Mungu Dhó Pidhinga Ká Kʉ Addu?

1. Ko ká si loti bbo chuni ná ngbá sala djo?

BÍ KɄ ná nrŭ chú rie kodhi Baba le adi nzi ná sala ngba. Fø sala chulú Yesu ddi ngbaribbai ma le ka le nzinga nari ndi unakpa dho. Ke ká nzingʉe nga ngba lo djo? Fø sala na mana ká kʉ bbo ko dho njʉ addudho?

2. Yesu ká ddingʉeri ko dí nganzi ngbá gbo kʉ ná bbobbó lo djo?

² Yesu pongʉeri: “Nidho ringani ni nzinga iri bbai: ‘Kodhi Baba ni kʉ rà nă, aliri ni rodho mani [inga ri tsetse]. Aliri nidhó Pidhinga si. Aliri ni ji nalo njini dz’ djo ddiddi rà nă ri njini naribbai.’” (Azø Matayo 6:9-13.) Yesu ká ddingʉeri ko dí nganzi fø gbo kʉ ná lo djo addudho?​—Anja Longatudha 20.

3. Mungu dhó Pidhinga djo ká ringani ko chú ngba lo?

³ Ko chueri Mungu rodho kʉ Yova. Ko chu Mungu ká ji ngba lo nrŭ dho ndirigoti dz’djò nari maddi. Yesu ká ngʉ ji ndi pori ngba ke pongʉeri “Aliri nidhó Pidhinga si” ná saa na? I sura nă kosi Mungu dhó Pidhinga ká kʉ addu nari chu, ri kasi ngba lo nji, ndirigoti ngbaribbai ma ri kasi rili Mungu rodho mani nari.

MUNGU DHO PIDHINGA KA KɄ ADDU?

4. Mungu dhó Pidhinga ká kʉ addu, ndirigoti ri nă pi ká kʉ ie?

⁴ Yova li rà nă Pidhinga ndirigoti ke vʉ Yesu ndie ri nă pi. Biblia adi rinzi Mungu dhó Pidhinga. Yesu kʉ “pikpa djó pi ndirigoti bbobbokpa djó bboke.” (1 Timoteo 6:15) Yesu ka ndi nji bblo lo nrŭ dho krʉ kʉ ná pikpa djolú, ndirigoti ke kʉ kpakpanga na bbo fø pikpa djolú.

5. Mungu dhó Pidhinga ká kʉ ngbaga? Ri kasi pinyo addu djo?

⁵ Yesu ga nari goti ddo dangʉe 40 ro, ke ngʉngʉe rà nà Yova li Yesu ndidhó Pidhinga nă pi. (Matendo 2:33) Mungu dhó Pidhinga kʉ rà nă, ro ri si kʉ pinyo dz’djo. (Ufunuo 11:15) Fø ridho Biblia nzi fø Pidhinga “rà nă Pidhinga.”​—2 Timoteo 4:18.

6, 7. Addu ká rili Yesu é bblo kʉ ná pi nja pikpa djolú?

⁶ Biblia ripo Yesu kʉ bbo pli krʉ pikpa djolú dhonalo “ke ddiro dhé kʉ choro nŭnŭ di shi ná ke.” (1 Timoteo 6:16) Dz’djó pikpa adi dhe dhe, ro Yesu nzɨ kasi dhè ri. Krʉ Yesu kasi nji ko dhó ná bblo lo si ma théinga dho.

⁷ Biblia nă unabi ripo Yesu sie chí ndirigoti zølo dhí pi “Yova dhó kpakpanga kasie ke djó, nyodyu dhí kpakpanga ndirigoti lo le famu na ná kpakpanga, shauri dhi kpakpanga ndirigoti klø dhi kpakpanga, lochudha dhi kpakpanga ndirigoti Mungu do njidha dhi kpakpanga. Ndirigoti ke si hwè ba Mungu do ndi nji nari nă ro. Ke nzɨ kasi lod’i nja ndi nja ná lona ri, [inga ndi bbʉ shauri] rř ndi rř ndi bɨ na ná lona ri. Ke kasi lod’i njedha dhi nrŭ djo bbʉbbʉ lo na.” (Isaya 11:2-4) Ni ká ka ni ji nidhó pi di afø?

