Sa Ndyeelete Kulyaaba Kuli Lesa Akubombekwa?

1. Ino nciinshi nceenga mwasuna kuyeeyawo cakubikila maano pesule lyakwiiya libuku ili?

MWEEYA shiinji Baibo nshoiisha kuswa mulibuku ili, makani mbuli buumi butamaani Lesa mbwaakashomesha, cicitika na muntu wafwa, abulindilishi bwa bubuke. (Shikushimikila 9:5; Luka 23:43; Joni 5:28, 29; Ciyubululo 21:3, 4) Mpashi mwakatalika akuya kumabungano aBakamboni Bakwe Yehova akubona nobeene ayi bupailishi bwabo mbwancine. (Joni 13:35) Mpashi mwatalika akuba abushicibusa buyumu a Yehova, alimwi mpashi mwasalawo kumusebensela. Aboobo inga mwaliipusha ayi, ‘Ino nciinshi nconjeelete kucita kwaamba ayi nsebensele Lesa?’

2. Ino nceebonshi musankwa waku Isopya wakalinga kusuni kubombekwa?

² Ishi nsheshakacitikila amusankwa umwi waku Isopya muciindi cakwe Yesu. Paciindi cimwi pesule lya kubushikwa kwakwe Yesu, Filipi shikwiiya wakwe Yesu, wakashimikila musankwa uyu. Filipi wakacafwa muntu uyu kunyumfwisha ayi Yesu ngowakalinga Mesiya. Maswi ngaakeeya musankwa waku Isopya uyu akamucata kumoyo abuumbi cakwaamba ayi peenkapo wakaamba ayi: “Amubone anaya maanshi! Sa kuli cimwi ceenga cankasha kubombekwa?”​—Milimo 8:26-36.

3. (a) Ino ngumulawo nshi Yesu ngwaakapa bashikwiiya bakwe? (b) Ino muntu alyeelete kubombekwa buyani?

³ Baibo ilatondesha patuba ayi na muntu alisuni kusebensela Yehova, alyeelete kubombekwa. Yesu wakalwiita bashikwiiya bakwe ayi: “Kamuya mukaiishe bantu bamishobo yoonse, akubabombeka.” (Mateyo 28:19) Alimwi Yesu mwiine wakatondesha cakubonenaako kwiinda mukubombekwa. Tabakwe kumusansa maanshi pamutwi sombi bakamupisha mubili woonse mumaanshi. (Mateyo 3:16) Amunshiku shino mbocibete, Mwineklistu uli woonse alyeelete kupishikwa mubili woonse ndyaatobombekwa.

4. Ino kubombekwa kwanu kulatondesha nshi kubamwi?

⁴ Na mwabombekwa, mulatondesha kumuntu uli woonse kwaamba ayi ncakwiila mulisuni kuba shicibusa wakwe Lesa akumusebensela. (Kulumbaisha 40:7, 8) Aboobo inga mwaliipusha ayi, ‘Ino nciinshi nconjeelete kucita kwaamba ayi mbombekwe?’

LUSHIBO A LUSHOMO

5. (a) Ino nciinshi ncomweelete kutaanguna kucita kamutana kubombekwa? (b) Ino nceebonshi mabungano a Bwineklistu ncayandikila?

⁵ Kamutana kubombekwa, mulyeelete kushiba Yehova a Yesu. Mwatalika kale kucita boobo kwiinda mukwiiya Baibo. (Amubelenge Joni 17:3.) Nacibi boobo kuli ashimwi shiyandika. Baibo ilaamba ayi mulyeelete kuba “baswite alushibo lwiine lwiine” lwa kuyanda kwakwe Yehova. (Bene Kolose 1:9) Mabungano aBakamboni Bakwe Yehova alaakumucafwa kuyumya bushicibusa bwanu a Yehova. Ngomulandu womwi ncociyandikila kucanika kumabungano ayo lyoonse.​—Bene Ebulu 10:24, 25.

6. Ino mulyeelete kushiba shintu shiinji buyani kamutana kubombekwa?

⁶ Ncakwiila, Yehova talangili kwaamba ayi mushibe shoonse shili mu Baibo lyalo ndyeenga mwabombekwa sobwe. Teshi nshaakalinga kulangila ku musankwa waku Isopya kaatana kubombekwa. (Milimo 8:30, 31) Alimwi kwiiya pali Lesa kulaakutolelela kwamuyayaya. (Shikushimikila 3:11) Ono kwaamba ayi mubombekwe, mulyeelete kushiba akusumina njiisho shitaanshi shamu Baibo.​—Bene Ebulu 5:12.

