Kubungana Kusebensesha Pulogilamu Yapa Intaneti

Mfulumeende shiinji nsengwe yoonse shakabika mulawo wakwaamba ayi bantu balyeelete kutalamukana alimwi tabeelete kubungana pomwi baanji. Bakamboni Bakwe Yehova balishinishite kukonkela milawo iyi alimwi akutolelela kubungana. Kwaamba ayi bacikoonshe kucita boobo, mabungano alabugana kwiinda mukusebensesha pulogilamu yapa intaneti, mbuli Zoom.

Kwaamba ayi tunobungana lyoonse, Bamulikoto Litanjilila bakasuminisha ayi maali ngomupa asebenseshekwe kulipila ku pulogilamu yapa intaneti iitwa ayi Zoom. Bubaambo ubu bwakacafwa mabungano atacikonshi kulipila maali ayandika kusebensesha pulogilamu iyi. Maali ngobalipilisha kusebensesha pulogilamu iyi ngamadola aku America 15 kushika ku 20 na kwiindaawo. Mabungano liinji akalinga kusebenseshabo pulogilamu ya Zoom yakubula kulipila, isuminishabo bantu baniini kucita konekiti alimwi itashitilishitwe kabotu. Ano pacecino ciindi mabungano oonse asebensesha maakaunti a Zoom alibunga lyesu, alacafwikwa abuumbi mukwiinga maakaunti aya alishitilishitwe kabotu alimwi bantu baanji inga bacita konekiti. Pacecino ciindi, mabungano eendilila 65,000 mushishi shiindilila 170 alasebensesha maakaunti aya.

Libungano lya Kairagi, licanika ku Manado, North Sulawesi, ku Indonesia, lyakacileka kusebensesha Zoom yakubula kulipila akutalika kusebensesha Zoom yakabambwa a libunga. Mukwesu waliina lya Hadi Santoso wakaamba ayi: “Nabibo bamakwesu abenankashi batacishi kabotu bwakusebensesha mafooni, matabuleti na makompyuta batoofubilaamo mumabungano, mukwiinga pacecino ciindi tabeelete kucita konekiti mankanda aanji ndyebatoobungana.”

Ba Lester Jijón, Jr., banene mulibungano lya Guayacanes Oeste licanika ku Guayaquil, Ecuador, bakaamba ayi: “Ceebo cakwaamba ayi bamakwesu abenankashi tabaciteewo maali aanji, nakwiinga tacakalinga cuubu mabungano kucikonsha kulipila maali kwaamba ayi banoobungana kusebensesha Zoom. Ano tutolumba libunga lyakwe Yehova ceebo ca pulogilamu ya Zoom njetusebensesha kucita konekiti bantu baanji ndyetutobungana. Alimwi ici cilatucafwa kwiitako bamwi kukubungana kwesu.”

Ba Johnson Mwanza, banene mulibungano lya Ngwerere North ku Lusaka, Zambia, bakalemba ayi: “Bamakwesu abenankashi baanji balaamba ayi, ‘pulogilamu ya Zoom yalibunga yatupa kuba pafwiifwi abamakwesu abenankashi, kulinyumfwa ayi Yehova alitusuni alimwi alatubikila maano.’”

Kwaamba ayi balipile maakaunti aya a Zoom, libunga lyakwe Yehova lilasebensesha maali abikwa palubasu asebenseshekwa na kwacitika mapensho akuteengashila. Maali aya alaswa pa maali apekwa mukuliyandila acafwilisha ncito yansengwe yoonse. Baanji balapa maali aya kwiinda mukusebensesha donate.jw.org. Tutoomulumba abuumbi ceebo maali ngomupa mukuliyandila, ayo asebenseshekwa kucafwa bamakwesu abenankashi nsengwe yoonse.​—2 Bene Kolinto 8:14.