MWIIPUSHO 5

Ino Inga Ndacita Buyani Na Kucikolo Kabancita Luta?

MULANDU MWIIPUSHO UYU NCOSUNIKI

Nceenga wacita na umwi utoocita luta inga calengesha ayi lipenshi liceye—na ayi likomene.

**INO INGA WACITA BUYANI?**

Yeeya bukalo ubu: Thomas tasuniwo kuya kucikolo sunu. Na ciilo. Ulisunibo kucileka. Lipenshi lyakatalika myeenshi yotatwe yakwisule babye kucikolo ndyebakamubekesha makani akubeca. Mpeeke bakatalika kumwiita meena atabete kabotu. Shimwi shiindi umwi wakamusowela mabuku mumaansa akucita anga taana kumubona, umwi wakalinga mwisule lyakwe wakamushindika, Thomas ndyakacebuka taakwe kushiba ayi wamushindika ngaani. Ciilo shintu shakeendawo kubica ndyaakatambula makani akumuloondesha pa intaneti . . .

Na ndiwe Thomas, ino inga wacita buyani?

IMIKANA AKUYEEYA!

Tacaambi ayi taakuwo nceenga wacikonsha kucita sobwe! Inga wacikonsha kukoma shikucita luta kwakubula kumulwana. Munshila nshi?

UTAKALALI. Baibo ilaamba ayi: “Muluya ulatondesha bukali bwakwe boonse, sombi musongo lakwe ulalicata na wakalala.” (Tushimpi 29:11) Na watolelela kulicata—akutatondesha ayi wakalala—abo bakucita luta inga banyumfwa butolo akucileka.
UTABOOSHELI CIBIIBI. Baibo ilaamba ayi: “Na muntu wakubishisha, webo tooelete kumubishisha.” (Bene Loma 12:17) Kubooshela cibiibi inga kwalengeshabo ayi lipenshi likomene.
UTALINJISHI MUMAPENSHO. Baibo ilaamba ayi: “Muntu ucenjete ulabona mapensho ali kunembo akwaayuba.” (Tushimpi 22:3) Na kacikonsheka, talamuka bantu bacite luta alimwi abukalo bweenga bwalengesha ayi bakutalike.
ELESHA KUKUMBULA MUNSHILA NJOBATENGASHILI. Baibo ilaamba ayi: “Kukumbula kabotu kulabombya bukali.” (Tushimpi 15:1) Elesha kukumbula munshila isekesha. Kucakubonenaako, na shiluta wakulwiita ayi weena maningi, inga wamukumbula ayi: “Anu awebo wabona ayi ndisuniki kukoka ayi!”
UTACANIKI KUMUSENA WABO. Nora ucite myaaka 19 wakaamba ayi: “Kuumunabo kulatondesha ayi ulishimpite alimwi ulicite nkusu kwiinda muntu uyo utoocita luta. Kulatondesha ayi ulalikasha, miibo njatacite shiluta uyo.”—2 Timoti 2:24.
ULYEELETE KUBA MUNTU UCISHI KULIMIKANINA. Bantu bacite luta balashiba na ulicite boowa abuumbi, alimwi na taakuwo cili coonse nceenga wacita. Mubupusano bantu bacite luta baanji balacileka na babona ayi inga tobasuminishi kukusekanya.
LWIITAKO MUNTU UMWI. Muntu umwi wakalinga tica kale kale wakaamba ayi: “Ntoyuminisha abo boonse beshikupenshekwa abeshiluta ayi balyeelete kwaamba muciindi cakuumunabo. Ncecintu ceelete kucita, alimwi inga cacafwa bamwi ayi abalo batabaciti luta.”

Musankwa wacanike walangana ashikucita luta cakubula boowa — Kulimikanina omwiine kulaakukupa nkusu nshatacitewo shiluta

Sa Ulicishi?

Kuteshibo kuuma muntu, kucita luta kuleelikawo a:

Kwaambila muntu maswi abiibi. “Teshi nkalubewo meena ngobakalinga kunjita na shintu nshebakalinga kuŋaamba. Bakanengesha kulinyumfwa anga ngumuntu utacitewo ncito, utasuniki. Alimwi akubonesha anga taakuwo ambombete cakalingabo kabotu akunguma.”—Celine, ucite myaaka 20.
Kutalamukwa ababyo. “Beshicikolo bakatalika kuntalamuka. Bakalinga kucita anga tapuwo musena patebo mpeenga ndakala akulya ambabo cakulya camalumwi. Mwaaka woonse ndakalinga kulya neenka alimwi ndakalinga kulila.”—Haley, ucite myaaka 18.
Kucita luta kwiinda mukusebensesha Intaneti. “Kwiinda mukulembabo maswi aniini pakompyuta, inga wabisha liina lya muntu akumunyonyweta buumi bwakwe. Citonyumfwika anga kwaamba boobo nkuciindilisha, sombi ici inga cacitika!”—Daniel, ucite myaaka 14.

**MIIPUSHO YAAMBA PAMAKANI ALUTA**
NCANCINE NA NKUBECA	SHIKUMBULO
1 Kucita luta kwakatalika kale kale.	1 Ncancine. Kucakubonenaako, Baibo ilatulwiita sha bene Nefilimu—likoto licite liina lyaamba ayi: “Abo Beshikupensha Babyaabo.”—Matalikilo 6:4.
2 Kucita luta nkusekanabo. Teshi makani anene.	2 Nkubeca. Kucitwa luta kuli pakati kashintu shilengesha kwaamba ayi bacanike baanji balicaye.
3 Nshila ibotu yakukoma shikucita luta nkumuboshaamo.	3 Nkubeca. Liinji bantu beshikucita luta balaba ankusu kwiinda baabo mbobeshikucitila luta, aboobo kubabooshaamo inga tacicafwiwo.
4 Na wabona muntu umwi kaacita luta, toeelete kucita cilicoonse.	4 Nkubeca. Mubukalo ubu taakuwo muntu weelete kuumunabo. Na womunabo ndyewabona muntu umwi kaacita luta, nkokwaamba ayi walengesha ayi lipenshi likomene muciindi cakwaamba ayi limane.
5 Nabi kwaamba ayi bashiluta balayoosha bamwi, liinji abalo balaloonda.	5 Ncancine. Nabi kwaamba ayi beshikucita luta balalinyumfwa, baanji balaloonda alimwi balayoosha babyaabo kwaamba ayi banyumfwe kabotu.
6 Beshiluta inga bacinja.	6 Ncancine. Kwiinda mukucafwikwa, beshikucita luta inga bacinja mbobayeeya alimwi amiibo yabo.