Mupailo Ncoolwe Lesa Ncaakatupa

1, 2. Ino nciinshi nceenga mwaambila ayi mupailo ncipo cilibetele, alimwi ino nceebonshi ncotweelete kwiiya Baibo nshoiisha pamakani amupailo?

CISHI ca panshi nciniini abuumbi na twaceelanya abubumbo boonse. Na Yehova walanga pacishi ca panshi akubona bantu bamishobo yoonse, balabonekabo anga nkamundoondo ka maanshi kaswa mumungomo. (Kulumbaisha 115:15; Isaya 40:15) Nabi kwaamba ayi tuli baniini boobo mukutweelanya abubumbo boonse, Kulumbaisha 145:18, 19 ilaamba ayi: “Yehova ali pafwiifwi kubaabo boonse bamwiita, abo boonse bamwiita calushinisho. Abo bamuloonda ulabapa nshebayandika; ulanyumfwa kulila kwabo akubafuna.” Ncakwiila ici ncoolwe ncinene abuumbi ncotucite! Yehova, Mulengi wesu shinkusu shoonse, alisuni kuba pafwiifwi andiswe akukutika kumipailo yesu. Ncakwiila, mupailo ncoolwe, alimwi ncipo cilibetele Yehova ncaakatupa.

² Ano kwaamba ayi Yehova akutike mipailo yesu, tulyeelete kubandika anguwe munshila njaasuminisha. Kwaamba ayi tushibe nshila iyo, atwiiye Baibo nshoyaamba pamakani amupailo.

INO NCEEBONSHI TULYEELETE KUPAILA KULI YEHOVA?

3. Ino nceebonshi mulyeelete kupaila kuli Yehova?

³ Yehova alisuni ayi munobandikaakwe kwiinda mumupailo. Ino tulishi buyani? Amubelenge Bene Filipi 4:6, 7. Amuyeeyebo maswi abwiite bubotu ubu. Mweendeleshi wa bubumbo boonse alamubikila maano alimwi alisuni kwaamba ayi mumulwiite shili kumoyo wanu amapensho ngomucite.

4. Ino kupaila kuli Yehova lyoonse kulayumya buyani bushicibusa bwanu anguwe?

⁴ Mupailo ulatucafwa kuba abushicibusa buyumu a Yehova. Na beshicibusa kababandika lyoonse akulwiitana shili kumoyo, ashibasukamika, bushicibusa bwabo bulayuma. Akupaila kuli Yehova akwalo mbokubete. Kwiinda mu Baibo Yehova alatulwiita miyeeyo yakwe ashili kumoyo wakwe, alimwi alatulwiita ansheshi akacite kunembo. Na kamubandika a Yehova lyoonse, inga mwamulwiita ashili kumoyo wanu, lyalo bushicibusa bwanu anguwe bulaakuyuminaako.​—Jemusi 4:8.

INO NSHIINSHI NSHOTWEELETE KUCITA KWAAMBA AYI YEHOVA ANOOKUTIKA MIPAILO YESU?

5. Ino tulicishi buyani ayi teshi mipailo yoonse Yehova njaakutika?

⁵ Sa Yehova alakutika mipailo yoonse? Sobwe. Muciindi ca mushinshimi Isaya, Yehova wakalwiita bene Isilaeli ayi: “Teshi nkanyumfwe, nabi mukapaile mankanda aanji buyani; maansaanu aliswitebo bulowa.” (Isaya 1:15) Aboobo na twabula kubikila maano, inga twaciita shintu sheenga shatutalamusha kuli Yehova, akulengesha ayi atakutiki mipailo yesu.

6. Ino nceebonshi lushomo lulayandika? Ino inga mwatondesha buyani ayi mulicite lushomo?

⁶ Na tulisuni kwaamba ayi Yehova anookutika mipailo yesu, tulyeelete kushoma muli nguwe. (Maako 11:24) Mutumwi Paulo wakasansulula ayi: “Taakuwo muntu weenga wakondelesha Lesa kaatacite lushomo, mukwiiinga uyo woonse usuni kusena kuli Lesa alyeelete kushoma ayi Lesa mpwaali alimwi ayi ulapa shilambu kubantu abo bamuyandoola.” (Bene Ebulu 11:6) Nacibi boobo teshi kwaambabo ayi ndicite lushomo. Tulyeelete kutondesha lushomo lwesu kwiinda mukunyumfwila Yehova bushiku abushiku.​—Amubelenge Jemusi 2:26.

