Baanjelo Bakoolobesha Kushalwa Kwakwe Yesu

Sisa Agasitasi muleli munene waku Loma, wakalwiita bene Juda boonse kuboolela kumishaabo mukulembwa. Aboobo Josefu a Maliya bakaya ku Betileemu, kwakaswa mukwashi wakwe Josefu. Paciindi ici, Maliya kaali pafwiifwi akuba amwaana.

Ndyebakashika ku Betileemu, takwakalingaawo musena kwakukala, aboobo bakaya mukukala mwakalinga kukala shinyama, Maliya mwakatumbukila mwanaakwe musankwa Yesu. Wakamupetelesha mushisani akumooneka mwakulita ŋombe.

Pafwiifwi a tauni ya Betileemu, kwakalinga beembeshi bamwi bakalinga kweembela mbelele shabo muluundu. Cakuteengashila, munjelo wakabonekela kuli mbabo, lyalo mpobakalinga kushiite pakaboolabo tuu kubulemu bwakwe Yehova. Beembeshi bakaloonda, sombi munjelo wakabaambila ayi: ‘Mutaloondi. Ndaleta makani abotu asangalasha. Mesiya washalwa sunu mu Betileemu.’ Paciindi ceenka ico, kwakaboneka baanjelo baanji kwiculu, kabaamba ayi: ‘Bulemu kuli Lesa kwiculu lya meculu, alimwi akube luumuno pacishi.’ Lyalo baanjelo bakacileka kuboneka. Ino beembeshi bakacita buyani?

Beembeshi bakalyaamboosha ayi: ‘Katiya tushikeeko kuBetileemu peenka apa.’ Lyalo bakaya cakufwambaana akucana Josefu a Maliya mwakalinga kukala shinyama kabacite amwaana kateta.

Muntu uli woonse wakanyumfwa baanjelo nshobakalwiita beembeshi wakakankamana. Maliya wakayeeyawo abuumbi pamakani munjelo ngaakaamba alimwi taakwe kwaalubaawo. Beembeshi bakaboolela mukulama mbelele shabo, kabalumbaisha Yehova pashintu shoonse nshebakabona akunyumfwa.