Pita alimwi a Joni batoobamba cipinda capeculu kwaamba ayi bacitileemo Pasika mu 33 C.E.

BUUMI BWA BWINEKLISTU

Sa Mwakatalika Kale Kulibambila Ciibalusho?

Pasika yakweelaako yakwe Yesu yakalinga kuyandika abuumbi. Mukwiinga lufu lwakwe pafwiifwi, wakalinga kusuni kusekelela Pasika pomwi a batumwi bakwe alimwi akutalika kusekelela kupya kweshi kucitwa mwaaka amwaaka kwiitwa ayi Mulalilo wa Mwaami. Aboobo, wakatuma Pita a Joni kuya mukubamba cipinda cakulitaamo Pasika. (Luka 22:7-13; Amubone cikope cili pa peeji yakutaanguna.) Aboobo, ici citotwiibalusha kuyandika kwakulibambila kucanika Kuciibalusho ceshi cikabeeko pa 27 March. Mabungano alyeelete akabamba kale weshi akaambe likani, shinkwa awaini wapa Ciibalusho, alimwi ashintu shimwi. Ano ino nshiinshi womwi awomwi nshaeelete kucita kwaamba alibambile Ciibalusho?

Amutondeshe kulumba palufu lwakwe Yesu. Amubelenge lubasu lwa Kubelenga Baibo kwa Ciibalusho akukutumana kuyeeyawo. Inga mwacana mulongo wakubelenga Baibo mukabuku ka Kulingaula Magwalo Abuzuba alimwi inga mwacana makani aanji mu Baibo ya New World Translation of the Holy Scriptures yamu Chitonga palubasu lulembetwe ayi Makani Aayungizyidwe B12. (Alimwi inga mwabona mulongo ucanika mu Kabuku ka Buumi Anciito kamu April 2020.) Mikwashi inga yasebensesha makani acanika mulibuku lya Watch Tower Publications Index na libuku lya Bbuku Ligwasya Kuvwuntauzya lya Bakamboni ba Jehova pakulambila kwabo kwamukwashi kwaamba ayi babone kuyandika kwa cilubula.

Mukwashi batobandika makani aamba Paciibalusho ndyebatoocita kulambila kwa mukwashi.

Amwiiteeko Bamwi Kuciibalusho. Amwaabaneemo lubasu muncito yakwiita bantu Kuciibalusho. Amuyeeye mbeenga mweetaako Kuciibalusho, mbuli bantu mbomwakashomesha kuboolelaako, bantu mbomwakacileka kwiisha Baibo, mbomushibenaabo alimwi abeshikamukowa. Bamanene balyeelete kushinisha kwaamba ayi beetako bamakwesu abenankashi bakaboolela mwisule. Amwiibaluke kwaamba ayi na muntu ngomweeta taakali kumusena nkomukala, inga mwashiba ciindi amusena kweshi kukabete Ciibalusho kumusena nkwaakala na mwaya pa webusaiti ya jw.org akubona palubasu lulembetwe ayi SHA PALINDISWE, akusala palembetwe ayi “Ciibalusho.”

Bamanene bobilo batobandika amukwesu wakaboolela mwisule akumwiita Kuciibalusho.

Ino nshiinshi shimwi nsheenga twaciita kwaamba ayi tulibambile Ciibalusho?