CIIYO 30
Bantu Mbomusuni Bakafwa Balaakubushikwa!
Lufu lulaleta kucisa akulinyumfwa cibiibi. Nceceeco Baibo ncoyaambila ayi lufu ngumulwani. (1 Bene Kolinto 15:26) Muciiyo 27, mwakeeya ayi Yehova alaakumukoma mulwani uyu. Ano ino nciinshi ceshi cikacitike kubantu bakafwa? Muciiyo ici mulaakwiiya shiinji pacishomesho acimwi cibotu abuumbi cakwe Yehova. Cishomesho ici ncakwaamba ayi alaakubusha bantu baanji kwaamba ayi bakasangalale abuumi kwamuyayaya. Ano sa ncakwiila ici inga cacitika? Sa abo beshibakabushikwe balaakukala pacishi capanshi na kwiculu?
1. Ino Yehova alisuni kubacitila nshi beshikamukowa abeshicibusa besu bakafwa?
Yehova alisunishi abuumbi kubusha baabo bakafwa. Musankwa ushomeka waliina lya Jobo wakalinga kushomete cakutatoonsha kwaamba ayi Lesa alaakumubusha na akafwe. Wakalwiita Lesa ayi: “Lyalo mwaakunjita, nebo ndaakukumbula [kuswa mucuumbwe].”—Amubelenge Jobo 14:13-15.
2. Ino tulishi buyani ayi bafu balaakubushikwa?
Yesu ndyaakalinga pacishi, Lesa wakamupa nkusu shakubusha bantu. Yesu wakabusha mwanakashi wacanike wakalinga kucite myaaka 12 alimwi amwaana musankwa wa mukalubinje. (Maako 5:41, 42; Luka 7:12-15) Mukuya kwaciindi, Lasalo shicibusa wakwe Yesu wakafwa. Nabi kwaamba ayi pakeenda nshiku shone Lasalo ndyaakafwa akubikwa mucuumbwe, Yesu wakamubusha. Yesu wakapaila kuli Lesa akwaamba ayi: “Lasalo, swaamo umo!” Lyalo “muntu uyo wakalinga kufwite wakaswa”—kaali muumi! (Joni 11:43, 44) Amuyeeyebo beshikamukowa abeshicibusa bakwe Lasalo mbobakakondwa!
3. Ino nshiinshi nsheenga mwalangila pa beshicibusa abeshikamukowa banu bakafwa?
Baibo ilaamba ayi: ‘Kulaakuba kubuka kwa bafu.’ (Milimo 24:15) Bantu Yesu mbwaakabusha ndyaakalinga pacishi capanshi tabakwe kuya kwiculu. (Joni 3:13) Bakakondwa kuba abuumi alimwi pacishi capanshi. Ubu bweenka Yesu mbweshi akacite conoonobo, alaakubusha bantu baanji kwaamba ayi bakasangalale abuumi bwamuyayaya mu paladaiso pacishi capanshi. Wakaamba ayi abo boonse Lesa mbwaibaluka balaakubushikwa, nabi baabo bakwaamba ayi taakuwo muntu nabi womwi weenga wabeebaluka.—Joni 5:28, 29.
AMWIIYILEWO ASHIMWI
Amwiiye Baibo nshoyaamba sheenga shatucafwa kushoma cakutatoonsha kwaamba ayi ncakwiila Yesu alicite nkusu shakubusha bafu alimwi alaakucita boobo. Amwiiye mbweenga kwiiya pamakani abubuke kwamuyuminisha akumupa kuba akulangila.
4. Yesu wakatondesha patuba kwaamba ayi alicite nkusu shakubusha bafu
Amwiiye shiinji Yesu nshaakacitila Lasalo shicibusa wakwe. Amubelenge Joni 11:14, 38-44, akubandika miipusho iyi:
Ino tulishi buyani ayi ncakwiila Lasalo wakalinga wafwa?—Amubone vesi 39.
Na Lasalo wakalinga waya kwiculu, sa mutoyeeya ayi naakwiinga Yesu wakamubushila pacishi capanshi?
5. Bantu baanji balaakubushikwa!
Amubelenge Kulumbaisha 37:29, akubandika mwiipusho uyu:
Ino bantu baanji beshi bakabushikwe balaakukala kuli?
Yesu alaakubusha bantu baanji kuteshibo baabo bapaila Yehova. Amubelenge Milimo 24:15, akubandika mwiipusho uyu:
Ino mbaani mbomusuni kubona na bakabushikwe?
Amuyeeye paceeci: Yesu inga wabusha muntu wakafwa bweenka mushali musankwa mbweenga wabusha mwanaakwe ulete
6. Kwiiya pamakani abubuke inga kwamuyuminisha akumupa kuba akulangila
Makani amu Baibo aamba pa mwanaakwe Jailosi mwanakashi, ayuminisha bantu baanji balinyumfwa buumba ceebo cakufwitwa shikamukowa na shicibusa. Amubelenge makani aya pa Luka 8:40-42, 49-56.
Yesu kaatana kubusha mwanaakwe Jailosi mwanakashi, wakalwiita Jailosi ayi: “Utaloondi, shomabo.” (Amubone vesi 50.) Ino kulangila kubushikwa kwa bafu inga kwamucafwa buyani . . .
na mwafwitwa shicibusa nabi shikamukowa?
na buumi bwanu buli mumapensho?
Amweebele VIDYO, lyalo akubandika mwiipusho utokonkelaawo.
Ino kulangila kubuka kwa bafu kwakabayuminisha buyani bashali bakwe Phelicity?
BANTU BAMWI BALAAMBA AYI: “Nciyumu kushoma kwaamba ayi ncakwiila bafu balaakubushikwa.”
Ino mwebo mutoobona buyani?
Ino ndilembo nshi ndyeenga mwasebensesha litondesha ayi bafu balaakubushikwa?
CITEENTE CINENE
Baibo ilaamba ayi bantu baanji bakafwa balaakubushikwa. Yehova alisuni kwaamba ayi bakabe abuumi, alimwi wakapa Yesu nkusu shakubabusha.
Kwiindulukaamo
Ino Yehova alimwi a Yesu balalinyumfwa buyani pamakani akubusha bafu?
Ino bantu baanji beshi bakabushikwe balaakukala kuli—kwiculu na pacishi capanshi? Ino nceebonshi ncemwaambila boobo?
Ino nciinshi cimupa kushoma kwaamba ayi beshicibusa na beshikamukowa banu bakafwa balaakubushikwa?
AMULANGWETEEWO ASHIMWI
Amwiiye mbweenga mwaliyumya na mwafwitwa shikamukowa na shicibusa.
Sa njiisho shamu Baibo inga shacafwa muntu wafwitwa?
Ino baana inga baliyumya buyani na bafwitwa shikamukowa na shicibusa?
Sa kuliiwo beshi bakabushikwe akuya kwiculu? Ino mbaani beshi bakabule kubushikwa?
“Ino Kubushikwa Kuswa Kubafu Cilaamba Nshi?” (Makani acanika pa jw.org)