CIIYO 3
Ino Cancine Camu Baibo Cakashibikwa Buyani Alimwi?
Bashikwiiya Baibo, muma 1870
Ngazi Yamulindizi yakutaanguna, 1879
Ngazi Yamulindizi ya munshiku shino
Baibo yakaambila limwi ayi aakufwa Klistu, kulaakubuka bamafundishi bakubeca pakati ka Beneklistu bakutaanguna akupilinganya lushinisho lwa muBaibo. (Milimo ya Batumwi 20:29, 30) Mukuya kwaciindi, ncakwiila ici cakacitika. Bakatalika kusenkanya njiisho shakwe Yesu amakani akubeca, uku nkokwalinga kushalwa kwa bupailishi bwakubeca. (2 Timoti 4:3, 4) Ino inga twashoma buyani ayi munshiku shino tutokwiiya cancine camu Baibo?
Ciindi cakashika cakwaamba ayi ayubulule cancine. Wakaambila limwi ayi ‘kumeelelesho aciindi, lushibo lulaakufula.’ (Danyelo 12:4) Mu 1870, kakoto kaniini kabashikuyandoola cancine bakeshiba ayi njiisho shiinji nshobakalinga kwiisha mumaceeci tashakalinga kweendelana aMalembo. Aboobo bakatalika kuyandoola Baibo ncoiisha, alimwi Yehova wakabacafwa kushiba cancine.
Basankwa bashomeka bakatalika kwiiya Baibo. Bashikwiiya Baibo aba, bakalinga kusebensesha nshila yeenka njetucisebensesha kwiiya Baibo munshiku shino. Bakalinga kubandikishanya makani apusenepusene amuBaibo. Na tabana kunyumfwisha makani ngobabelenga palubasu lomwi muBaibo, bakalinga kulangoola mavesi amwi atosansulula makani ayo. Na bacana busansulushi bweendelana aMalembo oonse, bakalinga kulemba. Aboobo kwiinda mukusuminisha Baibo ayi ilisansulule iine, bakacicana cancine caamba sha liina lyakwe Lesa alimwi aBwaami, ncakalengela bantu pacishi ca panshi, cicitika na muntu wafwa, alimwi abulindilishi bwa bubuke. Nshobakeeya shakabacafwa kucileka kukonkela njiisho shakubeca.—Joni 8:31, 32.
Mu 1879 Bashikwiiya Baibo bakabona kwaamba ayi balyeelete kutalika kulwiitaako bamwi cancine ncobakeeya. Aboobo mumwaaka weenka uyo, bakatalika kupulinta magazini ya Ngazi Yamulindizi Yaambilizya Bwami bwa Jehova kushika apacecino ciindi. Pacecino ciindi tulashimikila makani amuBaibo mushishi shishika ku 240 amishobo iinda ku 750. Taaku ciindi lushibo lwa cancine ndilwakafulawo munshila yeeyi!
Ino nciinshi cakacitika ku cancinencine ca muBaibo Klistu ndyaakafwa?
Ino nciinshi catucafwa ayi tushibe cancinencine ca muMaswi akwe Lesa alimwi?