Basankwa Bali 12 Bakaya Mukubona Cishi

Bene Isilaeli bakaswa pa Kalundu ka Sinayi akwiinda muluyanga lwa Palani kuya kumusena wakalinga kwiitwa ayi Kadeshi. Ndyebakashika ku Kadeshi, Yehova wakalwiita Mose ayi: ‘Tuma basankwa bali 12, kuswa mumikowa yoonse ya bene Isilaeli kwaamba ayi baye mukubona cishi ca Kenani, cishi nceshi nkabape.’ Aboobo Mose wakasala basankwa bali 12 akubalwiita ayi: ‘Amuye ku Kenani, mukabone na cishi cilicite bulongo bubotu kulima. Mukabone na bantu bekalaamo mbayumu na sobwe alimwi na balekala mumatente nabi sobwe.’ Basankwa bali 12 bakasalwa kuya kucishi ca Kenani pakalinga a Joshuwa alimwi a Kalebu.

Pesule lya nshiku 40, basankwa bakatumwa kuya mukubona cishi ca Kenani bakaboola. Lyalo bakaletelesha a shisepo shiitwa ayi mapomegilaneti, nkuyu, a minyansa. Lyalo bakaamba ayi: ‘Ncishi cibotu, sombi bantu bekalaamo balicite nkusu alimwi balekala mumatauni ayakitwe lubumbu lulaamfu.’ Lyalo Kalebu wakaamba ayi: ‘Inga twabakoma. Atunooya apa peenka!’ Sa ulishi Kalebu ncaakaambila boobo? Nceebo cakwaamba ayi lakwe a Joshuwa bakalinga kushomete muli Yehova. Sombi basankwa bamwi bali 10 bakaamba ayi: ‘Sobwe! Bantu mbotwacana teshi bakusekaninaako! Mbalaamfu cakwaamba ayi swebo twakalinga kulibona kuceya anga mbateete.’

Bene Isilaeli bakalefuka akutalika kwaamba ayi: ‘Atusale mutanjilili umwi tuboolele ku Ijipiti. Tatweelete kuyaako kucishi ici mukwiinga balaakutucaya’. Joshuwa a Kalebu bakaamba ayi: ‘Mutaloondi, amunyumfwilebo Yehova, alaakutushitilisha.’ Sombi bene Isilaeli tabakwe kunyumfwila. Bakalinga kusuni akucaya Joshuwa a Kalebu!

Ino Yehova wakacita buyani? Wakalwiita Mose ayi: ‘Bene Isilaeli ndakabacitila shintu shiinji abuumbi, sombi abobulya tabasuniiwo kunyumfwila. Aboobo balaakukala muluyanga kwa myaaka 40, alimwi balaakufwa. Bana babo beenkabo alimwi a Joshuwa a Kalebu mbeshi bakenjile mucishi ncendakashomesha kubapa.’