CIIYO 49
Nsheenga Mwaciita Kwaamba ayi Mube Alusangalalo Mumukwashi Wanu—Lubasu 1
Bantu na beebanabo balalangila ayi lusangalalo ndobakalinga kucite pabushiku ndyebakeebana lulaakutolelela kwamuyayaya. Alimwi ici inga cakonsheka. Beneklistu bekala mucikwati kwaciindi cilaamfu alimwi basebensa cankusu kukonkela njiisho shamu Baibo, balicishi kwaamba ayi cilakonsheka kutolelela kuba alusangalalo mucikwati.
1. Ino Baibo ilaamba nshi pa basankwa beebete?
Yehova wakapa musankwa mukuli wakutanjilila mukwashi. (Amubelenge Bene Efeso 5:23, NWT.) Alisuni ayi musankwa anoosala sheenga shacafwa mukwashi. Baibo ilaamba pa basankwa beebete ayi: “Amutolelele kusuna bakaanu.” (Bene Efeso 5:25) Ino ici cilaamba nshi? Musankwa usuni mukaakwe alamutondesha nkumbu ndyebali pabantu andyebali bobilo. Aleelesha kucita sheenga shapa mukaakwe kulinyumfwa kushitilishikwa, kusangalala, alimwi akumulangweeta nshayandika lwakumubili. (1 Timoti 5:8) Ciyandika abuumbi, alamucafwa kuyumya bushicibusa bwakwe a Yehova. (Mateyo 4:4) Kucakubonenaako, inga wapaila alimwi akubelenga Baibo pomwi amukaakwe. Na musankwa watolelela kulama mukaakwe calusuno, alatolelela kuba abushicibusa buyumu a Yehova.—Amubelenge 1 Pita 3:7.
2. Ino Baibo ilaamba nshi pa banakashi beebetwe?
Maswi akwe Lesa alaamba ayi ‘mwanakashi alyeelete kumulemeka abuumbi ibaye.’ (Bene Efeso 5:33) Ino mwanakashi inga watondesha buyani ayi alalemeka ibaye abuumbi? Inga wacita boobo kwiinda mukuyeeya pamibo ibotu icite ibaye alimwi ambwaasebensa cankusu kwaamba ayi amulame kabotu alimwi akulama baana. Cimwi nceenga wacita nkumucafwa kwaamba ayi nshasala shisebense kabotu. Inga weelikaawo akubandikaakwe mukabotu alimwi akwaamba shibotu pali nguwe, nabi teshi mushomi.
3. Ino beebene inga bacita buyani kwaamba ayi bayumye cikwati cabo?
Baibo ilaamba pa beebene ayi: “Lyalo bantu bobilo aba balaakuba mubili womwi.” (Mateyo 19:5) Ici cilaamba ayi balyeelete kuleya cili coonse ceenga canyonyoola lusuno lwabo. Inga bacita boobo kwiinda mukucana ciindi cakuba pomwi lyoonse, kubandikishanya kuswa panshi lya moyo, akulwiitana mbobatoyeeya alimwi ambobalinyumfwa pali umwi amubye. Balabika Yehova panembo alimwi tabasuminishi muntu nabi cintu cimwi cili coonse kuba ciyandika abuumbi kwiinda wooyo ngobeebenaakwe. Kwiilikaawo, balaleya kunyumfwana abuumbi amuntu umwi ngobateebenaakwe.
AMWIIYILEWO ASHIMWI
Amubone njiisho shamu Baibo sheenga shayumya cikwati canu.
4. Nobasankwa nomweebete—amusune akulama kabotu bakaanu
Baibo ilaamba ayi “basankwa balyeelete kusuna bamakaabo bweenka mbuli mbobasuni mibili yabo.” (Bene Efeso 5:28, 29) Ino ici cilaamba nshi? Amweebele VIDYO, lyalo akubandika mwiipusho utokonkelaawo.
Ino musankwa inga watondesha buyani ayi alisuni mukaakwe alimwi alamubikila maano?
Amubelenge Bene Kolose 3:12, akubandika mwiipusho uyu:
Ino musankwa weebete inga watondesha buyani mibo iyi mucikwati?