7. (a) Ino nceebonshi tulyeelete kuliceesha akutondesha bulemu ndyetutopaila kuli Yehova? (b) Ino inga twatondesha buyani ayi tutopaila kuswa panshi lya moyo?

⁷ Tulyeelete kuliceesha akutondesha bulemu ndyetutopaila kuli Yehova. Ino nceebonshi? Na tutobandika a mwaami nabi muleli, tulacita boobo munshila yabulemu. Yehova ngu Lesa Shinkusu shoonse, aboobo sa tatweelete kutondesha bulemu akuliceesha abuumbi ndyetutokwaamba anguwe? (Matalikilo 17:1; Kulumbaisha 138:6) Tulyeelete kwaamba shili mumoyo wesu kuteshi kunoboshaawobo maswi womwi awomwi.​—Mateyo 6:7, 8.

8. Ino nshiinshi shimwi nshotweelete kucita na tutopaila pacintu cimwi?

⁸ Kwiilikaawo, na tutoopailila pacintu cimwi, tulyeelete kusebensa cankusu kwaamba ayi tucite kweelana amupailo wesu. Kucakubonenaako, na twasenga Yehova ayi atucaafwe kucana shiyandika sha bushiku abushiku, tatweelete kukalabo akulangila ayi Yehova atupe shintu shoonse nabi tatuna kushisebensela. Tulyeelete kusebensa cankusu kwaamba ayi tucane nshetutoyandika. (Mateyo 6:11; 2 Bene Tesalonika 3:10) Na tutoopaila ayi Yehova atucaafwe kucileka kucita shibiibi, tulyeelete kuleya shintu, misena, na bukaalo bweenga bwatubika mubweelesho. (Bene Kolose 3:5) Ano atubandike miipusho bantu baanji njobeepusha pamakani amupailo.

MIIPUSHO BAANJI NJOBEEPUSHA PAMAKANI AMUPAILO

9. Ino tulyeelete kupaila kuli ani? Ino lilembo lyakwe Joni 14:6 lilatwiisha nshi pamakani amupailo?

⁹ Ino tulyeelete kupaila kuli ani? Yesu wakaiisha bashikwiiya bakwe kupaila kuli ‘Ishiwesu wakwiculu.’ (Mateyo 6:9) Alimwi wakaamba ayi: “Nebo ndime nshila, lushinisho alimwi abuumi. Taaku muntu weenga washika kuli baTa, sombibo kwiinda muli ndime.” (Joni 14:6) Aboobo tulyeelete kupailabo kuli Yehova kwiinda muli Yesu. Ino kupaila kwiinda muli Yesu cilaambanshi? Kwaamba ayi Yehova akumbule mipailo yesu, tulyeelete kutondesha bulemu kulubasu lulibetele Yehova ndwaakapa Yesu. Bweenka mbuli mbotwakeeya, Yesu wakesa pacishi ca panshi kusa mukutupulusha kububi alufu. (Joni 3:16; Bene Loma 5:12) Yehova wakabika Yesu mbuli Mupailishi Munene aMoomboloshi.​—Joni 5:22; Bene Ebulu 6:20.

10. Sa kuli mbotweelete kukala ndyetutoopaila? Amusansulule.

¹⁰ Sa tulyeelete kufukama, kukala, na kwiimikana ndyetutoopaila? Sobwe, Yehova taatwaambili ayi tulyeelete kufukama, kukala, na kwiimikana ndyetutoopaila. Baibo ilatwiisha ayi inga twabandika a Yehova munshila ili yoonse yabulemu. (1 Makani 17:16; Neyemiya 8:6; Danyelo 6:10; Maako 11:25) Cintu ciyandika kuli Yehova teshi mbotwakala ndyetutoopaila, sombi kwaamba anguwe munshila yabulemu alimwi kuswa panshi lya moyo. Inga twapaila cakupoosha na mumoyo kuli koonse nkotubete alimwi paciindi cili coonse. Na twapaila kuli Yehova inga twashooma kwaamba ayi atootukutika nabi bamwi tabakwe kutunyumfwa.​—Neyemiya 2:1-6.

