SOMO 52
Ko thó ná ru ma, ko ronga ko thɨ nari ma na ká ringani ko nja mana na addudho?
Ko krʉ adi riji ko thó ko ronga ndirigoti ko thɨ ko ronga ko ji nari bbai. Njati rie nì ko njínji Biblia nǎ kanuni na ri ró, ko ka ko thó ko ronga ndirigoti ko thɨ ko ronga ngbà ka ndi bbʉ hwè Yova dho nari bbai. Akonja fø kanuni ro.
1. Ko di longa vʉ ru djo ndirigoti ko ronga thɨdha djo ná saa na ká ngbá kanuni ka ndi kó ko tsotso?
Kodho ringani ko vʉ ná rie “ngbà thonga ná ru, kiasi na kʉ ná ru, ndirigoti ni kodhó akili kʉ bblo ro” ndirigoti krʉ ddo ró akodi tse ko tse ro ndiro nja ndrŭ nja ko “kʉ chi kodhi Mungu dho nari d’e.” (1 Timoteo 2:9, 10) Akonja fø 4 kʉ ná kanuni: (1) Ringani ko ró ru é “ngbà ndi thonga ro.” Njudha dhi ngana ni adi rinja nari bbai, Yova dzá ndrŭ nzɨ adi ru thó ddiddi ri, ro kpa ró ru ma, kpa djoka kpa thɨ nari ma na adi heshima bbʉ ko má na Mungu dho. (2) “Kiasi” na ko ru thó nari na mana kʉ nzɨ ko thó ngono dhi tamaa ka ndi tsu ndrŭ na ná ru inga bbo ka ndi drr ndrŭ dhó nganjadha ko djo ná ru. (3) Ko “kʉ bblo kʉ ná akili na” nari ko adi dhǒ nzɨ ko ko ronga thó inga ko ko ronga thɨ dz’ dzá ndrŭ adi rinji nari bbai nari chulu. (4) Krʉ ddo ró, ko ronga ko thɨ nari dho ringani ndi dhori ko kʉ “chi nì Mungu dho,” ndiro ndrŭ churi ko bbʉbbʉ Mungu má d’e.—1 Wakorinto 10:31.
2. Ká adduho ringani ko ddinga ko djoi ma ko vei ma na djo ko thó ná ru ko vʉ nari njí?
Ngbà mai ko ka ko thó ko ronga ko ji nari bbai ro, kodho ringani ko ddinga ngbaribbai ma ri ka ndi lø nja ndrŭ ronga nari djo maddi. Ko adi kpakpanga nji ndiro nzɨ ko bʉ ddikpa le thí ro maddi ró, ro ko adi “nji nari kʉ [ko] lai nyǒ tho ná lo kedzá bblonga dho, ndiro ko li ke kpakpa d’e.”—Azø Waroma 15:1, 2.
3. Ko ronga ko thɨ nari ká ka ndi cho nja ndrŭ ngbaribbai nja ndima chulo Yova djo d’e?
Nì mai ko adi riji ko thó ko ronga bblo krʉ saa ró ro, njudha dhi ngana ko ra ndirigoti lo ko ra d’ra ró, ko adi ko ronga thó bblo pli. Ko nzɨ adi riji ndrŭ nanga di rɨni ko d’ra ná hwè dhi lo-i djo ko thó ná ru dzá lo dho ri. Føri rɨngana, bblo ko ko ronga thɨ nari ka ndi liri bí kʉ ná ndrŭ chulo ko njínji dho ná Mungu Yova djo ndirigoti ri ka ndi “thɨ kodhi Gødha ba dhó mafundisho ronga thɨ.”—Tito 2:10.
ANE LONANGA BBO
Anja ko ka ko njí ná lo ndiro ko ronga ko thó nari ma, ko ronga ko thɨ nari ma na dhǒ ko kʉ Wakristo nì nari d’e.
Ngbaribbai ma ko tho ko ronga nari i ka ndi dhǒ ko ká heshima bbʉ nì ma, inga nzɨ ma bbobbonga na kʉ ná kpa dho nari. Nì mai ri kʉ fø ro, Yova adi ko thí nja, føri dzá lo dho ringani ko thɨ ko ronga ngbà ka ndi bbʉ heshima ke dho nari bbai
4. Bblo ko ko ronga thɨ nari na ko adi heshima bbʉ Yova dho
Ko adi ngaddi bbo ko ronga ko thɨ nari djo dho nari ká kʉ addu? Azø Zaburi 47:2, ndirigoti anitilo i ngadhudha djo:
Njati ko churi ko thó ná ru ka ndi lø nja ndrŭ dhó nganjadha ronga ma Yova djo ddi ró, ká ringani ko vʉ lo nanga ngbaribbai?
