LUBASU 3
Kuba Amfundilishi—Na Bamwi ‘Batubishisha’
“Nankashi mulibungano lyesu wakambekesha ayi ndamwiipila maali. Abamwi mulibungano bakaanyumfwa makani ayo akutalika kusuminisha ayi ncancine ndime ndakeepa maali. Ndipakeenda ciindi cakesa mukushibikwa ayi teshi ndime ndakeepa maali. Nabi kwaamba ayi wakesa mukusenga ayi mulekelele, cakancisa abuumbi cakwaamba ayi ndakalinga kunyumfwa ayi teshi nkamulekelelewo.”—baLinda.
SA amwebo mulalinyumfwa bweenka mbuli baLinda, bakakalashikwa abamwi mulibungano? Cabicawo ncakwaamba ayi bamwi na bakalashikwa ashacita bashominyinaabo balaboolela mwisule kushintu shakumushimu. Sa amwebo nsheshakamucitikila ishi?
Sa Kuli Muntu Weenga ‘Watupansaanya Alusuno Lwakwe Lesa’?
Ncakwiila, kulekelela mushominyineesu na watubishisha teshi cuubu sobwe. Mukwiinga Beneklistu balyeelete kuba alusuno ku umwi amubye. (Joni 13:34, 35) Cilacisa abuumbi na mushominyineesu ngowatubishisha.—Kulumbaisha 55:12.
Ncakwiila, Baibo ilatondesha ayi cimwi ciindi Beneklistu balakonsha ‘kubishishanya.’ (Bene Kolose 3:13) Nacibi boobo, na shatucitikila, inga catushupa kushiba nshetweelete kucita. Sa kuli ceenga catucafwa? Atubone njiisho shotatwe shamu Baibo:
Ishiwesu wakwiculu ulabona shoonse. Yehova ulabona shoonse shitucitikila, kwiilikaawo amapensho ali oonse ngweenga twacaana. (Bene Ebulu 4:13) Kwiilikaawo pasheeshi, Yehova ulatunyumfwila nkumbu na katupenga. (Isaya 63:9) Talekeleliiwo “Mapensho na makatasho na cintu cimwi cili coonse—nabi musebenshi wakwe umwi—‘kutupansaanya alusuno lwakwe Lesa.’ (Loma 8:35, 38, 39) Sa inga taciboti na aswebo twacita bweenka mbuli Yehova, kwiinda mukutalekelela cilicoonse na muntu uli woonse kutupansaanya aYehova?
Kulekelela tacaambi kusuminisha cibiibi. Na twalekelela baabo bakatubishisha, tacaambi ayi nshebakacita shakalinga kabotu, na kwaamba ayi twasuminisha shibiibi nshebakacita. Mutaluubi kwaamba ayi Yehova tasuminishi bubiibi, nacibi boobo na muntu walilekelela, Yehova ulanyumfwa nkumbu akumulekelela. (Kulumbaisha 103:12, 13; Abakuku 1:13) Na Yehova watuyuminisha kulekelela bamwi, nkokwaamba ayi utotwiisha kucita mbwacita. ‘Bukali bwakwe bulamana.’—Kulumbaisha 103:9; Mateyo 6:14.
Tulacana mpindu na twalekelela bamwi. Ino munshila nshi? Atuyeeye kwaamba ayi, mwanyamuna libwe lilemu paniini. Inga mwacikonsha kucita boobo kwaciindi ciniini. Ino inga caba buyani na mwalinyamuna kwaciindi cilaamfu? Inga mwacikonsha kulinyamuna kwaciindi cilaamfu buyani—mamineti? woola lyomwi? na kwiindaawo? Cakutatoonsha, lyaansa lilakonsha kulema! Ncakwiila, kulema kwa libwe takwaaluki. Sombi kulinyamuna ciindi cilaamfu inga kwamulemya. Bweenka ubo mbocibete na muntu ulabikila mfundilishi. Kubika cintu kumoyo kwaciindi cilaamfu—nabi kacili ciniini buyani—cilatucisa sobeene. Anu ngomulandu Yehova ncatuyuminisha ayi tatweelete kubikila mfundilishi. Ncakwiila tulacana mpindu na twalekelela bamwi.—Tushimpi 11:17.
Tulacana mpindu na twalekelela bamwi
“Ndakanyumfwa Anga Yehova Mwiine Utokwaamba Andime”
Ino nciinshi cakacafwa baLinda kwaamba ayi batabikili mfundilishi ndyebakakalashikwa amushominyinaabo? Cintu comwi pasheesho shakabacafwa nkuyeeya Malembo aamba sha makani akulekelelana. (Kulumbaisha 130:3, 4) Cakabacafwa abuumbi baLinda nkushiba kwaamba ayi na twalekelela bamwi alakwe Yehova ulatulekelela. (Bene Efeso 4:32–5:2) Kushiba sheeshi kwakalengesha baLinda kwaamba ayi: “Ndakanyumfwa anga Yehova mwiine utokwaamba andime.”
Mukuya kwaciindi baLinda bakacileka kubikila mfundilishi. Bakamulekelela nankashi, alimwi pacecino ciindi ngushicibusa wabo ngobasuni abuumbi. BaLinda baya panembo mukusebensela Yehova. Amushome kwaamba ayi Yehova ulisuni kumucafwa kwaamba ayi amwebo mucite bweenka mbuli baLinda.