11. Ino shintu nshi nsheenga twasenga Yehova mumupailo?

¹¹ Ino nshintu nshi nsheenga twapaililaawo? Inga twasenga shili shoonse shicatene akuyanda kwakwe Yehova. Baibo ilaamba ayi: ‘Tulishinishite kwaamba ayi ulanyumfwa na twamusenga cili coonse kweelana akuyanda kwakwe.’ (1 Joni 5:14) Sa inga twaseenga ashintu shapalweesu? Ee. Kupaila kuli Yehova kulyeelete kuba anga nkubandika ashicibusa ngotusuni abuumbi. Inga twamulwiita Yehova shili shoonse shili mumoyo wesu. (Kulumbaisha 62:8) Inga twamusenga ayi atupe mushimu usalashi kwaamba ayi utucaafwe kucita shibotu. (Luka 11:13) Alimwi inga twaseenga ayi Yehova atupe busongo bwakusala kabotu shakucita, alimwi inga twapaila ayi atupe nkusu shakuliyumya mumapensho. (Jemusi 1:5) Tulyeelete kusenga Yehova kwaamba ayi atulekelele shibiibi shesu. (Bene Efeso 1:3, 7) Tulyeelete kupaililaako abamwi, kwiilikaawo amukwashi wesu abamakwesu abenankashi mulibungano.​—Milimo 12:5; Bene Kolose 4:12.

12. Nciinshi ncotweelete kubika panembo mumipailo yesu?

¹² Nciinshi ncotweelete kubika panembo mumipailo yesu? Yehova akuyanda kwakwe. Tulyeelete kumulumba camoyo woonse pashintu shoonse nshaatucitila. (1 Makani 29:10-13) Tulicishi boobo mukwiinga Yesu ndyaakalinga pacishi ca panshi, wakaiisha bashikwiiya bakwe bwa kupaila. (Amubelenge Mateyo 6:9-13.) Wakaamba ayi balyeelete kutaanguna kusenga ayi liina lyakwe Lesa lisalashikwe, nkokwaamba ayi, kulibona ayi lilisalalite. Lyalo Yesu wakatondesha ayi tulyeelete kupaila ayi Bwaami bwakwe Lesa bwise akuyanda kwakwe kucitwe pacishi coonse ca panshi. Pesule lyakwaamba shintu shiyandika ishi lyalo Yesu ndyaakaamba ayi inga twasenga nshetuyandika. Na katubika Yehova akuyanda kwakwe panembo mumipailo yesu, tulatondesha ayi ishi nshoshintu shiyandika abuumbi mubuumi bwesu.

13. Ino mipailo yesu ilyeelete kuba ilaamfu buyani?

¹³ Ino mipailo yesu ilyeelete kuba ilaamfu buyani? Baibo tayaambiwo. Mipailo yesu inga yaba ilaamfu na ifwiifwi, kweelana abukaalo. Kucakubonenaako, mupailo wa cakulya inga waba ufwiifwi, ano ndyetutolumba Yehova pashintu shimwi na kumulwiita shitootusukamika, mupailo inga waba ulaamfu. (1 Samwelo 1:12, 15) Tatusuni kwaamba mipailo ilaamfu kwaamba ayi bamwi batuboone, bweenka mbuli bamwi mbobakalinga kucita muciindi cakwe Yesu. (Luka 20:46, 47) Mipailo ya mushobo uyo taimusangalashiwo Yehova. Cintu cinene kuli Yehova nkupaila kuswa panshi lya moyo.

14. Ino tulyeelete kupaila mankanda ongaye, alimwi ino ici cilatwiisha nshi pali Yehova?

¹⁴ Ino tulyeelete kupaila mankanda ongaye? Yehova alisuni ayi tunokwaamba anguwe lyoonse. Baibo ilaamba ayi tulyeelete ‘kutolelela kupaila,’ ‘kupaila lyoonse,’ ‘akupaila cakutacileka.’ (Mateyo 26:41; Bene Loma 12:12; 1 Bene Tesalonika 5:17) Yehova alilibambite lyoonse kukutika kumipailo yesu. Inga twamulumba bushiku buli boonse ceebo calusuno lwakwe apashintu shiinji nshaatupa. Inga twamusenga ayi atutanjilile, atupe nkusu, akutuyuminisha. Na ncakwiila tulalumba coolwe ca mupailo, tunanoobandika a Yehova ciindi cili coonse.

