Mutanjilili Mupya Abanakashi Bobilo Batakalinga Kucite Boowa

Joshuwa wakatanjilila bantu bakwe Yehova kwa myaaka iinji, lyalo wakafwa kaacite myaaka 110. Kaacili muumi, bene Isilaeli bakalinga kulambila Yehova eenkabo. Ano Joshuwa ndyaakafwa bakatalika kulambila shibumbwabumbwa, bweenka mbuli bene Kenani. Aboobo Yehova wakabaleka kwaamba ayi Jabini mwaami wa bene Kenani atalike kubapensha ceebo cakutanyumfwila. Ndyebakasenga Yehova kwaamba ayi abacaafwe, wakabapa mutanjilili mupya Balaki. Uyo wakalinga kusa mukubacafwa kuboolela kuli Yehova.

Mushinshimi mwanakashi Debola wakeeta Balaki. Wakalinga kusuni kumulwiita makani akaswa kuli Yehova ayi: ‘Koya abasankwa bali 10,000 mukulwana Jabini amasoja akwe ku Mulonga wa Kishoni. Ulaakumukoma Sisela munene wamasoja akwe Jabini.’ Lyalo Balaki wakakumbula ayi: ‘Na awebo ulaakuya anebo, ingayi ndaakuya.’ Alakwe Debola wakakumbula ayi: ‘Ee tulaakuya soonse. Sombi teshi ndiwe weshi ukacaye Sisela. Yehova waamba ayi mwanakashi ngweshi akamucaaye.’

Debola wakaya a Balaki alikoto lyakwe lya masoja mukulibambila kulwana ku Kalundu ka Tabo. Sisela ndyaakanyumfwa sheshi, wakabunganya masoja ashikoci shakwe sha nkondo pafwiifwi a mulonga. Debola wakaambila Balaki ayi: ‘Sunu mbobushiku Yehova ndyeshi akulengesha kukoma.’ Balaki wakakunkuluka kuswa paKalundu ka Tabo amasoja akwe ali 10,000 kuya mukulwana Sisela amasoja akwe akalinga kucite nkusu.

Lyalo Yehova wakalengesha mulonga wa Kishoni kusula abuumbi. Aboobo shikoci shakwe Sisela shakacatwa mumatipa. Sisela wakasotoka kuswa mucikoci cakwe akucica. Balaki amasoja akwe bakakoma Sisela amasoja akwe, sombi Sisela wakaloboka! Wakacica akuya mukuyuba mutente ya mwanakashi waliina lya Jaelo. Jaelo wakapa Sisela mukupa ayi anwe lyalo wakamufweka libulangeti. Lyalo Sisela wakoona ceebo cakulema. Sombi Jaelo wakabwesa mpoopo ansando akuya kuli Sisela kaya bubendelela, wakamupopa mpoopo kumutwi, lyalo wakafwa.

Balaki ndyaakalinga kusa bulangoola Sisela, Jaelo wakamuciinsha kunshila akumwaambila ayi: ‘Kosa kuno, nkutondeshe muntu ngootooya bulangoola.’ Lyalo wakenjila akucana Sisela ulituntumene. Balaki a Debola bakalumbaisha Yehova mulwiimbo ceebo ca kulengesha bene Isilaeli kukoma balwani babo. Bene Isilaeli bakekala muluumuno kwa myaaka 40 yakakonkelaawo.