Munjelo Wakwe Yehova Mbwaakashitilisha Esekiya

Bene Asilya bakanyaya bwaami bwa mikowa 10 ya bene Isilaeli. Aboobo Senakelibu mwaami wa bene Asilya wakalinga kusuni akunyaya bwaami bwa Juda bwa mikowa yobilo. Wakatalika kukoma tauni yomwi ayomwi ya bene Juda. Sombi tauni njaakalinga kusuni bunene ni Jelusalemu. Senakelibu ncaatakalinga kucishiiwo ncakwaamba ayi Yehova wakalinga kushitilisha Jelusalemu.

Esekiya, mwaami wa bene Juda, wakalipila Senakelibu maali aanji abuumbi kwaamba ayi atalwani Jelusalemu. Nabi kwaamba ayi Senakelibu wakabwesa maali, wakatuma masoja akwe acite nkusu kuya mukulwana Jelusalemu. Bantu boonse mu Jelusalemu bakaloonda abuumbi mukwiinga bene Asilya bakalinga kuya busena pafwiifwi. Lyalo Esekiya wakabalwiita ayi: ‘Mutaloondi. Nabi kwaamba ayi bene Asilya balicite nkusu, Yehova atootupa nkusu shakucikonsha kubakoma.’

Senakelibu wakatuma shinkombe Labishake kuya ku Jelusalemu mukukonga bene Juda. Labishake wakeemikana pansengwe pa Jelusalemu akoolobesha ayi: ‘Yehova inga taamucafwiiwo. Mutanyumfwili Esekiya nshatoomubeca. Taakuwo lesa weenga wamushitilisha kuli ndiswe.’

Esekiya wakeepusha Yehova shakucita. Yehova wakakumbula ayi: ‘Utaloondi ashitokwaamba masoja akwe Senakelibu. Teshi aikome Jelusalemu.’ Senakelibu wakatumina Esekiya makalata. Makalata ayo akalinga kwaamba ayi: ‘Lyaabebo. Yehova inga taamushitilishiiwo.’ Esekiya wakapaila akwaamba ayi: ‘Twaseenga, Yehova, amutupulushe, kwaamba ayi bantu boonse bakeshibe ayi ndimwe Lesa wancine eenkabo.’ Yehova wakalwiita Esekiya ayi: ‘Mwaami wa bene Asilya teshi ashikeewo ku Jelusalemu. Ndaakwishitilisha ndabala yangu.’

Senakelibu wakalinga kulishoma ayi atoocikonsha kukoma Jelusalemu. Sombi bushiku bumwi mashiku, Yehova wakatuma munjelo kumusena kwakalinga masoja a bene Asilya. Munjelo uyo wakacaya masoja abene Asilya ali 185,000! Masoja a Mwaami Senakelibu akalinga kucite nkusu oonse akafwa. Wakakomwa akuboolelaamo kumishaabo. Yehova wakashitilisha Esekiya a Jelusalemu, kweelana ambwaakalinga washomesha. Niwakalingaako ku Jelusalemu, sa nakwiinga wakacinka manungo muli Yehova?