Mbweenga Twapaila Lesa Kweelana Akuyanda Kwakwe

Bweenka mbotwakeeya muciiyo camana, teshi bupailishi boonse bupaila kweelana a Lesa mbwaasuni. Nacibi boobo, inga twacikonsha kupaila Mulengi wesu munshila imusangalasha. Ino ‘nkupaila’ kwa mushobo nshi kusangalasha Lesa? (Jemusi 1:27) Atubone Baibo nshoiisha.

1. Ino kupaila kwesu kulyeelete kuba buyani?

Kupaila kwesu kulyeelete kuba kweelana a Baibo nshoyaamba. Yesu wakalwiita Lesa ayi: “Maswi anu ndolushinisho.” (Joni 17:17) Beshibupailishi bamwi tabakonkeli shaamba Maswi akwe Lesa, Baibo. Balakonkela shaamba bantu alimwi atushiyashiya twa bantu. Ano Yehova taasuniiwo bantu ‘batalemeki milawo yakwe Lesa.’ (Amubelenge Maako 7:9.) Ano na katupaila kweelana anshaatulwiita mu Baibo inga twapa kwaamba ayi asangalale akupaila kwesu.

2. Ino Yehova tulyeelete kumupaila buyani?

Mukwiinga Yehova ngo Mulengi wesu, lakwe eenkabo ngotweelete kupaila. (Ciyubululo 4:11) Nkokwaamba ayi tulyeelete kumusuna alimwi akupailabo nguwe eenka, kwakubula kusebensesha shibumbwabumbwa na shikoshanyo.—Amubelenge Isaya 42:8.

Kupaila kwesu kulyeelete kuba ‘kusalalite alimwi kusangalasha” kuli Yehova. (Bene Loma 12:1) Nkokwaamba ayi tulyeelete kunokonkela milawo yakwe. Kucakubonenaako, abo boonse basuni Yehova balakonkela milawo yakwe yaamba pacikwati. Alimwi balaleya kucita shintu shibiibi mbuli kufweba fwaka, kusebensesha misamu ikola na kunwa bwalwa cakwiindilila.a

3. Ino nceebonshi tulyeelete kupaila Yehova pomwi abashominyineesu?

Mabungano esu ansondo ansondo alatupa coolwe ca ‘kulumbaisha Yehova pakati ka libungano.’ (Kulumbaisha 111:1, 2) Nshila yomwi mbotulumbaisha Lesa nkwiinda mukwiimba nyiimbo. (Amubelenge Kulumbaisha 104:33.) Yehova alatulwiita ayi tunoocanika kumabungano mukwiinga alitusuni alimwi alicishi ayi kucita boobo kulaakutucafwa kusangalala abuumi kwamuyayaya. Kumabungano tulayuminishikwa alimwi akuyuminisha bamwi.

AMWIIYILEWO ASHIMWI

4. Tatweelete kusebensesha shibumbwabumbwa mukupaila kwesu

VIDYO: Sa Lesa Alasuminisha Kusebensesha Shibumbwabumbwa Ndyetutopaila? (3:26)

• Ino nciinshi cakacitika bantu bakwe Lesa bamwi bamuciindi cakale kale ndyebakeelesha kumupaila kwiinda mukusebensesha shibumbwabumbwa?

Bantu bamwi balasebensesha shibumbwabumbwa ndyebatopaila ceebo cakwaamba ayi balisuni kulinyumfwa kuba pafwiifwi a Lesa. Sa kucita boobo inga takupi kwaamba ayi abatalamuke? Amubelenge Kulonga 20:4-6 alimwi a Kulumbaisha 106:35, 36, akubandika miipusho iyi:

• Ino nshintu nshi na nshibumbwabumbwa sha buyani nshomwakabonaawo bantu kabasebensesha ndyebatopaila?

• Ino Yehova alanyumfwa buyani pamakani akusebensesha shibumbwabumbwa?

• Ino mwebo mulalinyumfwa buyani pamakani akusebensesha shibumbwabumbwa?

5. Kupaila Yehova eenkabo kulatwaangulula kumakani akubeca

VIDYO: Kwaangululwa Acancine (5:16)

Amubelenge Kulumbaisha 91:14, akubandika mwiipusho uyu:

• Ino Yehova washomesha ayi alaakutucitila nshi na katutondesha ayi tulimusuni kwiinda mukupailabo nguwe eenka?

6. Tulapaila Lesa kumabungano

Tulalumbaisha Yehova alimwi akuyuminishanya kwiinda mukwiimba akukumbulawo ndyetuli kumabungano. Amubelenge Kulumbaisha 22:22, akubandika miipusho iyi:

• Sa mulanyumfwa kabotu kunyumfwa bamwi ndyebatokumbula kumabungano?

• Sa amwebo inga mwalibambila kukumbulawo?

7. Yehova alasangalala na katulwiitako bamwi nshetutokwiiya

Kuli nshila shiinji mbweenga twalwiitako bamwi cancine camu Baibo. Amubelenge Kulumbaisha 9:1 a 34:1, akubandika mwiipusho uyu:

• Ino nciinshi ncomweeya kuswa mu Baibo nceenga mwasuna kulwiitako umwi?

CITEENTE CINENE

Inga twacita shisangalasha Mulengi wesu na katupaila nguwe eenkabo, kumulumbaisha ndyetuli kumabungano, alimwi akulwiitako bamwi nshetutokwiiya.

Kwiindulukaamo

• Ino nciinshi ceenga catucafwa kushiba mbweenga twapaila Lesa munshila njaasuminisha?

• Ino nceebonshi tulyeelete kupaila Yehova eenkabo?

• Ino nceebonshi tulyeelete kupaila pomwi abaabo basuni kucita shisangalasha Lesa?

AMULANGWETEEWO ASHIMWI

Amubelenge makani atondesha cakapa mwanakashi umwi kucileka kusebensesha shibumbwabumbwa pamutwi utokwaamba ayi, “Ndakacileka Kusebensesha Shibumbwabumbwa.”

“Baibo Ilaalula Buumi bwa Muntu” (Njashi Yamulindilishi, July 1, 2011)

Amwiiye sheenga shamucafwa kukumbulawo kumabungano.

“Amulumbaishe Yehova Mulibungano” (Njashi Yamulindilishi, January 2019)

Amubone musankwa wacanike mbwakacafwikwa ceebo cakucanika kumabungano nabi kwaamba ayi tacakalinga cuubu kucita boobo.

Yehova Wakandama Kabotu (3:07)

Bantu baanji balashoma ayi mucilingano ncitondesho ca Beneklistu, ano sa tulyeelete kunoousebensesha ndyetutopaila?

“Ino Nceebonshi Bakamboni Bakwe Yehova Tabasebenseshi Mucilingano Mukupaila Kwabo?” (Makani acanika pa jw.org)