7. Ino kwiiya Baibo kwamucafwa buyani?

⁷ Baibo ilaamba ayi: “Taaku muntu weenga wakondelesha Lesa kaatacite lushomo.” (Bene Ebulu 11:6) Aboobo mulyeelete kuba alushomo kamutana kubombekwa. Baibo ilatulwiita ayi bantu bamwi kundabala ya Kolinto yakale kale “bakashoma akubombekwa” ndibakanyumfwa makani akalinga kwiisha bashikwiiya bakwe Yesu. (Milimo 18:8) Amwebo kwiiya Baibo kwanu kwamucafwa kuba alushomo mushishomesho shakwe Lesa ankusu sha mulambu wakwe Yesu, isho sheenga shatupulusha kuswa kububi alufu.​—Joshuwa 23:14; Milimo 4:12; 2 Timoti 3:16, 17.

AMULWIITEEKO BAMWI NSHEMUTOKWIIYA

8. Ino nciinshi ceshi cikamupe kulwiitaako bamwi nshomweeya?

⁸ Ndyemutokwiiya Baibo akubona mboyamucafwa mubuumi bwanu, lushomo lwanu lulaakuyuminaako. Ici cilaakumupa kusuna kulwiitaako bamwi nshemutokwiiya. (Jelemiya 20:9; 2 Bene Kolinto 4:13) Ono ino ngaani ngweenga mwalwiitaako nshemutokwiiya?

9, 10. (a) Ino ngani ngweenga mwataanguna kushimikila nshemutokwiiya? (b) Ino inga mwacita buyani na mulisuni kwaabanaamo lubasu mukushimikila alibungano?

⁹ Mpashi inga mwalwiitaako beshikamukowa, babyaanu, mbomubambeneabo, na mbomusebensaabo nshomweeya. Ono mulyeelete kucita boobo cakuliceesha alimwi calusuno. Mukuya kwaciindi, inga mweelela kushimikila pomwi a libungano. Na mwabona ayi mwalibambila, inga mwalwiita Kamboni utomwiisha Baibo kwaamba ayi mulisuni kwabanaamo lubasu mukushimikila pomwi alibungano. Na kamboni uyo akabone ayi ncakwiila mwalibambila alimwi mutookonkela kabotu njiisho shamu Baibo mubuumi bwanu, bamanene bobilo balaakubandika andimwe nobilo.

¹⁰ Ino nshiinshi bamanene nsheshi bakabandike andimwe? Bamanene balaakusuna kushiba na mulanyumfwishisha akushoma njiisho shitaanshi shamu Baibo, na mutookonkela Baibo nshoyaamba mubuumi bwanu, alimwi na ncakwiila mulisuni kuba womwi wa Bakamboni Bakwe Yehova. Mutaluubi ayi bamanene mbobalama uli woonse mulibungano, kwiilikaawo andimwe, aboobo mutaloondi kubandika abo. (Milimo 20:28; 1 Pita 5:2, 3) Pesule lyakubandika abamanene, balaakumulwiita na mweelela kutalika kushimikila pomwi alibungano.

11. Ino nceebonshi kwaalula buumi kulayandika abuumbi kamutana kutalika kushimikila pomwi alibungano?

¹¹ Kweelana ambweenga babona, mpashi bamanene inga bamusansulwita ayi mulyeelete kwaalula shimwi mubuumi kwaamba ayi mweelele kushimikila pomwi alibungano. Ino nceebonshi kwaalula buumi kulayandika abuumbi? Kulayandika mukwiinga tuleemikaninaako Yehova ndyetutooshimikila bamwi pali nguwe, aboobo tulyeelete kukala buumi butondesha bulemu kuli nguwe.—1 Bene Kolinto 6:9, 10; Bene Galatiya 5:19-21.

KWAANA KUSWA KUSHIBIIBI AKUPILULUKA

12. Ino nceebonshi muntu uli woonse alyeelete kwaana kuswa kushibiibi?

¹² Kuli acimwi ncomweelete kucita kamutana kubombekwa. Mutumwi Pita wakaamba ayi: “Amwaane kuswa kushibiibi shanu akupiluluka, kwaamba ayi shibiibi shanu shifutwe.” (Milimo 3:19) Ino kwaana kuswa kushibiibi cilaambanshi? Cilaamba kulinyumfwa cibiibi ceebo ca shintu shibiibi nshetwakacita. Kucakubonenaako, na mwakalinga kucita bufuule mubuumi bwanu, mulyeelete kwaana. Alimwi nabi kwaamba ayi mwakeelesha kucita shibotu mubuumi bwanu boonse, mulyeelete kwaana ceebo soonse tulabisha, aboobo tulyeelete kusenga kulekelelwa kuswa kuli Lesa.​—Bene Loma 3:23; 5:12.

