Yesu Wakalinga Kunyumfwila Lyoonse

Sa ncuubu kunyumfwila bashali bako lyoonse?— Cimwi ciindi teshi cuubu. Sa ulicishi ayi Yesu wakalinga kunyumfwila Yehova alimwi abashali bakwe?— Cakubonenaako cakwe inga cakucafwa kunyumfwila bashali bako nabi kacili ciyumu kucita boobo. Atwiiye ashimwi pali Yesu.

Yesu katana kusa pa cishi, wakalinga kukala kwiculu a Yehova, baishi. Sombi alimwi Yesu wakalinga kucite bashali pacishi. Meena abo akalinga ngu Josefu a Maliya. Sa ulicishi mbobakaba bashali bakwe?—

Yehova wakabwesa buumi bwakwe Yesu kuswa kwiculu akububika mumala mwakwe Maliya kwaamba ayi Yesu ashalwe akukala pacishi. Ici cakalinga ncaankamiko! Yesu wakakula mumala muli Maliya bweenka mbuli baana bamwi. Ndipakeenda myeenshi 9 Yesu wakashalwa. Ubu mbocakalinga kwaamba ayi Maliya aJosefu babe bashali bakwe Yesu ba pacishi.

Ndyaakalinga amyaka 12, Yesu wakacita cintu cakabonesha ayi wakalinga kusuni Yehova, baishi. Ici cakacitika ciindi Yesu amukwashi ndibakaya ku Jelusalemu kuciila ca Pasika. Ndibakaboolela kuŋanda, Josefu aMaliya tabakwe kushiba kwakalinga Yesu. Sa ulikushi nkwakalinga kubete?—

Peenka apo Josefu aMaliya bakaboolela ku Jelusalemu kuya mukulangoola Yesu. Bakalisukama abuumbi mukwiinga tabakwe kumucana. Ono ndyepakeenda nshiku shotatwe, bakamucana muŋanda yakwe Lesa! Sa ulicishi Yesu ncakacanikila muŋanda yakwe Lesa?— Mukwiinga nkwakalinga kukonsha kwiiya pali Yehova, baishi. Wakalinga kusuni Yehova alimwi akwiiya mbweenga wamusangalasha. Nabi ndyakakomena, Yesu wakatolelela kunyumfwila Yehova. Yesu wakalinga kunyumfwila nabi tacakalinga cuubu alimwi cimwi ciindi kucita boobo kwakamuletela mapensho. Sa Yesu wakanyumfwila Josefu aMaliya?— Ee, Baibo ilaamba ayi wakalinga kubanyumfwila.

Ino inga weeya nshi kuli Yesu?— Ulyeelete kunyumfwila bashali bako nabi kacili ciyumu kucita boobo. Sa ulaakucita boobo?—