MWIIPUSHO 9

Sa Ndyeelete Kushoma Njiisho Yakusanduka Kwashintu?

MULANDU MWIIPUSHO UYU NCOSUNIKI

Na ncancine ayi shintu shakabakobo sheenka, nkokwaamba ayi buumi tabucite mpindu. Ono na ncancine shintu shakalengwa, nkokwaamba ayi inga twacana shikumbulo shisangalasha kumiipusho ikatasha mubuumi alimwi ashakunembo.

**INO INGA WACITA BUYANI?**

Yeeya bukalo ubu: Alex wapenshekwa mumiyeeyo. Lyoonse ulashoma ayi Lesa nkwaali alimwi shintu shoonse shakalengwa anguwe. Ono sunu batica bakwe ba Biology batoyuminisha ayi, njisho yakwaamba ayi shintu shakabakobo sheenka njancine, mukwiinga pali bumboni buswa kubantu baisha sha sayansi. Alex tasuni kuboneka anga ngumuntu utacite maano. Lyalo watalika kulyaambosha ayi, ‘Na ba sayansi bakacana kale bumboni bwakwaamba ayi shintu shakabakobo sheenka, Ino nebo ndime ani kwaamba ayi ntalike kupikisha?’

Na walinga Alex, sa inga wasumina kwaamba ayi shintu shakabakobo sheenka mukwiinga mabuku alatondesha makani aya kuba ancine?

IMIKANA AKUYEEYA!

Liinji bantu na kabapikishanya, balacicila kwaamba shintu nshobashoma nabi kabateshi mulandu wiine wiine ngobashishomena.

Bantu bamwi balashoma ayi shintu shakalengwa mukwiinga nshobakabaisha kuceeci.
Bamwi balashoma ayi shintu shakabakobo sheenka mukwiinga nshobakabaisha kucikolo.

MIIPUSHO 6 NJEENGA WAYEEYAWO

Baibo ilaamba ayi: “Ncakwiila, ŋanda ili yoonse ilayakwa aumwi muntu, sombi Lesa ngomuyaki wa shintu shoonse.” (Bene Ebulu 3:4) Sa inga waashoma makani aya?

Wacanike utolanga ŋanda — Kwaamba ayi taaku wakalenga buumi, kulyeelenebo amuntu utacite maano waamba ayi ŋanda iyi yakaliyaka iine

NSHOBAAMBA: Shilengwa shoonse shakabaako pamulandu wacilulumo cinene.

1. Ino ngaani na nciinshi cakalengesha cilulumo cinene?

2. Ino ncili ciboneka kuba camaano—kwaamba ayi shintu shoonse shakaswa kutaakuwo na kwaamba ayi kuli umwi wakashilenga?

NSHOBAAMBA: Bantu bakasanduka kuswa kushinyama.

3. Na ncancine bantu bakaswa kushinyama—mucakubonenaako mbuli, basokwe—Ino ngumulandunshi pali bupusano bunene na twakoshanisha maano bantu ngobacite mubupusano abasokwe?

4. Ino ngumulandunshi buumi nabi bwatuntu “tuniini” bulakankamika abuumbi?

NSHOBAAMBA: Njiisho Yakusanduka yakashinishikwa ayi njancine.

5. Sa muntu utokwaamba boobo wakalilangweta mwiine bumboni ubo?

6. Ino mbantu bongaye bashoma ayi shintu shakasandukabo pamulandu wa nshobakalwiitikwa ayi bantu bacite maano nshobashoma?

“Sa inga tokankamani na wacana ŋanda iyakitwe kabotu muluundu? Sa inga wayeeya ayi shisamu nshoshakayaka ŋanda ibotu iyo? Ncakwiila inga toyeeyi boobo! Ishi inga tashicitikiwo. Ono ino inga twashoma buyani ayi shintu shoonse mububumbo boonse shakabakobo sheenka?”—Julia.

“Yeeya ayi muntu umwi wakulwiita ayi fakitale imwi ipanga mabuku yapasuka cakwaamba ayi ink njobasebensesha pakupanga yamwaikila kulubumbu alimwi akumasenke akupanga dikishonali ibotu abuumbi. Ono sa ishi inga washishoma?”—Gwen.

INO NGUMULANDUNSHI NDYEELETE KUSHOMA AYI LESA NKWAALI?

Baibo ilaamba ayi ulyeelete “kusebensesha maano.” (Bene Loma 12:1) Ici cilaamba ayi toelete kushoma ayi Lesa nkwaali pamulandu wa

MBONTOLINYUMFWA (Ndalinyumfwabo ayi kulyeelete kuba nkusu shimwi shiinda nkusu shoonse)
KUYUNGWA ABAMWI (Ndaswa kubantu bapaila)
KUKAKATISHIKWA (Bashali bangu bakanjiisha kushoma muli Lesa—taaku mbweenga ndacita)

Sombi, ulyeelete kuba amakani anyumfwika alengesha ayi ube alushomo.

“Ndyeendi mukilasi akukutika batica ndyebatosansulula mubili mbosebensa, nshitoonshiwo kwaamba ayi Lesa nkwaali. Cipansha cilicoonse cilicite ncito njocisebensa, atuntu tumwi tuniini tucitika, swebo kwakutashiba. Ncakwiila mubili wamuntu ulishupite kunyumfwisha!”—Teresa.

“Na ndabona maanda alaamfu, bwato bunene, na motoka, ndalipusha ayi, ‘Ino mbaani bakashipanga ishi?’ Kwaamba ayi bantu bapange motoka, balyeelete kusebensesha maano, mukwiinga kuli tuntu tumwi tuniini tweelete kusebensa kabotu kwaamba ayi motoka italike kweenda. Aboobo na motoka kuli wakepanga nkokwaamba ayi anu aswebo sobantu kuli wakatupanga.”—Richard.

“Ndyendakalinga buya ciiya shiinji pali sayansi ndakatalika kubona ayi njiisho yakusanduka kwashintu teshi yancine. . . . Nebo ndabona anga ncuubu kushoma ayi kuli Mulengi kwiinda kushoma ayi shintu shakasandukabo.”—Anthony.

SHAKUYEEYAWO

Nabi kwaamba ayi basayansi batola myaaka iinji kuyandoola bumboni, tabana kucana busansulushi bukoshenye mbweenga boonse basuminishanya pamakani akusanduka kwashintu. Na basayansi tabasuminishanyi pamakani akusanduka kwashintu—abo baambwa ayi mbobacibwene—sa inga caba camaano kushoma njiisho iyi?