Ciiyo 1

Lesa Utomwita Ayi Mube Shicibusa Wakwe

Lesa ulisuni ayi mwebo mube shicibusa wakwe. Sa mwakayeeyawo ayi inga mwaba shicibusa wakwe Lesa, Shinkusu shoonse pa cishi a mwiculu? Abulaamu wakalinga kukala pa cishi kalekale, Lesa wakamwaamba ayi ngumubye. (Jemusi 2:23) Baibolo ilaamba pa bantu abamwi bakalinga bashicibusa bakwe Lesa abo bakapekwa shoolwe. Cino ciindi, bantu kuswa mu misena ipusenepusene ya mu cishi balaba bashicibusha bakwe Lesa. Amwebo inga mwaba shicibusa wakwe Lesa.

Kuba shicibusa wakwe Lesa nkubotu kwiinda kuba shicibusa wa muntu uli wonse. Lesa ulalama bantu bashomeka kuli nguwe. (Kulumbaisha 18:25) Kuba shicibusa wakwe Lesa nkubotu kwiinda kuba a buboni. Na muntu ucite buboni wafwa, bulya buboni bulaba mbwa bantu bamwi. Sombi bashicibusa bakwe Lesa balo balicite buboni butakonshi kunyaikwa a muntu umwi.—Mateyo 6:19.

Bamwi bantu inga beelesha kumukasha kunokwiiya shakwe Lesa. Babyanu nabi beshikamukowa inga bamukasha. (Mateyo 10:36, 37) Bantu bamwi na batomuseka nabi kumukasha, munoliipusha ayi, ‘Ino ndisuni kunyumfwila bani—bantu nabi Lesa?’ Amuciyeeye: Muntu umwi na wamukasha kulya, sa inga mwamunyumfwila? Sobwe, inga tamumunyumfwiliiwo! Shakulya shilayandika kwaamba ayi munooba abuumi. Ono Lesa inga wamupa buumi butamaani! Aboobo, mutakeeleshi kusuminisha muntu kumukasha kwiiya shakumucafwa ayi mube shicibusa wakwe Lesa.—Joni 17:3.