BUUMI BWA BWINEKLISTU
Kucatana Ndyetutoshimikila Mumisena Mucanika Mishobo Ipusene pusene
Liinji bantu balafwambaana kutambula makani a Bwaami na baanyumfwa mucinemishaabo. Mpashi Yehova ncakabambila ayi “baJuda bakalinga kulemeka Lesa abo bakaswa mushishi shipusene pusene pabushiku bwa Pentekositi wa mumwaaka wa 33 C.E., banyumfwe makani abotu ‘mumushobo wabo,’ nabi kwaamba ayi mpashi bakalinga kwaamba mushobo ushibikitwe abuumbi mbuli, ciEbulu na ciGiliki. (Mili. 2:5, 8) Munshiku shino mumisena iinji, mabungano amishobo ipusene pusene alacanika ayi balashimikila kumusena womwi. Ino beshikushimikila bamumabungano ayo inga bacita buyani kwaamba ayi bashimikile uli woonse cakubula kunooya paŋanda yomwi ayomwi ico ceenga calengesha bantu kucimwa?
Amubandikishanye (Tus. 15:22): Bamatanjilili bancito balyeelete kubandikishanya akushiba nshila ibotu yeenga yacafwa mabungano oonse kushimikila kabotu makani abotu. Na musena nkobashimikila nguniini, mabungano ashimikila mumushobo umwi inga basotokela maanda ali kumusena wabo apo pacanika bantu baamba mushobo walibungano limwi. Nacibi boobo, na libungano lisebensesha mushobo uyo tabacikoonshi kuumana musena wabo ndyebatooshimikila ceebo cakwaamba ayi ngunene, inga basala kwaamba ayi mushimikile paŋanda ili yoonse sombi mubashibishe na mwacaana muntu usuni kwiiya. (od-CW p. 93 pala. 37) Na mpashi inga basenga ayi libungano lyanu libacafweeko kucana bantu baamba mushobo ngobasebensesha mulibungano alimwi misena iyo inga yalembwa kumusena walibungano lyabo. (km-CW 7/12 5, kabokosi) Amwiingashile kwaamba ayi cimwi ciindi, mulaakucana ayi paŋanda yomwi bantu balaamba mishobo ipusene pusene. Bubambo bwa mbweenga mwakumanisha kushimikila musena woonse bulyeelete kweendelana amilawo ya mbomweelete kusebensesha makani amisena yabantu.
Amusebensele Pomwi (Efe. 4:16): Amukonkele cakubikila maano butanjilishi buli boonse mbomwapekwa kuswa kumutanjilili wancito. Sa mulicite shikwiiya Baibo usuni kwiiya mumushobo uteshi ngomusebensesha mulibungano lyanu? Muntu uyo mpashi inga waya panembo bwangu na mwamupa kumukwesu na nankashi wa kulibungano na kakoto kasebensesha mushobo uyo kali pafwiifwi.
Amulibambile (Tus. 15:28; 16:1): Na mwacana mwineŋanda waamba mushobo umwi kumusena nkomushimikila, amucite nsheenga mwacikonsha kumushimikila makani abotu. Inga mwalibambila limwi mishobo njemutolangila kucana ndyemutoshimikila, kwiinda mukucitila limwi daunilodi pafooni na tabuleti ma Baibo amavidyo amumishobo imwi. Inga mwasebensesha a JW Language appu kwiiya bwakwaansha mumishobo iyo.