Lisabeti Mbwaakaba a Mwaana

Ndipakeenda myaaka iindilila 400 kuswa ciindi lubumbu lwa Jelusalemu ndyelwakayakwa cipya, mupailishi Sekaliya amukaakwe Lisabeti bakalinga kukala pafwiifwi a tauni ya Jelusalemu. Bakekala mucikwati kwa myaaka iinji kwakubula mwaana. Bushiku bumwi Sekaliya ndyaakalinga kutenta tununkila kabotu mu tempele, munjelo Gabuliyelo wakabonekela. Sekaliya wakaloonda, sombi Gabuliyelo wakamwaambila ayi: ‘Utaloondi. Ndakuletela makani abotu kuswa kuli Yehova. Mukaako Lisabeti ulaakushala mwaana musankwa uyo ngweshi ukatumbe ayi Joni. Yehova wamusala Joni akumupa ncito ilibetele.’ Sekaliya wakeepusha ayi: ‘Ino ndaakushiba buyani ayi ici ncalushinisho? Nebo amukaangu twacembela, inga tatubiiwo amwaana.’ Gabuliyelo wakaamba ayi: ‘Lesa ngowantuma kusa mukukulwiita makani aya. Ano mukwiinga tookwe kushoma makani ngondakulwiita, utooba cibulu kushikila mwaana ndyeshi akashalwe.’

Sekaliya wakatola ciindi cilaamfu mu tempele kwiinda lyoonse. Aboobo ndyaakaswa, bantu bakalinga kumulindila pansengwe bakalinga kusuni kushiba shakacitika. Sombi Sekaliya taakalinga kwaamba. Wakalinga kwaambishabo maansa. Lyalo bantu bakeshiba ayi wakatambula makani kuswa kuli Lesa.

Ndipakeendabo nshiku shiniini, Lisabeti wakamita akushala mwaana musankwa, bweenka munjelo mbwakaamba. Beshicibusa abeshikamukowa bakwe bakesa mukubona mwaana. Bakakondwa abuumbi. Lisabeti wakaamba ayi: ‘Ulyeelete kwiitwa ayi Joni.’ Lyalo bakaamba ayi: ‘Taakuwo shikamukowa wako ucite liina lya Joni. Mutumbe liina lyakwe ishi lya Sekaliya.’ Sombi Sekaliya wakasenga cakulembawo akulemba ayi: ‘Liina lyakwe ngu Joni.’ Lyalo peenkapo, Sekaliya wakatalika kwaamba alimwi! Makani akushalwa kwa mwaana akanyumfwika mucishi coonse ca Judeya, alimwi bantu bakakankamana akwaamba ayi: ‘Anu mwaana uyu alaakuba buyani na akakule?’

Lyalo Sekaliya wakasushikwa mushimu usalashi. Wakaamba maswi abushinshimi ayi: ‘Aalumbaishikwe Yehova. Wakashomesha Abulaamu ayi alaakutuma mupulushi, nkokwaamba ayi Mesiya, kusa mukutupulusha. Joni alaakuba mushinshimi, alimwi alaakubambila Mesiya nshila.’

Kuli cintu cilibetele cakacitikila Maliya shikamukowa wakwe Lisabeti. Leka twiiye pamakani aya mumutwi utokonkelaawo.