8. Yesu nzɨ si pinyo ddiro ri, nari ká ko chu ngbaribbai?

⁸ Mungu vʉ njakpa maddi ndima si pinyo Yesu ma na rà nă d’e. Lorojina, mutume Paulo pongʉeri Timoteo dho: “Njati ko ve ngatso ró, ko si pinyo ni ma na.” (2 Timoteo 2:12) Yesu ma ká si pinyo thi kʉ ná kpa na?

9. Yesu ma kasi pinyo thi kʉ nakpa na? Mungu ká ngangʉe kpa vʉdha tso ngba saa na?

⁹ Sura 7 nă, ko chue nari bbai mutume Yohana dhò Yova dhongʉe nalo nă, ke njangʉe pi Yesu rà nă ndirigoti 144 000 kʉ ná pikpa. 144 000 ká kʉ ngbá kpa? Yohana d’rari “Yesu ma, le ba ma na rodho ndini kpa nyitso.” Ndirigoti ke pori ki ɨ: “Fø kpa ra chembʉ dzá ngba [Yesu] ulu krʉ ke bbi ná ngalu. Kpa le dzi nrŭ kana ro.” (Azø Ufunuo 14:1, 4.) 144 000 kʉ ná kpa Mungu vʉ “ndima nyo pi dz’ djò” Yesu ma na. Kpa dhe dhe ná saa na, kpa adi ga ndima ra di rà nă. (Ufunuo 5:10) Chochokpa dhó saa djo ro, Yova chí kʉ ná Wakristo vʉ ndimae 144 000 kʉ ná pikpa kana.

10. Yova lø chu ndiro Yesu ma 144 000 ná kpa ma ndima nyo pi nrŭ djo. Ká addudho følo ridho ke ji kò ji?

¹⁰ Yova ngaddi bbo ko djo nalodho, ke lø chu ndiro nrŭ kasi pinyo Yesu ma na d’e. Yesu kasie bblo kʉ ná pi, ke ko famu ni nalodho. Kengʉe nrŭ ndirigoti ke ka nzani nza maddi. Paulo pongʉeri: Yesu adi kò zø nji ni, ke ka ndi ddinga “kodhó uzaifu djo maddi,” ndirigoti “ke bangʉeni kpakpalo na ma ko bbai ddi.” (Waebrania 4:15; 5:8) 144 000 kʉ ná kpa ma ka ndima famu kodhó kpakpalo ddi. Kpa hwingʉeni nzá le kaka nari na ndirigoti dhe ma ngʉ kpa nji ddi. Føri dzá lodho, kò ka ko u ri u Yesu ma 144 000 kʉ ná kpa ma na kasi ko adi ko mbu nari ma ndirigoti kodhó kpakpalo ma na famu ni.

MUNGU DHO PIDHINGA KA SI ADDU NJI?

11. Yesu ddingʉeri ndi unakpa dho kpa nzinga ndiro Mungu ji nari njini rà nă d’e. Ká addudho?

¹¹ Yesu ddingʉeri ndi unakpa dho kpa nzinga ndiro Mungu ji nari njini rà nă d’e. Ká addudho? Sura 3 nă ko chueri Stani Diabolo tsangʉe tsa Yova ro. Stani tsa nari goti Yova bbangʉe nga Stani ma, gó ma na dho ndima di rà nă karr saa dho. Ri nga kʉ krʉ kʉ ná malaiká i ngʉ Mungu ji nari nji rà nă ri. Sura 10 nă kosi lo chu Stani ma djò gó ma na.

12. Ufunuo 12:10 nă ká le tu ngba aro kʉ ná lo nanga?

¹² Biblia ripo Yesu ngʉ Mungu dhó Pidhinga nă pi nari goti ke ka ndi njie lɨ Stani na. (Azø Ufunuo 12:7-10.) Ufunuo 12:10 bbo bbo njingʉeni ná aro lod’ra. 1) Yesu nga pinyodha tso Mungu dhó pidhinga nă, 2) Stani le ka di ndirigoti le ka ke bu dz’djò. Go kosi chu nari bbai fø lo njini b’lo.