5. Nobanakashi nomweebetwe—amusune beebaanu akubalemeka
Baibo ilaamba ayi mwanakashi weebetwe alyeelete kulemeka ibaye. Inga caba ayi ngumusebenshi wakwe Yehova nabi sobwe. Amubelenge 1 Pita 3:1, 2, akubandika miipusho iyi:
Na mulyeebetwe kumusankwa uteshi mushomi, ncakutatoonsha kwaamba ayi mulisuni ayi alakwe anoolambila Yehova. Ano mutoobona buyani, ino nciinshi ceenga cacafwa bunene—kunoomushimikila lyoonse, na kutondesha mibo ibotu alimwi akumulemeka? Ino nceebonshi?
Musankwa amwanakashi bali mucikwati inga basala kabotu na kabasebensela pomwi. Nacibi boobo, cimwi ciindi mwanakashi inga wayeeya shipusene amuyeeyo weenga waamba ibaye. Na caba boobo, inga wayandika kwaamba mbwaatoyeeya cakukalika moyo alimwi mubulemu, sombi taeelete kuluba kwaamba ayi Yehova wakapa musankwa mukuli wakusala sheenga shacafwa mukwashi. Alyeelete kucita nsheenga wacikonsha kwaamba ayi akonkele ibaye nshaasala. Kucita boobo inga kwapa kwaamba ayi mumukwashi mube lusangalalo. Amubelenge 1 Pita 3:3-5, akubandika mwiipusho uyu:
Ino Yehova alalinyumfwa buyani na mwanakashi weebetwe kaalemeka ibaye?
6. Inga mwacikonsha kukoma mapensho amucikwati canu
Taakuwo cikwati mutabi mapensho. Aboobo, beebene balyeelete kusebensela pomwi kwaamba ayi bamane mapensho. Amweebele VIDYO, lyalo akubandika miipusho itokonkelaawo.
Kweelana anshomweebela muvidyo, ino nciinshi cakalinga kutondesha ayi beebene bakacileka kunyumfwana abuumbi?
Ino bakacita buyani kwaamba ayi bayumye cikwati cabo?
Amubelenge 1 Bene Kolinto 10:24 alimwi a Bene Kolose 3:13. Pesule lyakubelenga lilembo lyomwi alyomwi, amubandike mwiipusho uyu:
Ino kukonkela njiisho iyi inga kwayumya buyani cikwati?
Baibo ilaamba ayi tulyeelete kupaana bulemu. Kupaana bulemu kuleelikawo kucita shintu munshila itondesha nkumbu alimwi akulemeka bamwi. Amubelenge Bene Loma 12:10, akubandika miipusho iyi:
Sa beebene balyeelete kulindila ayi mubye ngweshi ataangune kumupa bulemu? Ino nceebonshi?
BANTU BAMWI BALAAMBA AYI: “Nebo abeebaangu na bakaangu twakacileka kunyumfwana mbuli kale kale.”
Ino inga mwabacafwa buyani kushiba kwaamba ayi Baibo inga yabacafwa?
CITEENTE CINENE
Musankwa amwanakashi bali mucikwati inga baba basangalete na kabatondeshanya lusuno, kupaana bulemu, alimwi akukonkela njiisho shamu Baibo.
Kwiindulukaamo
Ino musankwa inga wacita buyani kwaamba ayi mucikwati mube lusangalalo?
Ino mwanakashi inga wacita buyani kwaamba ayi mucikwati mube lusangalalo?
Na muli mucikwati, ino ninjiisho ili yamu Baibo yeenga yamucafwa kuyumya cikwati canu?
AMULANGWETEEWO ASHIMWI
Amwiiye sheenga shamucafwa kuba alusangalalo mumukwashi wanu.
Amweebele vidyo ya nyimbo itootondesha shoolwe nsheenga mwacaana na kamukonkela njiisho shakwe Lesa mucikwati canu.
Amwiiye mbweenga mwatondesha ayi mulalemeka mukuli wakutanjilila mukwashi musankwa ngwakapekwa.
“Nobanakashi, Ino Nceebonshi Mulyeelete Kunyumfwila Beebaanu?” (Njashi Yamulindilishi, May 15, 2010)
Ino beebene bamwi bakacita buyani kwaamba ayi bacikonshe kukoma mapensho ayumu mucikwati cabo kwiilikawo akusuna kulekana?
Twakayumya Cikwati Ceesu Alimwi Kwiinda Mulucafwo Lwakwe Lesa (5:14)