Yesu Mbwaakabonekela Kubeshikucata Nswi

Ndyepakeenda ciindi kuswa ciindi Yesu ndyaakabonekela kubatumwi, Pita wakasalaawo kuya mukucaya nswi ku Lweenge lwa Galili. Tomasi, Jemusi, Joni abatumwi bamwi bakayaakwe. Mashiku oonse tabakwe kucayaawo nswi nabi yomwi.

Bushiku bwakakonkelawo macuunsa, bakabona musankwa umwi kaaimfwi kwiitala. Wakabeepusha ayi: ‘Sa mwacayaawo nswi?’ Bakamukumbula ayi: “Sobwe!” Musankwa uyo wakaamba ayi: “Amuwaale tukonde twanu kululyo lwa bwaato.” Ndyebakacita nshakabaambila, bakacata nswi shiinji cakwaamba ayi bakaalilwa kushikwelela mubwaato. Peenkaapo Joni wakashiba ayi musankwa uyo ngu Yesu, lyalo wakaamba ayi: “Mbaami!” Peenkaapo Pita wakaliwaala mumaanshi akutalika kusamba njabwe kuya kwiitala. Bashikwiiya bamwi bakamukonkela abwaato.

Ndyebakashika kwiitala, bakabona buledi a nswi kashitentwa pamulilo. Yesu wakabaambila ayi baleteleewo ashimwi nswi nshobacata kwaamba ayi beelikeewo pasheesho shakalinga kutentwa. Lyalo wakaamba ayi: ‘Kamusa tulye.’

Ndyebakamanisha kulya Yesu wakeepusha Pita ayi: ‘Sa ulinsuni kwiinda kucaya nswi?’ Pita wakakumbula ayi: ‘Ee Nkambo mulicishi ayi ndimusuni.’ Yesu wakamwaambila ayi: ‘Kosanina mbelele shangu shaana.’ Yesu wakeepusha Pita alimwi ayi: ‘Sa ulinsuni?’ Pita wakakumbula ayi: ‘Nkambo mulicishi ayi ndimusuni.’ Yesu wakaamba ayi: “Koembela mbelele shangu shaana.” Yesu wakeepusha Pita alimwi ciindi catatu. Pita wakoongumana. Lyalo wakakumbula ayi: ‘Nkambo, mwebo mulishi shintu shoonse, mulishi ayi ndimusuni.’ Yesu wakamulwiita ayi: “Kosanina mbelele shangu shaana.” Lyalo wakaambila Pita ayi: ‘Tolelela kunkonkela.