha na krʉ,’ føri goti ‘ni ji ni lai ni nganga ni ji nari bbai.’” 28 Yesu pongʉeri ke dho: “Ni ngʉ logoti d’ʉ; adi rinji fø ndirigoti ni si shinga ba.”

29 Ro, ke ngʉ ji ndi dhǒ ndi chølo dhi ke nari dho, ke dhungʉeri Yesu tso: “Nde, d’ʉ ká ma lai kʉ ie?” 30 Føro Yesu ngʉngʉe ke dho logoti ɨ: “Ddikpa ke ngʉ thʉ Yerusalemu nǎ ro Yeriko na, ro ke singʉe d’e gbʉ dhi kpa thó thina. Kpa søngʉe kedhó ritsi krʉ, kpa klongʉe ke ró rù ndirigoti kpa njingʉe ke nji. Kpa bbangʉe ke chøchø ke si dhedhe ro. 31 Føro, ddikpa kuhani ngʉ thʉ fø chu nganga lu, ro ke njangʉe ke ro, ke pengʉe fø ke rolu dadá. 32 Føri bbai ddikpa Mulawi singʉe fø ngana ro, ke njangʉe ke ro, ke maddi pengʉe ke rolu dadá. 33 Ro, Samaria nǎ ddikpa ke ngʉ da fø chu lu ro, ke singʉe ke kʉ ná ngana ro, ke njangʉe ke ro, ke fø ke dzá ri zø njingʉe bbo. 34 Føri dho, ke ndringʉeni ke kuso ro, ke ddongʉe ché ma, wa ma na ke ró kilonda djo, ndirigoti ke chingʉe ri chi. Føri goti ke d’ungʉe ke ndi nganga dhó zǎ djo, ke mbangʉe ke lʉ si ná ndrŭ dhó dza na ndirigoti ke gbangʉe ke dhó lo tso krʉ. 35 Bbʉdyi ke bbʉngʉe dinari* aro fø dza ronga ngʉ adi b’o ná ke dho ndirigoti ke pongʉeri: ‘Ab’o i ke ronga bblo ndirigoti i mbø djolu ni ví ná mbø ma si ngʉ ni dho krʉ ma si ngʉ ná dyi.’ 36 Ni ká riddi, gbʉ dhi fø kpa thó thina d’ee ná fø ke lai dho ndi, gbo kʉ ná fø kpa kana ro nari kʉ ie?” 37 Ke pongʉeri: “Ri kʉ zølo dho ke dho ná fø ke.” Føro Yesu pongʉeri ke dho: “Ara ndirigoti ni njiri fø nganga.”

38 Chu lu kpa ngʉ ra ro, Yesu tsungʉe ddikpa vilaje na. Føro Marta ró dho kʉ ná ddikpa le kongʉe ke ndi bba. 39 Fø le dhi vena ró dho ngʉe Maria, ná fø le ngʉ di gʉna Bboke kotɨ ndirigoti le ngʉ ke ti ná lo rr. 40 Ro, Marta nzɨ ngʉ ke ti ná lo ro rr ri, dhonalo le ró njí ngʉe bí. Føro le singʉe Yesu dhi ngana ndirigoti le pongʉeri: “Bboke, madhi vena bba ma ddiro njí tso ró, ná føri ká ni nja bblo dhé? Apori le si ma tsotso ko.” 41 Bboke ngʉngʉe logoti le dho: “Marta, Marta, ni nanga rid’o ndirigoti ni ni djǒ nanga ngbʉ bí kʉ ná ritsi kpari na. 42 Ro, lazima kʉ ná ritsi kʉ sese, inga ddikpa dhé. Ro, Maria vʉ bblo kʉ ná lo,* ndirigoti ri ro nzá ka ndi tuni le dhó ro ri.”