Kucita Bupainiya

Tulasebensesha kabotu nkusu shesu na twasala shakucita muncito yakwe Yehova. (1Ko 9:26) Kusala shakucita kunembo kulatucafwa kusebensesha kabotu ciindi, mamanino abweende bwashintu ubu kaatana kushika. (Efe 5:15, 16) Ndyemutoocita kulambila kwamukwashi inga mwabandika pashintu nshemusuni kucita mumwaaka wancito upya. Kwaamba ayi cibe cuubu kusala nsheenga mwacita, mukabuku kamabungano aka muli makani atokwaamba pashakucita nsheenga mwapaililaawo akusalaawo.​—Jemu 1:5.

Kucakubonenaako, sa bamumukwashi inga basebensela pomwi kucafwako nabibo womwi mumukwashi kusebensaako bupainiya bwaciindi coonse? Na mutobona ayi inga tamucikonshi kukumanisha mawoola ayandika, amubandike abapainiya bamwi bali mubukaalo mbuli mbomubeteemo. (Tu 15:22) Mpashi inga mweepushako painiya waciindi coonse ndyemutoocita kulambila kwamukwashi. Lyalo inga mwalemba mulongo wa mbweshi munosebensa. Na mwakacitaawo bupainiya kale kale amweeleshe kubona na inga mwacikonsha kucita bupainiya pacecino ciindi.

Sa kuli bamwi mumukwashi wanu beenga bacita bupainiya bwakucafwilisha kwamweenshi womwi nabi kwiindaawo? Na bukaalo bwanu inga tabumusuminishi kucita bupainiya bwaciindi coonse, inga mweeleshako kusebensa bupainiya bwakucafwilisha kwiinda mukusebensaako ciindi ciniinibo bushiku abushiku. Na tamucite ciindi cinene cakwaabanamo lubasu muncito yakushimikila mukati kansondo ceebo cakwaamba ayi mulasebensa na mulaya kucikolo, mpashi inga mwacitaako bupainiya bwakucafwilisha mumweenshi muli maholide abuumbi na mweenshi ucite nsondo 5. Amulembe pa kalenda yanu mweenshi ndyemusuni kusebensaako bupainiya bwakucafwilisha lyalo akulemba mulongo wambweshi mukanoosebensa.​—Tu 21:5.

AMWEEBELE VIDYO ICITE MUTWI UTOKWAAMBA AYI AMUBE . . . PAINIYA UTALOONDI, LYALO AKUKUMBULA MWIIPUSHO UYU:

• Ino nshiinshi nshotutokwiiya kuswa kushakacitikila nankashi Aamand pali Yehova mbwabikila maano kubaabo balyaaba kusebensa bupainiya bwaciindi coonse?