Ino mulabona ayi buumi bulaakuba buyani kunembo?

BAIBO ILAAMBA AYI

“Lesa . . . ulaakubakunkumuna minsonshi yoonse. Lufu teshi lukabeeko alimwi. Teshi kukabe buumba, kulila nabi kunyumfwa kucisa mukwiinga shintu shikulukulu shoonse shashimingana.”​—Ciyubululo 21:3, 4, The Bible in Lenje.

MBWEENGA KWIIYA MAKANI AYA KWAMUCAFWA

Mulaakuba anciito isangalasha.​—Isaya 65:21-23.

Teshi kukabeewo kuciswa na mapensho ali oonse.​—Isaya 25:8; 33:24.

Mulaakuba abuumi butamaani alimwi mulaakunosangalala pantu pomwi amukwashi abeshicibusa.​—Kulumbaisha 37:11, 29.

SA INGA TWASHOMA BAIBO NSHOYAAMBA?

Ee, ceebo ca sheebo ishi shobilo:

• Lesa alicite nkusu shakukumanisha shoonse nshaakashomesha. Mu Baibo, Yehova Lesa eenkabo ngowiitwa ayi ‘Shinkusu shoonse,’ mukwiinga alicite nkusu shiinditeewo. (Ciyubululo 15:3) Paceebo ceeco, alicite nkusu shakwaalula shintu shoonse pacishi kweelana ambwaakashomesha. Baibo ilaamba ayi, ‘shintu shoonse shilakonsheka kuli Lesa.’​—Mateyo 19:26.

• Lesa alisunishishi abuumbi kukumanisha nshaakashomesha. Kucakubonenaako, Yehova alisunishishi abuumbi kubusha bafu.​—Jobo 14:14, 15.

  Alimwi Baibo ilaamba ayi Mwanaakwe Lesa, Yesu wakashilika balwashi. Ino wakacitila nshi boobo? Ceebo cakwaamba ayi wakalinga kusuni kucita boobo. (Maako 1:40, 41) Bweenka mbuli baIshi, Yesu alakwe wakalinga kusuni abuumbi kucafwa bapengete.​—Joni 14:9.

  Aboobo, inga twashoma ayi Yehova a Yesu balisuni ayi tukanoosangalala kunembo!​—Kulumbaisha 72:12-14; 145:16; 2 Pita 3:9.