Nobacanike—‘Amusebense Cankusu Muncito Shibotu’

Munkalata njaakalembela Taitasi, mutumwi Paulo wakayuminisha basankwa bacanike, kwiilikaawo a Taitasi ayi balyeelete kusebensa cankusu “kuba citondesho mukucita ncito ibotu munshila shoonse.” (Taitasi 2:6, 7) Lyalo mucapita yeenka iyi wakatolelela akwaamba ayi bantu bakwe Yehova bakasalashikwa kwaamba ayi “basebense ncito shibotu.” (Taitasi 2:14) Incito yomwi pancito shibotu ishi nkushimikila akwiisha makani abotu a Bwaami bwakwe Lesa. Mbuli wacanike, sa inga wasebenseshako nkusu shako kusebensa mbuli painiya wakucafwilisha na waciindi coonse?—Tus. 20:29.

Na mulisuni kusebensa mbuli painiya, amulibambile kabotu kweelana ambweenga mwacikonsha. (Luka 14:28-30) Kucakubonenaako, ino nshiinshi nsheshi mukanoocita kwaamba ayi mukanoolicafwilisha lwakumubili ndyeshimukanoocita bupainiya? Ino mulaakunosebensa buyani kwaamba ayi mukanoocikonsha kukumanisha mawoola ayandika? Amupaile kuli Yehova kwaamba ayi amucaafwe. (Kulu. 37:5) Amulwiite bashali banu nshemusuni kucita akubandika abaabo bakacikonsha kuswitilila muncito yabupainiya. Lyalo amucite kweelana ambomwalibambila. Cakutatoonsha Yehova alaakumupa shoolwe ceebo cakusebensa cankusu muncito yakwe!

AMWEEBELE VIDYO ICITE MUTWI UTOKWAAMBA AYI BACIKULA BWANGU MBOBALEMEKA YEHOVA, LYALO AKUBANDIKA MIIPUSHO ITOKONKELAAWO:

• Ino ngamapensho nshi bamwi ngobakakoma kwaamba ayi bacikoonshe kucita bupainiya, alimwi ino nshiinshi nshebakacita?

• Ino bashali inga bacita buyani kwaamba ayi bacafwe bana babo kuba bapainiya?

• Ino nceebonshi ncociyandikila kuba amulongo wakushimikila?

• Ino bamakwesu abenankashi mulibungano inga bacita buyani kwaamba ayi bacafwe akuyuminisha bapainiya?

• Ino nshoolwe nshi nshobacana abo basebensa ncito yabupainiya?