13. Ino “kupiluluka” cilaambanshi?

¹³ Sa tulyeelete kulinyumfwabo cibiibi ceebo ca shintu nshetwakacita? Sobwe. Pita wakaamba ayi tulyeelete “kupiluluka.” Nkokwaamba ayi mulyeelete kucileka kucita shibiibi shili shoonse nshemwakalinga kucita kale kale akutalika kucita shiluleme. Mucikoshanyo, amuyeeye kwaamba ayi mutooya kumusena nkomutana kuyaawo kale. Pesule lya kweendaako kwakaciindi lyalo mwaboona ayi teshi nkonkuko. Ino inga mwacita buyani? Cakutatoonsha inga mweemikana akusanduluka, akululama nshila yeelete. Kwiiya Baibo akwalo mbokubete. Ndyemutokwiiya mulaakushiba kwaamba ayi kuli shintu mubuumi bwanu nshomweelete kwaalula. Aboobo mulyeelete “kusanduka”​—nkokwaamba ayi kucileka kucita shibiibi​—akutalika kucita shibotu.

AMULYAABE KULI YEHOVA

14. Ino kulyaaba kuli Yehova cilaambanshi?

¹⁴ Cintu cimwi ciyandika abuumbi ncomweelete kucita kamutana kubombekwa nkulyaaba kuli Yehova. Kulyaaba kuli Yehova, cilaamba kushomesha Yehova mumupailo kwaamba ayi mulaakunopailabo nguwe akubika kucita kuyanda kwakwe kuba cintu ciyandika abuumbi mubuumi bwanu.​—Dutolonomi 6:15.

15, 16. Ino nciinshi ciyuminisha muntu kulyaaba kuli Lesa?

¹⁵ Kushomesha kusebenselabo Yehova eenka kulibo anga nkushomesha muntu ngomusuni ayi mulaakukalaakwe buumi bwanu boonse. Amuyeeye ayi musankwa alisuni kweeba. Musankwa uyo ndyaatobona mibo ibotu ya mwanakashi, lusuno lwakwe pa mwanakashi uyo lulakomena aboobo inga wasuna ayi beebane. Nabi kwaamba ayi kweeba ngamakani anene, musankwa alasumina mukuli uyu mukwiinga alimusuni mwanakashi.

¹⁶ Ndyemutokwiiya pali Yehova, lusuno lwanu pali nguwe lulaakukomena aboobo mulaakuyandishisha kumusebensela. Ici cilaakumuyuminisha kumushomesha mumupailo kwaamba ayi mulaakumusebensela. Baibo ilaamba ayi uyo woonse usuni kukonkela Yesu alyeelete “kulikaka.” (Maako 8:34) Ino kulikaka cilaambanshi? Cilaamba kubika kunyumfwila Yehova panembo lya shintu shoonse mubuumi bwanu. Nkokwaamba ayi kucita kuyanda kwakwe Yehova kulaba cintu ciyandika abuumbi kwiinda nshemusuni kucita nobeene.​—Amubelenge 1 Pita 4:2.

MUTALOONDI AYI MULAAKWAALILWA

17. Ino nciinshi cipa bamwi kutalyaaba kuli Yehova?

¹⁷ Bantu bamwi balaloonda kulyaaba kuli Yehova, ceebo cakuyeeya ayi inga baalilwa kucita mbobakashomesha. Tabasuni kukalasha Yehova alimwi balayeeya ayi cili kabotu kutalyaaba, mukwiinga na wacita cibiibi Yehova inga taakupiwo mulandu.

18. Ino nciinshi ceenga camucafwa kutaloonda ayi inga mwaalilwa kushomeka kuli Yehova?

¹⁸ Lusuno lwanu pali Yehova lulaakumucafwa kutaloonda kulyaaba ceebo cakuyeeya ayi inga mwaalilwa kushomeka kuli nguwe. Mukwiinga mulimusuni, mulaakusebensa cankusu kukumanisha cishomesho canu kuli nguwe. (Shikushimikila 5:4; Bene Kolose 1:10) Teshi mukayeeye ayi kucita kuyanda kwakwe Yehova ncintu ciyumu. Mutumwi Joni wakalemba ayi: “Kusuna Lesa nkukonkela milawo yakwe; alimwi milawo yakwe teshi iyumu.”​—1 Joni 5:3.

