Yesu Mbwaakabusha Lasalo

Yesu wakalinga kucite beshicibusa bakwe botatwe mbaakalinga kusuni, bakalinga kukala ku Betani. Beshicibusa bakwe aba bakalinga Lasalo abenankashi shakwe bobilo Maliya a Malita. Bushiku bumwi, Yesu ndyaakalinga kulubasu lumwi lwa Mulonga wa Joodani, Maliya a Malita bakatuma muntu wakesa mukumulwiita ayi: ‘Lasalo ngumulwashi. Ufwambaane kusa.’ Sombi Yesu taakwe kuya peenkaapo. Wakekala kwanshiku shobilo lyalo wakalwiita bashikwiiya bakwe ayi: ‘Katiya ku Betani. Lasalo alilete aboobo ntooya mukumubusha.’ Batumwi bakaamba ayi: ‘Na Lasalo alilete ingayi atooba kabotu.’ Sombi Yesu wakabalwiita cakutabeenda mweela ayi: ‘Lasalo wafwa.’

Yesu ndyaakashika ku Betani, kapali peenda nshiku 4 kuswa ciindi Lasalo ndyebakamubika mucuumbwe. Bantu baanji bakesa mukuyuminisha Malita a Maliya. Malita ndyaakanyumfwa ayi Yesu wesa, wakafwambaana kuya mukubonanaakwe. Wakaamba ayi: “Nkambo, nimwakalingaako naakwiinga nandumi yangu taafwi.” Yesu wakamulwiita ayi: ‘Nandumi yako atoobuka alimwi. Sa ulashoma ubo Malita?’ Wakakumbula ayi: ‘Ndashoma ayi alaakubuka alimwi baakubuka bafu.’ Yesu wakamulwiita ayi: ‘Nebo ndime bubuke abuumi.’

Lyalo Malita wakaya kuli Maliya akumwaambila ayi: ‘Yesu wesa.’ Maliya wakacicila kuli Yesu, lyalo bantu bakamukonkela. Wakawita kumyeendo yakwe Yesu, kaalilabo. Wakaamba ayi: ‘Nkambo, nimwakalingaako naakwiinga nandumi wesu taafwi!’ Yesu ndyaakabona Maliya mbwaakalinga kucite buumba, alakwe wakatalika kulila. Lyalo bantu ndyebakabona Yesu kaalila, bakaamba ayi: ‘Amubone Yesu mbwaakalinga kumusuni Lasalo.’ Sombi bamwi bakalinga kuliipusha ayi: ‘Ino nceebonshi wakalekela mubye kufwa?’ Ino nshiinshi Yesu nshaakacita?

Yesu wakaya kucuumbwe uko kwakalinga kucalitwe libwe linene. Wakabaambila ayi: ‘Amulikusheeko libwe.’ Malita wakaamba ayi: ‘Peenda nshiku 4! Kutooba keema kabiibi na mukusheeko libwe.’ Nacibi boobo, bakalikushaako libwe, lyalo Yesu wakapaila ayi: ‘Ta, ndalumba abuumbi kwaamba ayi mwankutika. Ndicishi kwaamba ayi lyoonse mulaankutika, sombi ndaamba muliswi lyapeculu kwaamba ayi bantu aba bashibe ayi mwakantuma.’ Lyalo wakoolobesha ayi: “Lasalo, swaamo umo!” Cintu cimwi cisangalasha cakacitika: Lasalo wakaswa mucuumbwe, kaapeteleshetwe mushisani. Yesu wakaamba ayi: “Amumwaangulule, anooya.”

Bantu baanji bakabona sheeshi shakacitika bakashoma muli Yesu. Sombi bamwi bakaya mukulwiita Bafalisi. Kuswabo bushiku bulya, Bafalisi bakalinga kusuni kucaya Lasalo a Yesu. Womwi pa batumwi bakwe Yesu uyo ngobakalinga kwiita ayi Judasi Isikalyoti, cabushishi wakaya ku Bafalisi akubeepusha ayi: ‘Inga mwaampa shongaye na ndamucafwa kucana Yesu nkwaabete?’ Bakamulwiita ayi balaakumupa maali asilifa ali 30, aboobo Judasi wakatalika kulangoola ciindi cili kabotu kwaamba ayi aabe Yesu ku Bafalisi.