CIIYO 18

Makani Bamwi Ngeenga Beeyawo

1 Bene Kolinto 9:19-23

CITEENTE CINENE: Amulengeshe batookutika kuyeeya pamakani ngomutokwaambawo kwaamba ayi ndyemwamanisha likani lyanu banyumfwe ayi beeyawo comwi.

Amuyeeye makani batookutika ngobeshi kale. Muciindi cakubooshawo makani batookutika ngobakanyumfwawo kale, amwiishe munshila yeenga yabapa kubona makani ayo munshila njebatana kuyeyawo kale.

Mutatoli ciindi cilaamfu kusansulula makani ngobeshi kale, sombi amukalike moyo ndyemutosansulula makani ngobateshiwo.
Amulangweetewo makani akuyeeyawo. Na kacikonsheka, ndyemutosansulula shiteente shinene, inga mwaambako makani batookutika ngobateshiwo na mpashi makani atoocitika mucishi. Amuyeyewo abuumbi pamakani ngomutolibambila mbwatoocatana ashiteente nsheshi mwaambewo.

Ndyemutokwiinduluka mumakani ngomutolibambila, amuliipushe miipusho mbuli, nciinshi, nceebonshi, ndilili, nkuli, ngani, alimwi cakalinga buyani, ici cilaakumucafwa kuyeeya bunene pamakani ngeshi mukaambe. Ndyemutokwaamba likani, inga mwasebenseshaako miipusho imwi payeeyi akwiikumbula kwaamba ayi mwiishe kabotu.
Amucafwe batookutika kubona nshebatokwiiya palikani. Amusansulule Malembo mbweenga abacafwa batookutika mubuumi bwabo. Amwaambe nsheenga beeyawo pashintu shicitika, bantu mbobabete na mbobacita shintu.