Yesu Mbwaakacatwa

Yesu abatumwi bakwe, bakeenda mu Cinyika ca Kidiloni ndyebakalinga kuya kukalundu ka Maolifi. Pakalinga pakati kamashiku alimwi mweenshi wakalinga kubala abuumbi. Ndyebakashika mumuunda wa Getisemani, Yesu wakaambila batumwi bakwe ayi: “Amwikale pano, munoolindilila kamulibambite.” Lyalo Yesu wakeendakobo paniini akufukama. Kaacite buumba abuumbi mumoyo wakapaila kuli Yehova ayi: ‘Kuyanda kwanu akucitwe.’ Lyalo Yehova wakatuma munjelo kusa mukuyuminisha Yesu. Yesu ndyaakabolela kubatumwi bakwe botatwe, wakacana boona. Wakabalwiita ayi: ‘Amubuke! Cino teshi ciindi cakoona! Ciindi cashika cakwaamba ayi ngaabwe mumaansa abalwani bangu.’

Kapatana kwiinda aciindi cilaamfu, Judasi wakashika alikoto lya bantu bakalalite, kabacite a shimanaifi ankooli. Judasi wakalinga kukushi kwakucana Yesu mukwiinga liinji bakalinga kuya kumuunda uyu. Judasi wakalinga walwiita masoja ayi alaakubatondesha Yesu. Wakaya kuli Yesu akumulwiita ayi: ‘Mwaboneka, Bafundishi,’ lyalo wakamufyonta. Yesu wakaamba ayi: ‘Judasi, sa utoongaba kwiinda mukumfyonta?’

Yesu wakasena kwakalinga likoto lya bantu akubeepusha ayi: “Ino ngani ngomutooyandoola?” Bakakumbula ayi: ‘Yesu wa kuNasaleti.’ Lyalo wakabakumbula ayi: “Ndime,” lyalo bakaboola pesule akuwita panshi. Alimwi wakabooshawo kubeepusha ayi: “Anu ngani ngomutooyandoola?” Alimwi bakaamba ayi: ‘Yesu wa kuNasaleti.’ Yesu wakabakumbula ayi: ‘Ndamulwiita kale ayi ndime. Amubaleke basankwa aba banooya.’

Pita ndyaakabona shakalinga kucitika, wakakusha cinaifi akusutula kutwi kwakwe Malukasi, musha wamupailishi munene. Sombi Yesu wakacata kutwi kwa musankwa uyo akumushilika. Lyalo wakalwiita Pita ayi: ‘Boosha naifi. Na koolwana kusebensesha naifi, ulaakucaikwa ku naifi.’ Masoja bakacata Yesu akumwaanga kumaansa, lyalo batumwi bakwe bakacica. Lyalo likoto lya bantu bakalalite lya kamutola kuli Anasi, mupailishi munene. Anasi wakeepusha Yesu miipusho, lyalo wakamutola ku Mupailishi Munene, Kayafasi. Ano ino nshiinshi shakacitika kubatumwi?