13. Stani le bu rà nă ro nari goti ká ngba lo bangʉe nga?

¹³ Biblia ripo malaiká nă nga jingʉe ni bbo Stani ma gó ma le bungʉe rà nă ro nari goti. Ko rizø: “Anji hwè rà ndirigoti ni nă dí ná ritsi ma na!” (Ufunuo 12:12) Rà nă kʉ ngoi ndirigoti ddi letso gbani nari ma, dhonalo krʉ kʉ ná kpa Mungu ji na lo nji.

14. Stani le bu rà nă ro nari dho ká ngba lo ba nga dz’ djo?

¹⁴ Ro dz’djó maisha nzá di rà nă ribbai ri. Nrŭ bani kpakpa lo na “dhonalo Diabolo le bu dz’djó,” ndirigoti ke kʉ “thø na bbo, ke churi chu ndidhó saa ma karnø.” (Ufunuo 12:12) Stani nanga kani bbo. Ke le dingʉe rà nă ro ndirigoti ke churi chu ndisi sadha ba karr nga goti. Ke krʉ lo nji ndiro ndi nza nrŭ nza ngø djolú gble d’e.

15. Mungu ká pɨ ngba lo dz’djo?

¹⁵ Mungu pɨ dz’djo nalo thika nzá d’e leni ri. Ke ji kaka ná nrŭ si di dz’djó choro nŭnŭ paradiso nă. (Zaburi 37:29) Mungu dhó Pidhinga ká si ke ji nalo nji ngbaribbai?

16, 17. Danieli 2:44 ká ngba lo po ko dho Mungu dhó Pidhinga djo?

¹⁶ Danieli 2:44 nă kʉ ná unabi ripo: “Fø pikpa dhó ddo na rà nă Mungu kasi ndidhó nzɨ si sani ná Pidhinga li. Ndirigoti fø Pidhinga nzɨ kasi da d’i nrŭ tsɨ dzá bbonga tsena ri. Risi fø Pidhinga nanga d’ri d’ri ndirigoti ri si ri tso d’ød’ø, ro ke ddiro dhó ri dhé si tøni théinga dho.” Fø unabi ká ngba loddi ko dho Mungu dhó Pidhinga djo?

¹⁷ 1) Mungu dhó Pidhinga ka ndi ngae pinyodha tso “fø pikpa dhó ddo na.” Føri na mana kʉ Mungu dhó Pidhinga ka ndi ngae pinyodha tso go dz’djo pidhinga pinyo ro. 2) Mungu dhó Pidhinga si pinyo théinga dho ndirigoti d’i Pidhinga nzɨ si ri ro dhʉ ri. 3) Mungu dhó Pidhinga kasi lɨ nji dz’djó pidhinga na. Mungu dhó Pidhinga kasi sisi fø pidhinga djó, ndirigoti ri ddiro dhé si pinyo dz’ lú djo. Nrŭ kasi di bblo kʉ ná Pidhinga tsena.

18. Mungu dhó Pidhinga si lɨ nji nrŭ dhó pidhinga na, ná lɨ ya mwisho rodho ká kʉ addu?

¹⁸ Mungu dhó Pidhinga kasi pinyo dz’djo ngbaribbai? Ya mwisho kʉ na lɨ Armagedo le ndi nziro si nari nji, gó si “dz’ lú djo krʉ kʉ ná pikpa sha, ndima gba ndima tso ndiro ndima nji lɨ ritsi ddi na ka ná Mungu dhó bbò ddo dyina d’e.” Nrŭ dhó pidhinga si lɨ nji Mungu dhó Pidhinga tsoro.​—Ufunuo 16:14, 16; anja Longatudha 10.

19, 20. Kodhó lo ká ji Mungu dhó Pidhinga addudho?

¹⁹ Kodhó lo ká ji Mungu dhó Pidhinga addudho? Ri kodhó lo ji dho nalo kʉ gbo. 1) Ko kʉ chenga dhi nrŭ nalodho, ko dhe adi nji ndirigoti ko adi dhe dhe. Ro Biblia ripo Mungu dhó Pidhinga tsena ko kasi di choro nŭnŭ. Yohana 3:16 ripo: “Mungu jingʉe ngø bbo nalodho, ke bbʉngʉe ndidzá sidjo ddikpali ngba, ndiro ngbà u ke na le nzɨ ba sadha, ro ndi ba choro nŭnŭ di ná shinga.”

