Yehova Wakapa Samusoni Nkusu

Bene Isilaeli baanji bakatalika alimwi kulambila shibumbwabumbwa, aboobo Yehova wakalekela bene Filisiti kubapensha. Sombi bene Isilaeli bamwi bakatolelela kusuna Yehova. Womwi pabaabo wakalinga Manowa. Manowa amukaakwe tabakalinga kucitewo mwaana. Bushiku bumwi Yehova wakatuma munjelo ku mukaakwe Manowa akumulwiita ayi: ‘Ulaakuba a mwaana musankwa. Uyo weshi akapulushe bene Isilaeli ku bene Filisiti. Alaakuba munasili.’ Sa munasili ulimushi? Munasili wakalinga musebenshi wakwe Yehova ulibetele alimwi taakalinga kucesaawo misusu.

Mukuya kwaciindi, Manowa wakaba amwaana musankwa ngwaakatumba ayi Samusoni. Samusoni ndyaakalinga kukula, Yehova wakamupa kuba ankusu shiinji. Wakalinga kucikonsha kucaya nkalamu amaansabo. Paciindi cimwi, Samusoni wakacaya bene Filisiti bali 30 eenkabo. Bene Filisiti bakamupata abuumbi alimwi bakalinga kulangoola nshila ya kumucayilaamo. Bushiku bumwi mashiku Samusoni kaalete ku Gasa, bakaya mukumubelamina kumwinjililo akulindilila ayi bamucaaye macuunsa. Sombi Samusoni wakabuka pakati ka mashiku akuya kumwinjililo wa tauni ya Gasa akucata shisasa sha kumwinjililo akushishulila pomwi ashisamu shobilo. Lyalo wakashinyamuna pacifushi akuya mukutantaasho peculu lya kalundu kali kwicwe lya Ebuloni!

Lyalo bene Filisiti bakaya kuli Delila, mwanakashi Samusoni ngwaakalinga kusuni kweeba akumwaambila ayi: ‘Tutookupa maali a silifa aanji abuumbi na utucaafwe kushiba cipa Samusoni kuba ankusu. Tulisuni kumucata akumubika mujeele.’ Delila wakalinga kusuni maali, aboobo wakasumina. Pakutaanguna, Samusoni wakakaka kuyubulula cakalinga kumupa kuba ankusu. Sombi wakamukakatisha kwaamba ayi amulwiite, aboobo wakamuyubulwita. Wakaamba ayi: ‘Misusu yangu taina kuceswawo kale ceebo cakwaamba ayi ndi munasili. Na ikaceswebo nkusu shangu shilaakumana.’ Ici cakalinga cilubo cinene Samusoni ncaakacita kwiinda mukuyubulula bushishi ubu. Sa tabushi?

Lyalo peenkapo Delila wakaambila bene Filisiti ayi: ‘Wandwiita!’ Aboobo Delila wakalindila kushikila Samusoni woona, lyalo wakeeta musankwa umwi kwaamba ayi ese amuceese misusu. Delila wakoolobesha ayi: ‘Samusoni, mbaabo bene Filisiti besa!’ Samusoni wakapatamuka akucana ayi nkusu shakwe shamana. Mpeeke bene Filisiti bakamucata akumutuloola meenso lyalo akumwaanga.

Bushiku bumwi bene Filisiti baanji abuumbi bakabungana mu tempele yakwe lesa wabo Dagoni, kaboolobesha ayi: ‘Ngulesa wesu waaba Samusoni mumaanseesu! Amwiite Samusoni ese atusangalasheewo.’ Bakamwiimika pakati ka macinko obilo, akutalika kumuseka. Lyalo Samusoni wakoolobesha ayi: ‘O Yehova, ndasenga ayi munjuumye kakweelaako.’ Paciindi ici, misusu yakwe Samusoni keeli yalaampa alimwi. Lyalo Samusoni wakashindika cankusu macinko obilo apakati ashimpya ŋanda. Tempele iyo yakawa akubalimba bantu boonse bakalingaamo lyalo bakafwa pantu pomwi Samusoni.