19. Ino nceebonshi tamweelete kuloonda kulyaaba kuli Yehova?

¹⁹ Tamweelete kuba basalalite kwaamba ayi mucikoonshe kulyaaba kuli Yehova alimwi Yehova taatulangili kucita nsheenga tatucikoonshi. (Kulumbaisha 103:14) Alaakumucafwa kucita shintu shiluleme. (Isaya 41:10) Amushome Yehova camoyo woonse, lyalo ‘alakwe alaakululamika nshila shanu.’​—Tushimpi 3:5, 6.

MBWEENGA MWATONDESHA KULYAABA KWANU KUBANTU BOONSE

20. Ino nciinshi cikonkelaawo pesule lyakulyaaba?

²⁰ Sa mutobona ayi mwalibambila kulyaaba kuli Yehova? Pesule lyakulyaaba kuli Yehova, nkokwaamba ayi mwalibambila kucita cintu acimwi ciyandika. Mulyeelete kubombekwa.

21, 22. Ino inga mwaambilisha buyani ‘lushomo lwanu kubantu boonse’?

²¹ Amulwiite shikubunganya likoto lya bamanene wa mulibungano lyanu kwaamba ayi mwakalyaaba kuli Yehova aboobo mulisuni kubombekwa. Lyalo alaakulwiita bamanene bamwi kumwiindulusha mumiipusho ya njiisho shitaanshi shamu Baibo. Na bakabone ayi mutokweelela, balaakumulwiita ayi inga mwabombekwa pakubungana kwalubasu na kunene kutoosa kwa Bakamboni Bakwe Yehova. Pakubungana uko, palaakuba likani lisansulula kabotu kubombekwa ncocaamba. Lyalo mwaambi wa likani ilyo alaakwiipusha baabo batooya mukubombekwa miipusho yuubu yobilo. Kwiinda mukukumbula miipusho iyo, ‘mulaakwaambilisha lushomo lwanu kubantu boonse.’​—Bene Loma 10:10.

²² Lyalo mulaakubombekwa. Balaakumupisha mumaanshi mubili woonse. Kubombekwa kwanu kulaakutondesha bantu boonse kwaamba ayi mwakalyaaba kuli Yehova alimwi mwaba womwi wa Bakamboni Bakwe Yehova ano.

KUBOMBEKWA KWANU NCOKWIIMIKANINAAKO

23. Ino kubombekwa “muliina lya baTa, alya Mwaana alimwi alya mushimu usalashi” cilaambanshi?

²³ Yesu wakaamba ayi bashikwiiya bakwe balaakubombekwa “muliina lya baTa, alya Mwaana alimwi alya mushimu usalashi.” (Amubelenge Mateyo 28:19.) Ino ici cilaambanshi? Cilaamba ayi mulishi akusumina bweendeleshi bwakwe Yehova alubasu Yesu ndwaacite mukukumanisha kuyanda kwakwe Lesa alimwi a Lesa mbwaasebensesha mushimu wakwe kukumanisha kuyanda kwakwe.​—Kulumbaisha 83:18; Mateyo 28:18; Bene Galatiya 5:22, 23; 2 Pita 1:21.

24, 25. (a) Ino kubombekwa kulemikaninaako nshi? (b) Ino tulaakubandika makani nshi mumutwi wakweelaako?

²⁴ Kubombekwa kuleemikaninaako cintu cimwi ciyandika abuumbi. Kupishikwa mumaanshi, cilaamba ayi mwafwa na mwashiya buumi bwanu bwakale kale. Lyalo ndyemwaswa mumaanshi, mulatalika buumi bupya bwakucita kuyanda kwakwe Lesa. Cilatondesha ayi kuswabo paciindi ici akuya kunembo munanoosebensela Yehova. Mulyeelete kwiibaluka kwaamba ayi tamuna kulyaaba kumuntu, kulibunga, na kuncito. Sombi mwaaba buumi bwanu kuli Yehova.

²⁵ Kulyaaba kwanu kulaakumucafwa kuba abushicibusa buyumu a Yehova. (Kulumbaisha 25:14) Ono ici tacaambi ayi muntu ulaakupuluka ceebo cakwaamba ayi wakabombekwa. Mutumwi Paulo wakaamba ayi: “Amutolelele kusebensela lupulusho lwanu caboowa akututuma.” (Bene Filipi 2:12) Kubombekwa ngamatalikilobo. Ono ino inga mwacita buyani kwaamba ayi mutolelele kuba abushicibusa buyumu a Yehova? Mutwi wakweelaako mulibuku ili ulaakukumbula mwiipusho uyu.