²⁰ 2) Kodhó loji Mungu dhó Pidhinga ko ronga tso che kʉ ná nrŭ d’è nalodho. Bí kʉ ná nrŭ kali sha, nrŭ gbʉ nji ndirigoti nrŭ uasherati ma nji. Ko nzá ka ko d’ø fø nrŭ tso ro ri, ro Mungu kasi kpa tso d’ød’ø. Che lo nji ná kpa si sadha ba Armagedo dhi lɨ nă. (Azø Zaburi 37:10.) 3) Kodhó lo ji Mungu dhó Pidhinga dhonalo nrŭ dhó pidhinga nga kʉ kpakpanga na ri, kpa che kʉ nalo nji. Kpa nzɨ nrŭ cho ndima nji Mungu ji na lo ri. Biblia ripo “nrŭ adi pinyo nrŭ djo ndima vu na vu nrŭ ró d’e.”​—Muhubiri 8:9.

21. Mungu dhó Pidhinga ká si Mungu ji nari nji dz’djo ngbaribbai?

²¹ Armagedo goti, Mungu dhó Pidhinga kasi Mungu ji nari nji dz’ djo. Lorojina, risi Stani ma tso d’ød’ø gó ma na. (Ufunuo 20:1-3) Ddikpa le ro ma nzɨ ddi dhe si nji inga ndi dhe dhe ri. Le ødha dhí be chulú, krʉ nì tøni chí Mungu dho ná nrŭ kasi di choro nŭnŭ paradiso nă. (Ufunuo 22:1-3) Mungu dhó Pidhinga si ke rodho li ndi tsetse. Føri na mana ká kʉ addu? Føri na mana kʉ Mungu dhó Pidhinga kasi pinyodha tso nga ná saa na, krʉ kʉ ná nrŭ kasi ke rodho ma mà.​—Anja Longatudha 21.

YESU KA NGɄNGɄE PI NGBA SAA NA?

22. Yesu nzá le lingʉe pi dz’djó ndingʉe ná saa na inga ga ndi ga nari goti ri, nari ká ko chu ngbaribbai?

²² Yesu ddingʉeri ndi unakpa dho kpa di nganzi iri bbai: “Aliri ni dzá pidhinga si.” Føri ridho Mungu dhó Pidhinga ka ndi sie gosi ná saa na. Yova ka ndi lie ndidhó Pidhinga ndirigoti ndi lie Yesu ri nă pi. Yesu ngʉngʉe rà nà nari goti ka ke ngʉngʉe pi théi? Nzá, ke ka ndi b’oe nga vi. Yesu gangʉe nari goti, Petro ma Paulo ma na dhongʉeri pʉlʉpʉlʉ Zaburi 110:1 nă kʉ ná unabi loti Yesu djò. Ndidhi unabi nă Yova pori ɨ: “Adi ma thó thá djó ri laidjó ro kpø ma li nidhó mbubai ni kó tsena ná ngadjo.” (Matendo 2:32-35; Waebrania 10:12, 13) Yesu ká ka ndi b’oe nga thɨ cha pi le ndi li nari nji?

23. (a) Yesu ká ngangʉe pinyodha tso Mungu dhó Pidhinga na ngbá cho nă? (b) Ko kasi ngba lo chu gosi ná sura nă?

²³ 1914 njí cho bí, chí kʉ ná Wakristo nengʉe Biblia nă unabi nanga ndirigoti kpa famu ngʉeri føri kʉ bbo na mana kʉ ná cho. 1914 djoro njini dz’ djó nalo ridho kpa pongʉe nalo kʉ bbʉbbʉ. Yesu ngangʉe pinyodha tso fø cho djó ro. (Zaburi 110:2) Føri goti Stani le bungʉe dz’djo ndirigoti “kedhó saa ma se se.” (Ufunuo 12:12) Gosi ná sura nă ko si bí kʉ nalo nja, nalo ridho ko di ngatso d’ø ná saa nă njʉ. Ko si richu godhe Mungu dhó Pidhinga kasi Mungu ji nari nji dz’ djo.​—Anja Longatudha 22.