Joshuwa a Bene Gibyoni

Bantu baanji bakalinga kukala mumisena imwi bakanyumfwa shakacitika ku Jeliko. Aboobo bamaami babo bakabungana pomwi kwaamba ayi balwane bene Isilaeli. Sombi bene Gibyoni bakalinga kucite muyeeyo upuseneeko. Bakafwala shakufwala shifwite akuya kuli Joshuwa akwaamba ayi: ‘Twaswa kucishi ca kulaale abuumbi. Twakanyumfwa shiinji pali Yehova anshaakamucitila ku Ijipiti acishi ca Moabu. Amushomeshe kwaamba ayi teshi mukatulwaane, lyalo tulaakuba basebenshi banu.’

Joshuwa wakabashoma akusumina ayi teshi akabalwaane. Ndyepakeenda nshiku shotatwe, wakesa mukushiba ayi bakaswabo pafwiifwi. Bakaswa kucishi ca Kenani. Joshuwa wakabeepusha ayi: ‘Ino mwakatubecela nshi?’ Bakakumbula ayi: ‘Twakaloonda! Tulicishi kwaamba ayi Yehova Lesa wanu alamucafwa munkondo. Twaseenga mutatucaayi.’ Joshuwa wakacita kweelana ambwaakashomesha, aboobo taakwe kubacaya.

Kapatana kwiinda aciindi cilaamfu, bamaami bali 5 ba bene Kenani amasoja aabo bakalinga kusuni kulwana bene Gibyoni. Joshuwa alikoto lyakwe lya masoja bakeenda mashiku oonse kuya mukucafwa bene Gibyoni. Inkondo yakatalika macuunsa cuunsa bushiku bwakakonkelaawo. Bene Kenani bakatalika kulobokela mumisena ipusenepusene. Ano kuli koonse nkobakalobokela Yehova wakalosha mfula ya mabwe pali mbabo. Lyalo Joshuwa wakasenga Yehova kwiimika lisuba. Ino nceebonshi Joshuwa wakasenga Yehova kwiimika lisuba litana kwiimikanawo kale? Wakalinga kucite lushomo luyumu muli Yehova. Lisuba lyakeemikana bushiku boonse kushikila bene Isilaeli ndyebakakoma bamaami ba bene Kenani amasoja abo.