Ni ká riddi ri kʉ bblo ko thɨ ko ronga njudha dho ndirigoti lod’radha dho? Ká addudho inga nzá addudho?
5. Ko thó ná ru djo inga ko ronga ko thɨ nari djo ká ko ka ko vʉ lo nanga bblo ngbaribbai?
Rie bí ró dzi kʉ ná ru ma inga sese ró dzi kʉ ná ru ma ko thó ri ró, ringani rie tse ndi tse ro ndirigoti ngbà kaka ko kʉ nǎ ná nga dho ná ru. Azø 1 Wakorinto 10:24 ndirigoti 1 Timoteo 2:9, 10. Ndirigoti anitilo addudho ma ringani nzɨ ko thó . . .
tɨtɨ ná ru.
Chíchi le ná ru, le ndí ró nzá ka ndi njani ná sehemu dhǒ ná ru inga ngono dhi tamaa ka ndi tsú ndrŭ na ná ru.
Nga mai Wakristo kʉ Musa dhó Sheria tse na ro, fø sheria chulu kpa ka ndima chu Yova dhó ngaddidha bbo. Azø Kumbukumbu la Torati 22:5, ndirigoti anitilo i ngadhudha djo:
Addudho ká ringani nzɨ kpetsi ke thó ndi ronga inga ndi thɨ ndi ronga isɨle bbai inga isɨle thó ndi ronga inga ndi thɨ ndi ronga kpetsi ke bbai?
Azø 1 Wakorinto 10:32, 33, ndirigoti 1 Yohana 2:15, 16, ndirigoti anitilo i ngadhudha djo:
Ndiro nzɨ ko bʉ ko lai ndrŭ inga kutaniko nǎ ndrŭ thí ró, ká ringani ko nja ko ronga ko thó ngbaribbai ma nari bblo addudho?
Ni di ná eneo nǎ ká ndrŭ jirie ndima di ndima ronga thó inga ndima ronga thɨ ngbaribbai?
Ni ká ddiri fø lé le ronga thó inga lé le ronga thɨ nari kana kʉ nzá thonga Mukristo dho nari maddi? Ká addudho? Inga nga addudho?
Ko ka ko thó ko ronga ndirigoti ko thɨ ko ronga njonjo kʉ ná chulu ndirigoti føri ka ndi bbʉ hwè Yova thí dho
NJA NDRŬ ADI RIPO: “Ma ka ma thó ma ji ná ru.”
Ni ma ká adi rinja fø i? Ká addudho inga nzɨ addudho?
LO DZÁ DɄNGA
Njati ko di lo nanga vʉ bblo ko ronga ko thó inga ko ronga ko thɨ nari djo ró, føri na ko adi heshima bbʉ Yova dho ndirigoti nja ndrŭ dho.
Lo djolu le ngʉ nari
Ko ronga ko thó nari ma, ko ronga ko thɨ nari ma na ká kʉ bbo na mana kʉ ná lo Yova dho addudho?
Ko ronga thɨdha djo ko lo nanga vʉ nari kana ká ngbá kanuni ka ndi ddá chutso ko dho?
Ko ronga ko thó nari ká ka ndi liri nja ndrŭ é ngbá nganjadha na ko bbʉ ná madha djo?
NI KA NI CHU NÁ NJA LO
Anja ni thó ná ru ká ka ndi liri ndrŭ nja ni ngbǎ di ke nari.
Aneri ni chu addudho ma ri kʉ nyodyu dhi lo ni ddi lo nga vi nzøla ni ji ni ro nari njí nari.
“Biblia Inasema Nini Juu ya Mutu Kujichanja Alama Kwenye Mwili?” (Jw.org djó kʉ ná lo)
Anja ko tsotso ka ndi kó ná kanuni ndiro ko vʉ lo nanga bblo d’e.
“Mavalio Wako Unamutukuza Mungu?” (Munara wa Mulinzi, Mwezi wa 9, 2016)
Anja ddikpa le tsotso kongʉe ná lo ndiro le gba ndi tso nja ndrŭ vʉ nanga ndima ronga thodha djo ndirigoti ndima ronga thɨdha djo ná lo na d’e.
“Namna ya Kuvala na Kujipamba ya Wengine Ilikuwa Nanikwaza” (Amuka!, 22 Mwezi wa 12, 2003)