15. Ino nceebonshi tulyeelete kwaamba ayi “ameni” pesule lya mupailo?

¹⁵ Ino nceebonshi tulyeelete kwaamba ayi “ameni” pesule lya mupailo? Liswi lyakwaamba ayi “ameni” lilasansulula ayi “ncancine” na “acibe boobo.” Na twaamba ayi ameni tulatondesha ayi ncakwiila tulishinishite anshetwaamba mumupailo. (Kulumbaisha 41:13) Baibo ilatwiisha ayi cili kabotu kwaamba ayi “ameni,” cakupoosha na mumoyo, pesule lya mupailo waambwa panembo lya bantu baanji mukwiinga ici cilatondesha ayi twasuminisha shaambwa mumupailo.​—1 Makani 16:36; 1 Bene Kolinto 14:16.

LESA MBWAAKUMBULA MIPAILO YESU

16. Sa ncakwiila Yehova alakumbula mipailo yesu? Amusansulule.

¹⁶ Sa ncakwiila Yehova alakumbula mipailo yesu? Ee, alakumbula. Baibo ilamwiita ayi ‘shikukutika mipailo.’ (Kulumbaisha 65:2) Yehova alakutika akukumbula mipailo ya bantu baanji bapaila kuli nguwe camoyo woonse alimwi alacita boobo munshila shipusene pusene.

17. Ino Yehova alasebensesha buyani baanjelo a basebenshi bakwe pacishi ca panshi kukumbula mipailo yesu?

¹⁷ Yehova alakumbula mipailo yesu kwiinda mukusebensesha baanjelo abasebenshi bakwe pa pacishi ca panshi. (Bene Ebulu 1:13, 14) Kuli shakubonenaako shiinji sha bantu bakasenga lucafwo lwakunyumfwisha Baibo lyalo ndipakeenda ciindi ciniinibo bakapolelwa a Bakamboni Bakwe Yehova. Baibo ilatondesha ayi baanjelo abalo balaabanamo lubasu mukwaambilisha “makani abotu” pacishi coonse. (Amubelenge Ciyubululo 14:6.) Alimwi, buunji bwandiswe twakapailawo kale kuli Yehova kwaamba ayi atucaafwe alipenshi limwi na kubulisha kumwi lyalo mukwesu na nankashi wakatupa lucafwo ndotwakalinga kuyandika.​—Tushimpi 12:25; Jemusi 2:16.

18. Ino Yehova alasebensesha buyani mushimu wakwe usalashi a Baibo kukumbula mipailo?

¹⁸ Yehova alasebensesha mushimu wakwe usalashi kukumbula mipailo yesu. Na twapaila ayi atucaafwe kulwana lipenshi limwi, inga wasebensesha mushimu wakwe usalashi kututanjilila akutupa nkusu. (2 Bene Kolinto 4:7) Kwiilikaawo, Yehova alakumbula mipailo yesu akutucafwa kusala kabotu kwiinda mukusebensesha Baibo. Na twabelenga Baibo, inga twacana malembo eenga atucafwa. Ndyetuli kumabungano Yehova inga wapa kwaamba ayi umwi aambe cikumbulo ceenga catucafwa na kulengesha munene umwi kwaamba sheenga shatuyuminisha kuswa mu Baibo.​—Bene Galatiya 6:1.

19. Ino nceebonshi cimwi ciindi inga caboneka anga Yehova taatookumbula mipailo yesu?

¹⁹ Cimwi ciindi, mpashi inga twaliipusha ayi, ‘ino nceebonshi Yehova ambulyono taatookumbula mipailo yangu?’ Mutaluubi ayi ngoocishi kabotu ciindi ceelete anshila ibotu mbweenga wacita boobo. Alishi kabotu nshetuyandika. Mpashi tulyeelete kutolelela kupaila kwaamba ayi tutondeshe ayi ncancine tutoyandishisha nshetwasenga alimwi tulishomete muli nguwe. (Luka 11:5-10) Cimwi ciindi Yehova alakumbula mipailo yesu munshila njetutatokwiingashila. Kucakubonenaako, inga twapaila ayi atucaafwe kumanisha lipenshi limwi, ono muciindi cakumana lipenshi ilyo, inga watupabo nkusu sha kwaamba ayi tucikoonshe kuliyumya.​—Amubelenge Bene Filipi 4:13.

20. Ino nceebonshi tulyeelete kupaila kuli Yehova lyoonse?

²⁰ Ncakwiila kupaila kuli Yehova ncoolwe cibotu abuumbi! Inga twashooma kwaamba ayi alakutika mipailo yesu. (Kulumbaisha 145:18) Alimwi na lyoonse katupaila kuli Yehova camoyo woonse, tulaakuyumya bushicibusa bwesu anguwe.